【Friday 那些年】和你數一起追過的韓國男子團體 #2

呢一兩年，好多好耐冇活動、冇出歌嘅二代韓國團體都因為唔同節目，再次出現喺大眾嘅視線裡面，喚醒返大家當年嘅回憶。而今篇小薯仔所介紹嘅團體，應該都係好多粉絲嘅青春：


東方神起 (동방신기 / TVXQ!；日本用：TOHOSHINKI)
成員：
鄭允浩 (정윤호；유노윤호 / U-Know Yunho / 瑜鹵允浩)
沈昌珉 (심창민；최강창민 / Max Changmin / 最強昌珉)
金在中 (김재중；영웅재중 / Hero Jaejoong / 英雄在中，現已退團)
朴有天 (박유천；믹키유천 / Micky 有天，現已退團)
金俊秀 (김준수；시아준수 / Xiah 俊秀，現已退團，並改做「XIA」)
出道年份：2004 年 (大多數都以 2003 年 12 月 26 日嘅正式亮相嚟做出道日)
代表作：
〈주문 - MIROTIC〉
https://www.youtube.com/watch?v=NvxxChFqsaw

〈Rising Sun〉
https://www.youtube.com/watch?v=xQ635vE2RQI


SM 娛樂為咗打入海外嘅亞洲圈子 (特別係中文地區)，所以首次打算用漢字做團體名，本身嘅候選名有「五臟六腑」同「東方不敗」，最後喺創辦人李秀滿嘅提議下，就起用咗「東方神起」作為組合名，意思係東方之神升起。而佢哋亦成功做到「神蹟」，最高峰時官方 fans club 擁有超過 80 萬粉絲，當時仲入埋健力士世界紀錄！仲係韓國嘅偶像團體裡面，少數所有成員都可以做到合聲效果嘅！而佢哋嘅成功亦令之後好多新人都跟住同一模式，可以話係令韓國偶像團體再次興盛嘅始祖！

出道曲〈HUG〉喺 SBS 電視台嘅人氣歌謠獲得 3 個星期嘅第一位，同年仲喺各個主要嘅音樂頒獎禮中大豐收，用咗好短時間就成為韓國頂尖嘅明星。不過喺韓國嘅活動時間未係好長，好快就去咗日本出道，不斷推出單曲同上節目，令佢哋喺當地嘅人氣同知名度與日俱增，只係用咗兩年時間就登上咗日本嘅武道館開演唱會！到而家喺日本仍然有非常多嘅粉絲～

而 2008 年 9 月，佢哋喺韓國就推出〈MIROTIC〉呢隻碟，反應非常好，同名主打歌仲紅遍韓國！無論你係唔係 Cassiopeia (粉絲名稱)，只要一響起音樂，就會自動跟住唱，跟住應援方法一齊嗌！呢首歌甚至仲被選為「考試禁曲」！唔少後輩都好中意翻唱㗎～


（左：沈昌珉、鄭允浩；右：金俊秀、金在中、朴有天)

但係 2009 年，成員金在中、朴有天同金俊秀就同 SM 娛樂發生合約糾紛，離開咗公司同團體，另外組成「JYJ」 (註：朴有天喺 2019 年已退出組合)；而喺 2011 年開始，鄭允浩同沈昌珉就繼續以東方神起嘅名義進行活動，直到現在。


SS501 (더블에스오공일)
成員：金賢重 (김현중)、許永生 (허영생)、金奎鐘 (김규종)、朴政珉 (박정민)、金亨俊 (김형준)
出道年份：2005 年
代表作：
〈내 머리가 나빠서 (因為我太傻）〉
https://www.youtube.com/watch?v=5WjesN20UuI

〈U R Man〉
https://www.youtube.com/watch?v=zu0O4MgfeVg
以前韓國嘅偶像團體都比較少將英文字母同數字混合使用做隊名，而 SS501 就係呢少數之一。隊名嘅第一個 S 係指 Sun、Super、Star 等嘅單字，有對未來嘅指向性，第二個 S 就係指歌手 (Singer)，至於 501 就有五位成員永遠一體嘅意思，所以全個名嘅意義其實係希望「五位一體共同成為巨星」。另外，SS 都唔係單獨發字母嘅發音，要連埋讀「Double S」。


雖然係 DSP Media 旗下，但佢哋正式喺大眾面前露面，係透過 Mnet 一個新人發掘計劃節目叫「M!pick」，因為 5 位成員嘅身高同外貌都出眾﹐所以節目播出後就引起咗青少年嘅關注，之後再透過 KMTV 同 Mnet 一齊搞嘅節目「SHOW！MUSIC TANK」宣佈正式出道。出道同年嘅 12 月，就以 3 億韓圜接咗廣告代言，喺新人嚟講都算係好勁嘅紀錄！

去到 2009 年 1 月，隊長金賢重有份出演嘅韓版《花樣男子》播出後，令佢哋全隊唔止喺韓國，甚至係喺亞洲嘅人氣都急速上升，仲去咗好多地方開粉絲見面會！而劇集嘅插曲〈내 머리가 나빠서 (因為我太傻）〉更加成為佢哋代表作之一 (註：呢首歌本身係許永生、金奎鐘同金亨俊三位成員主唱)！

不過去到 2010 年，因為合約到期，佢哋各自都簽咗新公司後，就維持住「單飛不解散」嘅狀態，直到呢刻都未再有 5 個人嘅團隊活動。(只係 2016 年，許永生、金奎鐘同金亨俊組成咗 Double S 301 做小分隊活動）


