你仲記唔記得對上一次紅到「老是常出現」,而且不論社交媒體上,定係親朋好友、公司同事,抑或係街上陌生人都會熱烈討論嘅香港藝人係邊個?如果你本身有追開偶像或明星,又數唔數到自己有幾耐冇全情投入去追?

呢兩年,香港一直瀰漫住壓抑同沉重嘅氣氛。而舊年開始,更因為疫情,睇上去無論邊個行業都好似死氣沉沉,了無生氣。但係踏入 2021 年,香港似乎因為一班「仔仔」嘅慢慢崛起,再度變得有活力同希望,講緊嘅就係近來人氣非常強勁,由 ViuTV《全民造星》節目出嚟嘅 12 人男子組合 MIRROR,同埋由同一個節目出嚟嘅 4 人男子組合 ERROR。

2021 年 1 月 1 號嘅音樂頒獎禮,將成員姜濤同 MIRROR 呢個組合真真正正放大喺大眾面前。本身冇留意佢哋嘅人,嗰幾日都會喺媒體報導上不斷見到佢哋嘅名;之後 MIRROR 一首〈WARRIOR〉,聽到大家都熱血沸騰;再嚟就係 ERROR 同 ViuTV「無制限OT編集団」嘅《ERROR 自肥企画》,當然唔少得 ERROR 成員193 嘅一次受訪,就令佢哋社交媒體嘅 followers 急升;跟住就係 MIRROR 嘅「梅窩粉絲事件」,然後就有撳爛 Keyboard 都搶唔到,但係炒飛就越炒越貴嘅一票難求 MIRROR 演唱會;講講下就去到近期《大叔的愛》嘅播出,令大家瘋狂投入套劇同喜愛出演嘅成員,同埋「我老婆嫁左比 Mirror 導致婚姻破裂關注組」嘅一夜爆紅,都令佢哋嘅討論度不斷上升。

數數下,2021 年可以引起大眾關注同討論嘅娛樂性話題,大多數都同呢兩隊組合有關。而以下呢單,就算點唔留意都好,都一定會係近年「震動」全城事件之一。


過去嘅 7 月 23 號,ViuTV 喺屯門市廣場搞咗一個介紹新節目(兼奧運)嘅記者會。如果只係一個普通嘅節目記者會,應該係唔會咁多人關注同討論,之但係上星期一開始就有媒體報導話 MIRROR 同 ERROR 會一齊現身呢個活動,於是各界都諗個商場真係容納得曬咁多人?屯門會唔會「陸沉」㗎?等諸如此類嘅問題。到記者會前一日,確認咗時間和人物地點,大家(特別係各路粉絲)嘅關注點,就變咗要幾點去到「霸位」、商場邊個位嘅景觀最好同埋到時會有幾多人喺現場。而呢日嘅下晝開始,就不斷睇到消息有粉絲趕去現場,務求「搵個靚位睇仔仔」。


小薯仔喺追星路上,去過嘅商場活動不計其數。但呢個記者會,除咗係第一次正式見呢兩個組合嘅活動之外,絕對亦係追星史上最早起身同最早出門口嘅活動。去到現場係清晨 6 點左右,但已經數唔清楚有幾多人喺裡面排緊隊,講緊係咩年齡層同性別都有,嗰陣直頭諗唔起對上一次有咁大號召力嘅香港藝人活動係咩。到保安人員開咗鎖住唔同位置嘅閘,只係見到「千軍萬馬」一齊「衝鋒陷陣」嘅場景,嗰種震撼亦令小薯仔一生難忘!放眼望去,只係見到可以企嘅位,全部都係密麻麻嘅人!

當大家搵到位諗住可以唞下等活動開始,商場方面係冇諗住畀粉絲停落嚟嘅。因為呢個時候開始,就喺大電視輪住播兩個組合同成員個人單曲嘅 MV,而粉絲們就好似去咗演唱會咁,睇住個 MV 齊齊大合唱!嘩!嗰種聲勢真係唔講得笑!個 MV 播幾多次,粉絲就唱幾多次;見到有記者同工作人員影相就齊齊舉高成員嘅應援手牌同燈牌,大嗌成員嘅名。聽聞當中有唔少粉絲為咗呢個活動只係休息咗一陣,但係依然有氣有力,真係令小薯仔自愧不如。

記者會開始同結束嘅時候,MIRROR 同 ERROR 都係經由距離粉絲群好近嘅扶手電梯上落場地,兩次短短嘅路程中都不斷同粉絲揮手。當時此起彼落嘅環迴立體尖叫聲真係有種唔知自己身處何方嘅感覺,比起朝早「千軍萬馬」嘅震撼,簡直有過之而無不及!唔止離場同進場,其實成個活動過程都係充滿住尖叫聲同各個成員嘅名,而家諗返起,個腦都好似有聲,真係令人好印象深刻。






而喺活動正式結束後,兩個組合都留低接受各個媒體嘅訪問,當然粉絲們都係非常熱情地繼續尖叫。不過呢個時候,MIRROR 嘅隊長 Lokman 拎起支咪,話佢哋要做訪問,所以想請大家靜一靜,然後啲尖叫聲就真係消失曬。對小薯仔嚟講,呢個場面應該算係喺商場活動中幾罕見嘅,因為印象中比較少活動係現場尖叫聲太大而影響到藝人做訪問,而佢哋係要講呢句先可以令粉絲暫時靜落嚟,令小薯仔再次感受到,近期嘅人氣王真係非佢哋莫屬。



其實小薯仔唔算得上係好死忠嘅「鏡粉」或者係「404」,同時都覺得 MIRROR 同 ERROR 嘅彈起,有佢哋嘅過人之處同魅力之餘,亦有天時地利人和嘅因素存在。不過可以吸引到咁多唔同年齡嘅人瘋狂鍾意佢哋,又喺活動上全情投入為佢哋尖叫,甚至出心出力做應援,幫佢哋宣傳,真心認為佢哋算係好成功—除咗成功收穫超高人氣,仲成功令個個粉絲都變做青春少艾,每時每刻都「鏡不離口」。

由衷希望佢哋可以將自己嘅潛力同可能性不斷展示,繼續「焫焫焫焫焫焫著」大眾,繼續「浩浩蕩蕩迎來另一新世紀」。


撰文:小薯仔
圖片來源:ViuTV Facebook、小薯仔現場拍攝