【睇電視2022】ViuTV 新運動劇《I SWIM》繼續青春熱血！7月11日開播！

講起以游水呢項運動作為劇集題材，有返咁上下電視資歷嘅觀眾，相信第一時間諗起一個非常出名嘅「經典招式」叫「破冰轉身」。而 ViuTV 嚟緊套新嘅運動劇《I SWIM》有冇呢招，小薯仔就唔知啦，不過可以肯定嘅係，有人氣偶像同佢哋嘅身材，又有青春、熱血、校園呢啲元素，應該都會吸引到唔少人收睇嘅。


《I SWIM》係講述兩個年青嘅泳手，喺游泳賽場上亦師、亦敵、亦友，展開咗一場「天賦」與「努力」嘅較量，而呢場較量亦伸延到佢哋嘅人生旅途上。

其實呢套劇集係改編自導演馮志強嘅經歷。馮導演 2020 年因為疫情 "Stay Home"，所以決定喺自己嘅社交平台上將收埋多年嘅故事寫出嚟，於是就開始連載一篇叫《I, SWIM》嘅小說，並以每星期兩章為目標嚟逼自己完成。去到 2021 年嘅夏天，ViuTV 決定將呢篇小說拍成一套 10 集嘅電視劇，由佢親自執導同編劇。唔講唔知，《I SWIM》係佢第一套做導演嘅電視劇。佢本身係編劇，作品中都有好多大家睇過聽過嘅劇集同電影，例如有《創世紀》、《少林足球》、《每當變幻時》、《文雀》、《美人魚》等；2012 年嘅《懸紅》係佢執導嘅第一部電影，之後嘅電影作品包括《大樂師．為愛配樂》同《犯罪現場》等。


劇集喺 2021 年 8 月已經開拍，不過有段時間因為要配合場地租用嘅問題，仲有遷就演員檔期，所以停拍咗一段日子，最後喺同年 11 月煞科！一眾演員都有講過話當時嘅水溫已經好凍，好彩喺天氣再凍啲前就已經煞科！而大部份男演員都因為需要應付裸露上身嘅游水戲份，喺拍攝前就已經開始控制飲食同不斷健身！

2022 年 6 月 20 日更新：《I SWIM》將會喺 2022 年 7 月 11 日，晚上 9:30，ViuTV 首播！

講咗咁耐，係時候去睇下呢套劇集一啲主要角色嘅簡介：


李馬榮 (榮仔)｜MIRROR 成員呂爵安 (Edan) 飾演
演員 IG：https://www.instagram.com/edanlui
榮仔係啟賢中學中四 C 班嘅學生，亦係班上嘅泳隊接力隊長，隸屬於四社中嘅博社。

三歲就開始學游水，無論係需要好高技巧嘅蝶式、要喺水裡面開始嘅背泳、需要手腳同呼吸配合再划水前進嘅蛙式，定係速度最快嘅捷泳 (自由式)，佢都樣樣精通。

同 A 班嘅黃亞樂，仲有羅力森都係勁敵嚟！

不過現實中，Edan 就曾經喺自己嘅 IG live 中透露，佢雖然識游水但游得唔叻，同劇中榮仔對所有泳式都無一不精有分別！


余浪沖 (余仔)｜魏浚笙 (Jeffrey) 飾演
演員 IG：https://www.instagram.com/jeffreyngai
天才泳手余仔係啟賢中學中四 C 班嘅轉學生，亦係班上嘅泳隊接力隊員，同榮仔一樣都隸屬於四社中嘅博社，之後更加入咗學校嘅游泳校隊。

喺小說中，馮導演就係用「余浪沖」(我) 作為第一人稱出發，去展開呢個故事，亦唔係轉校生，甚至余仔係小學六年級因為要參加學校嘅強制興趣班先開始學游水，之後發掘到對游水嘅天賦。


黃亞樂｜MIRROR 成員邱士縉 (Stanley) 飾演
演員 IG：https://www.instagram.com/stanleysc_
黃亞樂係啟賢中學中四 A 班嘅學生，係班上嘅游泳接力隊隊長，亦係學校嘅「男飛魚」。

榮仔專攻游水，而黃亞樂就係運動能手，唔止係校內嘅明星級泳手，仲係田徑、足球同排球呢啲運動嘅獎牌常客！亦係榮仔嘅勁敵，因為佢之前一直帶住 A 班嘅游泳接力隊打嬴 C 班～