Super Junior (슈퍼주니어 / SJ)
成員：利特 (이특；朴正洙 / 박정수)、金希澈 (김희철)、藝聲 (예성；金鐘雲 / 김종운)、神童 (신동；申東熙 / 신동희)、銀赫 (은혁；李赫宰 / 이혁재)、李東海 (이동해)、崔始源 (최시원)、金厲旭 (김려욱)、曺圭賢 (조규현)、韓庚 (現已退團)、強仁 (강인；金永雲 / 김영운，現已退團)、金起範 (김기범，現已退團)、李晟敏 (이성민，自 2017 年 7 月起未參與團體活動)
出道年份：2005 年
代表作：
〈Sorry, Sorry〉
https://www.youtube.com/watch?v=x6QA3m58DQw

〈U〉
https://www.youtube.com/watch?v=oGdmuY4eqlE
喺 Super Junior 出現前，韓國係從來冇出現過一隊咁多人嘅團體，亦冇團體成員係中國人，而呢隊組合做咗以上呢兩點嘅「先鋒」。本身仲係個 12 人實驗性限定組合叫「Super Junior 05」，諗住活動 3 個月就解散，然後就換人做「Super Junior 06」，但係 2006 年加入咗曺圭賢之後就固定咗 13 位成員，同時亦組成咗唔同嘅小分隊。

2006 年 8 月同 2007 年 4 月，發生過 2 次非常嚴重嘅車禍，令其中幾位成員受重傷，所以追得比較耐嘅粉絲們提起佢哋，好多都會伴隨住一種慶幸－好彩而家仲可以見到佢哋。


去到 2009 年，推出第三張韓語正規專輯《Sorry, Sorry》，憑住容易記憶嘅旋律同重複嘅單詞，同名主打歌可以話係紅到發紫，周圍都「Sorry Sorry Sorry Sorry」同跟住佢哋搓手，仲令佢哋變成亞洲人氣王，好多媒體亦開始用「韓流帝王」嚟稱呼佢哋！不過呢隻亦係最後一隻 13 位成員一齊出現嘅碟，因為同年年尾，韓庚就同 SM 娛樂發生合約糾紛，離開公司同退團；金起範宣佈專注戲劇發展，唔再參與團體活動 (掛名直到 2015 年同 SM 約滿同時退團)；2019 年，強仁亦因為個人負面新聞，宣佈退團。

其實除咗音樂之外，佢哋由成團開始就已經活躍喺唔同嘅綜藝節目，亦從來唔掩飾出色嘅綜藝感，有時仲玩到好瘋狂！有幾位成員甚至做埋綜藝節目主持人㖭～


BIGBANG (빅뱅)
成員：T.O.P (崔勝鉉 / 최승현)、太陽 (태양；董詠培 / 동영배)、G-Dragon (權志龍 / 권지용)、大聲 (姜大聲 / 강대성)、勝利 (승리；李昇炫 / 이승현，現已退團)
出道年份：2006 年
代表作：
〈하루하루 (HARU HARU)〉
https://www.youtube.com/watch?v=8OAQ6RuYFGE

〈Fantastic Baby〉
https://www.youtube.com/watch?v=AAbokV76tkU
講到二代團嘅其中一個代表團體，又點可以唔提 BIGBANG？佢哋嘅團名取自宇宙大爆炸 (The Big Bang Theory)，係希望可以為韓國音樂界，甚至喺全世界帶嚟爆炸性嘅影響，而佢哋都的確成功做到呢樣嘢！不論係團隊，定係個人推出嘅音樂作品都風格多變，亦具有非常強烈嘅個人特色，所以都非常受歡迎！亦影響咗好多後起之秀 (不論係音樂上，抑或係時尚潮流上)。

啱啱出道嘅時候，其實係行 Hip Hop 風格嘅，不過就唔算話好高知名度。第二年推出《Always》呢隻細碟就加入咗電子音樂，仲由 G-Dragon 負責創作大部份歌曲，成績非常好，而主打歌〈거짓말 (Lies)〉更加令佢哋人氣高漲！而 2008 年出嘅〈하루하루 (HARU HARU)〉更加係韓國最暢銷嘅單曲之一！

但係講到真正推佢哋上國際舞台嘅，非 2012 年《Alive》呢隻碟莫屬！銷量非常高之餘，仲躋身美國 Billboard 200 大專輯榜排行榜中嘅第 150 名，係第一個韓國藝人以韓語專輯入榜！碟內其中一首主打歌〈Fantastic Baby〉，亦紅到不得了，就算係唔聽 K-pop 嘅人都會識一句「Wow Fantastic Baby」！與此關聯，並持續接近一年嘅世界巡迴演唱會更加為佢哋動員咗超過 80 萬觀眾！之後高人氣就一直維持，仲越嚟越勁～


因為成員陸續入伍嘅關係，所以 2018 年開始就暫時停止咗團體活動。然而喺 2019 年，成員勝利因為個人問題，宣佈退團同時退出演藝圈，令 BIGBANG 正式變成 4 人組合。嚟緊嘅 4 月 5 日，佢哋就會首次以 4 人形式推出新歌〈봄여름가을겨울 (Still Life)〉！


撰文：小薯仔
資料來源：維基百科、Namu Wiki 及網上資料
照片來源：the qoo 網站；TVXQ！、JYJ、Super Junior Facebook；Spotify SS501 歌曲頁面；DSP Media；Namu Wiki；BIGBANG 官方網站；imdb

---

延伸閱讀：
【Friday 那些年】和你數一起追過的韓國男子團體 #1
https://timable.com/blog/2151148

5首落雨會諗起嘅韓文歌 聽開K-Pop嘅你應該唔會未聽過
https://timable.com/blog/2156003


Follow埋Timable FB同IG
FB：https://www.facebook.com/timable.hk
IG：https://www.instagram.com/timable/

立即下載Timable App，隨時隨地捕捉本地活動資訊
iOS/Android：https://bit.ly/timable_app