作為土生土長嘅南區人,一定聽過唔少關於南區嘅靈異事件👻👽🛸今個星期就等小編同你睇吓南區有咩靈異傳說


新系列「靈」社交距離嘅第一post就同大家睇吓就嚟變做集體回憶嘅海洋公園啦😌相信大家都聽唔少關於海洋公園嘅傳聞,當中最出名嘅傳聞一定係「一家四口纜車意外」。


街坊們有冇聽過傳說中恐怖纜車意外?傳聞喺海洋公園開幕無耐就發生纜車失事事件,載有一家四口嘅車廂跌落山崖就此身亡。有傳聞話初期園方用直升機將一幅海馬旗遮住失事位置;甚至有傳言話,如果坐喺纜車上,仔細咁向下觀察,會發現一個損毀嚴重嘅車廂,而且會隱約見到裡面有四個人向遊客揮手⋯⋯不過多年後樂園高層就澄清只係纜車嘅車頂吹咗落山腳。

傳說係真定假,直到而家都冇一個確實嘅說法。不過小編由以前討論區嘅總結出2種說法:
1. 一堆網民認為當時社會環境比較封閉,而政府為推動旅遊業,因此有可能隱瞞事故。
2. 而另外一種就覺得發生咁嚴重嘅事故,政府冇可能做到封鎖所有消息同消滅全部證據,認為只係一個假傳聞。

如果樂園而家承認曾經發生意外,並且設有售票探險隊會唔會殺出另一條新出路呢🤪

文: 南。誌Southern Stories