其實小說中嘅黃亞樂，係「師兄」嚟，比其他人高一級㗎。


其他啟賢中學嘅中四 C 班同學仔兼班上泳隊隊員 (左：班長｜中：程子帆｜右：何大秋)
簡雲長 (班長)｜P1X3L 成員吳啟洋 (Phoebus) 飾演
演員 IG：https://www.instagram.com/phoebus_ng
班長故名思義，就係字面上嘅意思，C 班班長，亦係余仔嘅小學同學。

喺小說裡面，班長同余仔由幼稚園開始已經識，正宗嘅由細玩到大～仲會拉余仔去「試」唔同嘅嘢！
最初佢同余仔有個非正式嘅游水比賽，不過輸咗畀余仔。係喺呢次過後，兩個人先真正變成熟悉嘅朋友。

程子帆 (阿帆)｜王智騫 (Martin) 飾演
演員 IG：https://www.instagram.com/mar.tin.wong
阿帆嘅游水風格，同佢個人一樣，可以用個「穩」字嚟形容。

同時佢亦係「人肉 wiki」，由教科書內容到日常冷知識都難唔到佢～

何大秋 (九全 / 大秋)｜P1X3L 成員歐鎮灝 (George) 飾演
演員 IG：https://www.instagram.com/georgeau.8
自稱愛情專家，最想做嘅嘢，就係結識天下女生。


翁學千 (Miss 翁)｜吳海昕 (Sofiee) 飾演
演員 IG：https://www.instagram.com/sofiee_ng
Miss 翁係啟賢中學中四 C 班嘅班主任，負責帶泳隊出戰游水比賽。


羅力森 (Lawson)｜MIRROR 成員王智德 (Alton) 飾演
演員 IG：https://www.instagram.com/altonwongz
羅力森同黃亞樂一樣，都係啟賢中學中四 A 班嘅學生，亦係呢班嘅泳隊隊員兼榮仔勁敵！

雖然同黃亞樂係 Friend，不過希望有日可以超越佢成為飛魚！

楊仕福｜P1X3L 成員葉振弘 (Marco) 飾演
演員 IG：https://www.instagram.com/imarco_p1x3l
楊仕福亦係啟賢中學中四 A 班嘅學生，都係呢班嘅泳隊隊員兼榮仔勁敵。

但係因為佢好易畀挫折打低，所以往往都成為咗 C 班嘅攻擊目標。


章浩｜Ansonbean (陳毅燊) 飾演
演員 IG：https://www.instagram.com/ansonbean
章浩嘅身份暫時非常神秘，而家只知佢就係喺宣傳片同余仔「下戰書」嗰位～唔知佢同啟賢中學嘅學生有咩瓜葛呢？

相信大家同小薯仔一樣，都對呢個陣容拍出嚟嘅成品有所期待！在此之前，如果想多啲了解呢個故事，可以去導演 IG 上面嘅限時動態精選睇返連載小說版：
《I, SWIM》小說 (上)
https://www.instagram.com/stories/highlights/17857189045892550/

《I, SWIM》小說 (下)
https://www.instagram.com/stories/highlights/17903468542520024/

未睇到游水，想睇下其他運動劇感受返嗰股熱血？小薯仔都搵咗兩套同樣係 ViuTV 出品嘅：
空手道 - 《打天下》：https://viu.tv/encore/warriors-within
男子排球 - 《男排女將》：https://viu.tv/encore/we-are-the-littles

注意：呢篇文章所放出嘅片段，只係 2021 年嘅《ViuTV 2022》上所播出嘅宣傳片段，並未係劇集嘅真正預告。當真正預告釋出嘅時候就會更新返。


撰文：小薯仔
資料來源：維基百科、馮志強 Instagram 及媒體報導
照片來源：ViuTV YouTube 上載之宣傳片截圖；呂爵安、魏浚笙、邱士縉、王智德、吳啟洋、歐鎮灝、王智騫及吳海昕 Instagram；MakerVille 網站《I SWIM》頁面

---

延伸閱讀：
【睇電視2022】ViuTV 新劇《反起跑線聯盟》3月21日開播！
https://timable.com/zh-hk/blog/2147764

【睇電視2022】ViuTV 籃球劇《季前賽》睇MIRROR同ERROR喺球場上揮灑汗水！
https://timable.com//zh-hk/blog/2128581

【睇電視2022】ViuTV《二月廿九》續集《940920》3月7日開播！
https://timable.com/zh-hk/blog/2125672

【Call For COLLAR】《全民造星IV》女團正式出道
https://timable.com/zh-hk/blog/2119980


Follow埋Timable FB同IG
FB：https://www.facebook.com/timable.hk
IG：https://www.instagram.com/timable/

立即下載Timable App，隨時隨地捕捉本地活動資訊
iOS/Android：https://bit.ly/timable_app