【香港周圍遊】《幻愛》取景地圖 與李志樂和葉嵐一起尋找愛

各位最近睇咗《幻愛》未呢？一部既本土又唯美嘅愛情電影，好值得大家入場支持。小T特別欣賞電影團隊選取場景嘅用心，每一個重要場景都係有意思，同角色人物作呼應。

湖景邨


李志樂住湖景邨，而葉嵐就係住翠寧花園。電影中，男女主角各自居住嘅單位，係可以見到對方，以燈作回應 (相信有入場睇嘅朋友就明白啦～)


香港屋邨作為電影故事背景並唔陌生。導演認為「井」型屋邨有困局、困境嘅感覺，就好似李志樂嘅內心情況一樣。

翠寧花園與友愛邨之間的高速公路下


李志樂送葉嵐回家，二人親吻時被第三者打斷嘅地方。

景峰站


呢幕都拍得好有「日本」感覺！或者輕鐵日日都喺你身邊穿梭，你唔會覺得特別。但喺攝影師嘅鏡頭下，輕鐵亦可以好靚，亦可以走上大銀幕。

屯門碼頭長廊(屯門海濱花園)


圖片: [email protected]


以上呢一幕燈塔，係海濱長廊嘅盡頭。其實喺電影中係冇出現過，根據導演解說，因為考慮到電影節奏，所以忍痛剪走呢一幕。但電影中仍保留咗其他海濱長廊嘅場景，海濱長廊嘅設計係由闊慢慢走到窄，就好似李志樂同葉嵐，二人愈走愈近。

禾輋邨隧道


電影宣傳片截圖

雖然好多取景都係來自屯門，不過其中一幕亦係相當重要嘅場景—隧道，就係來自沙田禾輋邨附近。呢條隧道來往禾輋邨同火炭，分成兩段。選取隧道作為背景，係因為隧道比人一種幽閉同焗促嘅感覺，同電影故事好相襯。


電影宣傳片截圖

至於以上呢一幕既然係沙田，又點解會有輕鐵喺上面？其實只係CG合成畫面，令整套電影更連貫、更「屯門」。

除咗欣賞團隊選景嘅用心，小T本身都好鍾意呢套電影題材。其實每個人都一樣會有缺憾，邊個人有權介定「正常」同「不正常」。尋找愛情路上，懇請好好愛自己，未來總有人會懂你。

圖片來源: 《幻愛》劇照
撰文: Zoe