YouTube video


農曆新年期間,成日會聽到「犯太歲」、「拜太歲」、「攝太歲」呢啲字眼。咁究竟太歲係乜呢?

其實太歲本身喺中國古代嘅天文同占星學裡面只係一粒同木星運行軌道相同不過方向相反嘅虛星,之後先慢慢演變成一種道教同民間信仰嘅神祇。而家所講嘅太歲,係六十位法相唔同嘅太歲將軍統稱,喺十天干同十二地支嘅循環相配下,由甲子做開始,癸亥為終結,以六十年作為一個循環,而太歲將軍正正係與六十甲子相對應嘅本命神祇,佢哋會輪流掌管人間禍福,去到嗰一年嘅當值者就係「值年太歲」。

所以根據以上嘅講法,2022 年係壬寅年,今年嘅「值年太歲」就係賀諤大將軍~

犯太歲
講完太歲係乜,就講下「犯太歲」。傳統認為一個人嘅出生同太歲所在嘅辰宿會有沖犯,如果個人生肖同嗰年嘅流年太歲有不合,就稱為「犯太歲」。以運程嚟講,「犯太歲」嘅人喺嗰年通常比較多阻礙,身體健康同情緒方面都會容易出現問題,不過有時「犯太歲」都未必會運滯嘅。


2022 年嘅代表生肖係虎,所以屬虎嘅朋友,今年就係本命年「犯太歲」,亦叫「值太歲」,各方面都需要小心謹慎,同時都要注意返自己嘅健康。

另外,「犯太歲」當中又可細分為以下幾種:


.刑太歲:出生年份同流年生肖相差三年,稱為「三刑」。當中嘅「刑」可以係指惹上麻煩,甚至官非訴訟,或者係傷災病痛。
2022 年遇上「刑太歲」嘅生肖係蛇,屬蛇嘅朋友最好就低調做事,並且唔好被情緒影響,避免同其他人發生衝突。

.害太歲:「害」喺呢度嘅意思,係指被他人侵害(陷害),或者係容易同他人不和。
而 2022 年遇上「害太歲」嘅生肖亦係蛇,所以屬蛇嘅朋友除咗低調再低調,亦需要謹言慎行。


.破太歲:「破」嘅字面意思係破壞,可以係破財、破壞健康,或者係破壞人際關係。
2022 年遇上「破太歲」嘅生肖係豬,人際關係有可能出現唔好嘅變化,所以屬豬嘅朋友都需要注意言行,以免禍從口出。


.沖太歲:出生年份同流年嘅生肖相差六年,稱為「六衝」。另外亦有衝撞、衝擊之意。
2022 年遇上「沖太歲」嘅生肖係猴,今年容易出現一啲人生中重大嘅變動,所以屬猴嘅朋友如果有喜事,例如係結婚生仔,都會對運勢有所幫助。

喺玄學 / 風水命理角度,都會請「犯太歲」嘅人,配合返不同生肖,配戴各種唔同嘅飾物 / 配搭衣著顏色 / 擺設,以催吉避凶。


拜太歲
該年有「犯太歲」嘅固然可以透過「拜太歲」嚟改善運勢,不過冇「犯太歲」嘅人其實都可以就咁去「拜太歲」以求一年平安順利。

全香港有唔少可以畀市民「拜太歲」嘅地點,當中嘅熱門地點大約整理如下:

港島區:大坑蓮花宮、灣仔玉虛宮 (北帝廟)、上環水月宮 (旁邊有太歲廟)、鴨脷洲洪聖古廟、荷李活道文武廟、灣仔洪聖廟及筲箕灣東大街天后廟
九龍區:旺角山東街水月宮、紅磡觀音廟、油麻地天后廟、深水埗天后廟、深水埗三太子及北帝廟、嗇色園黃大仙祠、省善真堂及油麻地天后廟
新界區:沙田車公廟、青松觀 (屯門祖觀)、蓬瀛仙館及圓玄學院
離島區:關帝古廟及長洲玉虛宮 (北帝廟)

