雖然今屆金像獎 7 月 17 日先會舉行,不過所有獎項嘅提名名單都已經喺 2 月公佈咗,而最佳女配角有 5 位演員入圍,包括鮑起靜、廖子妤、鍾雪瑩、白浪同李麗珍,不過因為廖子妤憑住《智齒》同《梅艷芳》攞咗兩個提名,所以呢個獎項嘅提名係有 6 項嘅。

小薯仔整理咗 5 位入圍演員嘅簡介,一齊嚟睇下啦:


鮑起靜《除暴》
人稱鮑姐嘅鮑起靜,家人都幾乎係演藝圈嘅一份子:爸爸係著名演員鮑方,細佬係曾經憑《臥虎藏龍》攞過奧斯卡最佳攝影獎嘅鮑德熹 (鮑起鳴),而佢自己亦喺演員行業中打滾咗非常長嘅日子,被認為係好戲之人。

從影 56 年以嚟,曾經獲香港電影金像獎最佳女配角提名 5 次,今次係佢第 6 次被提名。喺《除暴》呢套戲中,飾演張隼 (吳彥祖) 嘅媽媽,有一場戲講佢知道個仔走唔甩,好多人都覺得佢嗰幾分鐘嘅演出,特別係眼神變化,係全套電影最好睇嗰幕。唔知會唔會憑呢幕說服到一眾手上有投票權嘅人士投佢一票呢?



廖子妤《梅艷芳》/《智齒》
演員 IG:https://www.instagram.com/fish331
2012 年讀完書之後,為咗自己嘅演員夢想,隻身由馬來西亞嚟到香港發展嘅廖子妤 (Fish),呢 10 年間演出過唔少各種類型嘅作品。曾經喺 2017 年獲得最佳女配角嘅提名,今次係第 2 次,同時亦係佢第 1 次以兩套電影喺同一獎項獲得兩項提名。

喺《梅艷芳》,佢飾演梅艷芳嘅家姐梅愛芳,戲份相對上較多,角色造型上同現實中嘅梅愛芳相似度非常高。喺戲中同王丹妮真摯嘅姊妹情,同恰如其分嘅演出,獲得唔少好評;而喺《智齒》,佢就飾演「可樂姐」,係個殘疾毒販,同《梅艷芳》嘅角色大相逕庭,但係都有唔少人讚佢演出有驚喜!令佢成為奪獎大熱~


鍾雪瑩《殺出個黃昏》
演員 IG:https://www.instagram.com/chungsaid
鍾雪瑩喺入圍者當中,算係資歷比較淺嘅一位。以前曾經喺電台做過 DJ,離開電台後就專心往演員方向發展,而除咗演員呢個身份,佢亦係一位填詞人。

喺 2021 年上映嘅電影中,有佢出現嘅電影 (不論戲份多少) 已經有 4 套,其中戲份比較重嘅《殺出個黃昏》,令佢獲得今屆金像獎嘅最佳女配角提名之餘,亦憑住同一角色,同時獲得最佳新演員提名!喺戲中同謝賢嘅一段看似父女,又看似爺孫嘅關係,仲有兩個人之間嘅化學作用,都令唔少觀眾對呢個冇乜電影演出經驗嘅演員留低正面評價!


白浪《奪冠》
本身打開排球,從事金融行業嘅白浪,係 5 位入圍演員中,唯一一位正職唔係做演員嘅。

呢套戲嘅導演陳可辛一直搵唔到合適演員飾演郎平嘅年輕版,最後睇到真.郎平個女,即係白浪嘅相,搵佢傾咗半年,然後搵埋個表演老師飛去美國教佢,最後睇到佢一個人對住鏡頭做戲嘅片就決定搵佢做自己媽媽喺戲中嘅年輕版。亦因為係角色係青年,所以戲份都集中喺電影嘅前半段。


李麗珍《濁水漂流》
演員 IG:https://www.instagram.com/__leelaichun
可能大家對李麗珍嘅印象,會多聚焦喺佢嘅個人生活,或者係曾經拍過三級片,不過從影 38 年,佢都拍過唔少其他作品㗎~曾經攞過金馬影后嘅佢,而今次係第 2 次獲提名金像獎嘅最佳女配角。

久休復出嘅佢喺《濁水漂流》飾演陳妹一角,喺監倉識到蘭姑呢個行動不便嘅好姊妹。出獄後就喺餐廳洗碗,繼續照顧蘭姑嘅起居,希望可以一齊脫離露宿者生活。不過好多人就覺得相比起一班男角色,佢喺戲中嘅發揮唔算大。可唔可以奪獎而回,就要睇下有一票嘅相關人士取態了~

以上嘅電影中,《智齒》、《濁水漂流》、《除暴》及《梅艷芳》都已經串流上咗香港 Disney+!大家可以喺金像獎頒獎禮前重溫各位入圍演員嘅演出。
未有 Disney+ 睇唔到?立即訂閱:http://disneyplus.bn5x.net/e42ooX


撰文:小薯仔
資料來源:維基百科、香港電影金像獎網頁及網上資料
照片來源:《智齒》、廖子妤 Facebook;英皇電影、鍾雪瑩 Instagram;「安樂影片 Edko Films Ltd」YouTube 上載之預告影片截圖;《濁水漂流》Facebook 上載之電影製作特輯截圖


延伸閱讀:
哥哥張國榮5套電影推介 當中有你鍾情嘅作品嗎?
https://timable.com/blog/2163967

【金像獎2022】金像獎4位入圍最佳男主角 大前輩同新人邊位會脫穎而出?
https://timable.com/blog/2174406

【金像獎2022】金像獎5位入圍最佳女主角 前輩新人各有優勢
https://timable.com/blog/2163068

【金像獎2022】金像獎5位入圍最佳男配角 前輩新人各有千秋
https://timable.com/blog/2156900

【金像獎2022】今屆角逐各獎項嘅電影你睇過幾多?一文整理20套獲提名電影
https://timable.com/blog/2133881

Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下載Timable App,隨時隨地捕捉本地活動資訊
iOS/Android:https://bit.ly/timable_app