YouTube video


上個星期 ViuTV 嘅《IT 狗》迎嚟咗大結局,唔少人都想佢開續集,可以繼續睇幾位主演點樣搞 "PayPayDuck"。《IT 狗》有冇續集都仲言之尚早,因為自 2016 年開台以嚟, ViuTV 製作咗唔少原創劇集,而當中有開續集 / 特別篇嘅劇集就比較少。不過由一班年輕演員擔綱演出, 2020 年 3 月開播後大獲好評又叫好叫座嘅《二月廿九》,就成為咗成功開拍續集嘅其中一套!


《二月廿九》本身係一套 10 集嘅科幻愛情劇,故事講述喺 4 年先會出現一次嘅 2 月 29 號出世嘅女主角張麗紗 (Yeesa,由吳海昕飾演),喺 2017 年 2 月 28 號為自己慶祝生日,而當晚 11 點 59 分嗰刻,佢竟然穿越咗時空,去到 3 年後,天寒地凍嘅北海道,過程中仲遇上咗同佢命運相纏嘅兩個男人—馬智浩 (Ryan,由徐天佑飾演) 同埋余家聰 (會長,由劉俊謙飾演),最奇怪係呢兩個男人都聲稱同 Yeesa 係相識嘅!過咗 24 小時之後,Yeesa 穿越返香港,發現現實其實只係過咗一秒鐘,而且對自己嘅穿越能力更加不由自主,甚至竟然喺現實重新認識 Ryan 同會長,開啟咗轉動嘅命運齒輪……


呢套劇當年真係去咗北海道拍外景㗎!除咗劇情有追看性,個景亦令到唔少觀眾睇完都好想去!


而《940920》就係《二月廿九》嘅真‧續集,預計都會有 10 集!喺前作飾演會長嘅劉俊謙同飾演 Yeesa 嘅吳海昕其實喺 2020 年 10 月已經喺自己社交平台上載咗一條預告片,話畀大家知《940920》將會繼續由黃智揚擔任編審,羅嘉駿執導,並會承接《二月廿九》嘅世界觀,主角將喺平行時空下發展新一段奇幻冒險之旅。嗰陣仲話已經進入咗劇本撰寫階段,期望可以喺 2021 年春季順利喺香港同台灣開拍。最後就大家都知道,因為疫情持續,劇組去唔到台灣進行拍攝,所以就變咗全部景都係喺香港拍~

兩位演員當時喺預告片嘅 caption 中仲有提到「由吳海昕、劉俊謙及蔡思韵主演」。咦?有睇過《二月廿九》嘅觀眾,或者只係睇咗上面故事簡介,應該睇得出呢句介紹主角嘅句子,有一個人唔同咗—飾演 Ryan 嘅徐天佑唔見咗,新加入咗蔡思韵。之前監製兼導演羅嘉駿接受訪問時有提過,原來 Ryan 呢條線喺《940920》並唔係主線。不過一日劇集未出街,一日都唔知成個故事嘅走向~已知嘅就只有《940920》係圍繞住兩個時空互相交織所發生嘅故事。

通常一套劇集或者電影開拍續集,都好常見到個名係《乜乜乜 2》,但係點解延續《二月廿九》嘅故事會叫《940920》呢?呢個真係要有睇過嘅人先會知道—「940920」係 Yeesa 第一次穿越去 2020 年嘅北海道嗰陣,會長畀 Yeesa 嘅密碼,同時亦係會長媽媽嘅死忌嚟。

本身《940920》會喺 2 月 28 號首播,不過導演前排就喺自己社交媒體上表示,雖然後期進度良好,但係排唔到喺 2 月 28 號呢個期上,所以會延後一個星期,即係 3 月 7 號播!(時間都出埋了:逢星期一至五夜晚 9 點半!)

講咗咁多,不如趁呢個時間嚟重溫下《二月廿九》一啲主要角色嘅簡介:


張麗紗 (Yeesa)|吳海昕 (Sofiee) 飾演
演員 IG:https://www.instagram.com/sofiee_ng
Yeesa 係港日混血兒,1992 年 2 月 29 日喺日本札幌護國神社出世,媽媽喺生咗佢之後就難產而死。分別喺 2017、2018、2019 年 2 月 28 日三度穿越,而呢三次嘅穿越都令佢知道咗一啲唔同嘅事,例如知道自己係會遇到車禍同埋點解會遇到車禍。喺 2020 年 2 月 29 日因為有唔同時空嘅自己多次阻撓香川二郎呢個為咗個仔賺醫藥費嘅送貨司機,而遇上車禍,Ryan 為咗救佢而死,佢想犧牲自己救返 Ryan,最後成功穿越返去 2020 年 2 月 29 日夜晚大約 9:30 左右,不過今次就變咗會長為佢犧牲自己條命。而佢喺 2021 年 2 月 28 醒返,發現只有自己仲存有對會長嘅記憶。

喺《940920》嘅故事,Yeesa 就會去到另一個新時空,當然亦會發生好多事,佢究竟會唔會返去呢?又會唔會同呢個時空嘅 Ryan 同會長發生啲咩事呢?