新春祈福寺廟特別開放時間 2022
>>>>更多詳情:https://timable.com/event/2111913 <<<<

「拜太歲」方法:
1. 入內前要先預備香燭同買太歲衣
2. 按照太歲衣紙上嘅說明,填寫姓名、出生年月日、生肖等資料
3. 先向六十太歲嘅統領上香 (如果係去黃大仙祠 / 蓬瀛仙館 / 圓玄學院嘅元辰殿「拜太歲」,就係先參拜眾星之母—斗姥元君)
4. 到值年太歲上香及祈福許願
5. 拜自己出生年份嘅太歲 (即係本命元辰),並向其餘 58 位太歲逐一上香
6. 拜過太歲後,再去化太歲衣

經過以上步驟,就完成晒成個「拜太歲」儀式。

注意:
*「拜太歲」嘅時候,要心平氣和,並以誠懇恭敬嘅態度進行成個儀式。
* 女士最好唔好著得暴露,低胸衫同短褲呢啲就留返普通出街再著啦。
* 如果係去一啲唔能夠攞香燭入內嘅地點「拜太歲」,通常都會喺外面香爐先上香,而入去向太歲上香呢個動作就可改為參拜。當然唔同地點有唔同做法,如果唔熟悉,就請尋求嗰度嘅職員協助。
* 記住「先還後拜」—當前一年有拜過太歲,要還咗嗰一年嘅太歲 (最好係該年嘅冬至前),先再拜下一年嘅太歲!否則會行衰運,甚至持續到下一年!


攝太歲
「攝太歲」,係古人喺「拜太歲」嗰陣,將香油金攝喺太歲像下,久而久之形成嘅一個習俗。不過現代人就習慣將呢樣同「拜太歲」視作同一樣嘢。有玄術師傅話,「拜太歲」同「攝太歲」嘅分別在於「攝太歲」係會將太歲嘅能量、旺氣化為己用,比只係「拜」更為有用。

「攝太歲」吉日吉時如下:
2022 年 2 月 4 日(星期五,正月初四)早上 7 點至 11 點|呢日同屬馬嘅朋友相沖,不宜前往。
2022 年 2 月 10 日(星期四,正月初十)下午 1 點至 3 點|呢日同屬鼠嘅朋友相沖,不宜前往。
2022 年 2 月 22 日(星期二,正月廿二)早上 9 點至下午 1 點|呢日同屬鼠嘅朋友相沖,不宜前往。

坊間普通「攝太歲」同「拜太歲」方法大致相同,多數都會連埋一啲好意頭嘅祭品,例如蘋果、柑、碌柚等生果,最後化完太歲衣,記得要去求一張「化太歲符」並隨身攜帶,用嚟祈求新一年平安順利。

有啲寺廟最後會將「攝太歲」者所填寫嘅資料壓喺太歲像下,完成「攝太歲」儀式。

* 注意事項同「拜太歲」一樣。


還太歲
太歲都係需要還的!重要嘅事情都要講多次,上一年有拜過或攝過太歲嘅人,記住要還咗太歲先再去拜新一年嘅太歲呀!

「還太歲」最好就喺冬至後至下一年嘅立春前完成,不過亦有人會喺同一日先「還太歲」,再去拜 / 攝太歲。

「還太歲」方法:
1. 同「拜太歲」一樣,首先都需要準備太歲衣、香燭和祭品 (包括生果、糖果同鮮花)
2. 喺酬謝疏文「信士」寫上還太歲者嘅姓名同農曆出生年月日
3. 入到去先參拜六十太歲嘅統領 (如果係去黃大仙祠 / 蓬瀛仙館 / 圓玄學院嘅元辰殿「拜太歲」,就係先參拜眾星之母—斗姥元君),然後將祭品放喺需要酬謝嘅大神同太歲面前
4. 向太歲鞠躬三拜上香
5. 參拜上年(即係牛年)太歲後,宣讀酬謝疏文
6. 參拜「還太歲」者嘅「當生太歲」(即係「還太歲」者自己生肖所屬嘅太歲,亦即本命元辰)
7. 拜完所有太歲後,將酬謝疏文同太歲衣拎去化

