相信好多人都患上咗旅行渴望症,暫時未去得住,就喺香港搵吓特色景點幻想吓先啦! 細心發掘,其實香港好多地方都好靚,尤其鍾意去日本嘅大家,依家一於近近地,喺香港市區先來一趟偽日本快閃旅行!今次就帶大家睇吓兩個充滿日式庭院味道嘅打卡好地方啦!

注意:打卡唔好太忘形,保持地方安靜,好好愛護環境,自己垃圾自己帶走,注意個人衞生,戴好口罩!


南蓮園池

位於鑽石山,有一個環境清幽、古色古香嘅園林——南蓮園池,就好似一片凈土座落於市區鬧市入面。整個南蓮園池佔地3.5公頃,屬於志蓮凈苑南院部分,公園使用咗唐代設計配合特色木結構,園內放置咗大量古樹以及奇石,具有中國唐朝古風之餘仲有淡淡日式庭院風味。

水車磨坊旁邊設有石凳可供休息,靜賞美景。
圖片: Instagram @sophia_enjoythelittlethings

呈八角形嘅「圓滿閣」喺南蓮園池嘅主題景點,金光閃閃猶如日本京都嘅金閣寺。
圖片: Instagram @sophia_enjoythelittlethings

慢步園內,除咗欣賞優美園景,不時仲會聽到園內播放住舒適嘅背景音樂及鳥聲,頓時有種洗滌心靈嘅感覺。如此清靜嘅地方,建議大家打卡之餘,更可以放慢腳步細心欣賞環境。園內更設有茶館、紀念品小賣店及素菜館,唔少遊人都會選擇遊園後享用一餐素菜先離開㗎。

圖片: Instagram @pcyf

志蓮凈苑屬於佛門清靜莊嚴之地,請尊重場合,切勿喧嘩,亦建議穿著莊重。園內擺設咗唔少盆景,公園內周圍都有唔少奇石,大家謹記切勿觸碰以及攀爬,注意安全之外都要愛護公園內設施,讓每一個遊人都有權利欣賞到最美嘅景色。


松茶榭喺園內嘅茶館,整個建築周圍山石林立,位於蒼塘北岸,景色優美,有種空中樓閣嘅感覺。

位於水車磨坊旁邊有個小型瀑布, 氣勢磅礡,流水聲非常療癒。

地點: 九龍黃大仙鑽石山鳳德道60號
前往方法: 港鐵鑽石山站C2出口
開放時間: 7am - 9pm


天后廟道3號休憩公園

圖片: Instagram @bluebluebluekwan

喺天后廟道有一個隱秘景點,由炮台山配水庫向上行,大約15分鐘路程,會到達一個小公園,裡面就藏有一個迷你嘅日式庭園。雖然地方比較細,但都總算喺有齊日式庭園主要佈置,例如有和式屏風及竹製屋頂、竹筒流水裝置(留意是沒有流水的呢)、日式石燈籠、小橋等等,都算喺麻雀雖小,五臟俱全。

圖片: Instagram @yannaho

去完打卡,仲可以沿寶馬山行埋上紅香爐峰山頂,180度睇晒成個維港海景,夠晒靚景啊!再加上都幾容易行,大約15至20分鐘就可以到達,新手行山都可以去挑戰吓。

地點: 天后廟道70號(近北角官立小學)
前往方法:
1)炮台山地鐵站A出口旁邊乘升降機/行樓梯沿炮台山道往上行,到達天后廟道交界過對面馬路即到達。
2)於天后地鐵站 巴士總站 乘搭49M小巴緊或25號巴士


撰文: HL
編輯:Athena