余家聰 (會長)|劉俊謙 (Terrance) 飾演
演員 IG:https://www.instagram.com/lauchunhim.terrance
余家聰係神聖幾何學會嘅會長,亦係一位哲學博士。喺 2020 年 2 月 29 日嘅北海道救返被警察追捕嘅 Yeesa,並且自稱係佢男友。喺 Yeesa 為咗救 Ryan 而進行第四次穿越期間,就代替希望犧牲自己嘅 Yeesa 被香川二郎撞死。最後因為歷史嘅改變,佢變成咗一位作家,仲出咗一本叫《二月廿九》嘅小說,然而佢已經失去所有對會長呢個身分同經歷嘅記憶,亦唔再認識 Yeesa。

而佢亦係知道 Yeesa 每年 2 月 28 日可以有 24 小時穿越能力嘅人。

不過嚟到《940920》嘅平行時空下,佢就變成咗主體,仲會同新加入嘅蔡思韵所飾演嘅林楚凝有所交集!究竟點解佢會變咗神聖幾何學會嘅會長?同 Yeesa 又會有咩?


馬智浩 (Ryan)|徐天佑 飾演
演員 IG:https://www.instagram.com/Chuihammer
Ryan 本身係喺超級市場工作嘅壽司師傅,之後辭職轉咗去一間壽司店做學徒。喺 2020 年 2 月 29 日,日本時間 00:00 嘅北海道救返差啲被電車撞倒嘅 Yeesa,不過同日夜晚當佢送受傷嘅 Yeesa 去醫院嗰陣,就畀香川二郎撞死,最後喺 Yeesa 為咗救佢第四次穿越時,就由會長代替咗佢犧牲。

由於劇中 Ryan 經常默默守護住 Yeesa,所以當時有份追劇嘅網民,就幫佢改咗個外號叫「兵佑」。

上面提及導演講過《940920》裡面 Ryan 唔會係主線,唔知真正出街嗰陣,喺新嘅平行時空下,佢同 Yeesa 又會唔會有新嘅發展呢?

而演員徐天佑除咗飾演主角之一外,仲為《二月廿九》創作咗插曲〈四年一遇〉,一手包辦主唱/作曲/作詞/編曲/歌曲監製。希望《940920》都會有佢創作嘅歌曲啦!



《940920》新角色
林楚凝|蔡思韵 (Cecilia) 飾演

演員 IG:https://www.instagram.com/ceciliachoii
當大家都以為神聖幾何學會係余家聰創立嘅時候,《940920》話你知,其實林楚凝先係呢個神聖幾何學會嘅創立人兼會長,仲收咗余家聰做第一個會員。

佢究竟係咩人?佢同余家聰會有啲咩「瓜葛」?點解佢又會無啦啦將會長呢個位交畀余家聰?如果同小薯仔一樣,成個腦都充滿疑問,咁就一定要留意播出後嘅劇情發展!


一位大家都非常熟悉嘅資深演員—余子明 (即係以前喺《封神榜》飾演姜子牙嗰位),都有份參與拍攝!雖然未知佢喺劇中飾演咩角色,但係對觀眾嚟講,都係充滿新鮮感嘅陣容!

相信大家同小薯仔一樣都非常期待劇集播出,如果想喚醒返自己對劇情同角色嘅記憶,都可以喺《940920》播出前,睇返《二月廿九》先:https://viu.tv/encore/leap-day

注意:已更新劇集嘅真正預告!


撰文:小薯仔
資料來源:ViuTV《二月廿九》劇集重溫頁面、維基百科及各媒體報導
照片來源:ViuTV《二月廿九》劇集重溫頁面、劉俊謙 Facebook 上載之預告片截圖、吳海昕 Facebook、劉俊謙 、徐天佑、蔡思韵、羅嘉駿、@yeesa_cheung Instagram


延伸閱讀:
【睇電視2022】ViuTV 新劇《反起跑線聯盟》3月21日開播!
https://timable.com/zh-hk/blog/2147764

【睇電視2022】ViuTV 籃球劇《季前賽》睇MIRROR同ERROR喺球場上揮灑汗水!
https://timable.com//zh-hk/blog/2128581

【睇電視2022】新運動劇《i.SWIM》繼續青春熱血!
https://timable.com/zh-hk/blog/2126092

【Call For COLLAR】《全民造星IV》女團正式出道
https://timable.com/zh-hk/blog/2119980


Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下載Timable App,隨時隨地捕捉本地活動資訊
iOS/Android:https://bit.ly/timable_app