經過以上步驟,就完成晒成個「還太歲」儀式。

注意:
* 如果唔能夠親自去「還太歲」,可以搵親友代勞。
* 「拜太歲」/「攝太歲」同「還太歲」嘅地點唔同都唔緊要。
* 同「拜太歲」一樣,就算冇「犯太歲」或者需要還返上一年嘅太歲,都可以「還太歲」去酬謝神明。

問:如果喺屋企「還太歲」又得唔得?
答:係得嘅:用紅紙寫上「酬謝當年太歲」或者用太歲符擺喺屋企神壇供奉嘅大神旁邊;冇神壇都唔緊要,將紅紙放喺紅檯上面,簡單放置返一個香爐供奉就可以了。

祝大家虎年一切順利!


撰文:小薯仔
資料來源:華人廟宇委員會網站、圓玄學院網站、蓬瀛仙館網站、司徒法基師傅網站、維基百科及網上資料
圖片來源:unsplash、pexels


【農曆新年2022】農曆新年習俗禁忌懶人包 一文整理過年宜忌!初一最易犯呢啲 初五先可以掃地
>>>>更多詳情:https://timable.com/blog/2122407 <<<<

【農曆新年2022】麥玲玲十二生肖2022虎年運程全面睇 一文睇哂整體運勢 (虎兔龍蛇篇)
>>>>更多詳情:https://timable.com/blog/2113373 <<<<
【農曆新年2022】麥玲玲十二生肖2022虎年運程全面睇 一文睇哂整體運勢 (馬羊猴雞篇)
>>>>更多詳情:https://timable.com/blog/2117433 <<<<
【農曆新年2022】麥玲玲十二生肖2022虎年運程全面睇 一文睇哂整體運勢 (狗豬鼠牛篇)
>>>>更多詳情:https://timable.com/blog/2117434 <<<<

無咗年宵花市點算好?2022香港買年花好去處:
>>>>更多詳情:https://timable.com/blog/2122873 <<<<

12款傳統常見年花寓意懶人包
>>>>更多詳情:https://timable.com/blog/2123024 <<<<

【新年禮盒2022】拜年送禮送咩好?8間本地良心店賀年禮盒推介|手工曲奇蝴蝶酥/台灣鳳梨酥/自家製湯包
>>>>更多詳情:https://timable.com/blog/2123462 <<<<

【新年糕點2022】不斷更新!10間良心小店賀年糕點推介 傳統/創新口味/台灣特色糕點​
>>>>更多詳情:https://timable.com/blog/2117061 <<<<

【新春團年盆菜2022】不斷更新!10間本地良心小店及酒店盆菜合集​
>>>>更多詳情:https://timable.com/blog/2117840 <<<<

【新春賀年糕點2022】早鳥優惠!10間酒店新年美食推介 年糕/盆菜/禮盒合集​
>>>>更多詳情:https://timable.com/blog/2111483 <<<<

【農曆新年2022】超齊全!虎年新春主題香港口罩合集 內附訂購連結
>>>>更多詳情:https://timable.com/blog/2119375 <<<<

【新年好去處2022】虎年親子/拍拖打卡玩樂推介+雞肋位|新年手作年宵市集美食合集
>>>>更多詳情:https://timable.com/blog/2117500 <<<<

【農曆新年2022】熱門新春主題工作坊 達摩陶瓷體驗 家庭樂必玩和諧粉彩
>>>>更多詳情:https://timable.com/blog/2120335 ​<<<<


Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下載Timable App,隨時隨地捕捉本地活動資訊
iOS/Android:https://bit.ly/timable_app