【睇電視2022】ViuTV 籃球劇《季前賽》10月24日開播！睇MIRROR同ERROR喺球場上揮灑汗水！

籃球都可算係其中一種比較常見嘅運動劇題材，只係講亞洲地區都可以諗起好幾套，相信亦係唔少人嘅青春影視回憶。而嚟到 2022 年，ViuTV 除咗游水劇《i.SWIM》之外，都會有套新嘅籃球劇—用街頭籃球做主線嘅《季前賽》。

《季前賽》由電影 / 廣告導演袁劍偉執導 (袁導演亦兼任埋呢套劇嘅編審)，全劇共有 15 集。以姜濤嘅成長故事做藍本，主要講述 3 個熱愛籃球嘅男仔—高家孝 (由姜濤飾演)、關浩德 (由呂爵安飾演) 同張智良 (由邱士縉飾演) 因為各自唔同嘅原因放棄咗籃球。

一次香港首屈一指嘅大學籃球隊 B 隊掃場事件，佢哋 3 個都畀喪波 (由張繼聰飾演) 臨時拉伕加入去「守護街場」，仲合力「趕走」咗 B 隊球員。不過由卓立鋒 (由陳卓賢飾演) 帶領嘅大學籃球隊 A 隊知道呢件事後，當然唔甘心，於是成班隊員去「踩場」，而且今次仲成功「復仇」！最後為咗面子，兩邊就立咗個「兩個月之約」，約定再對戰，到時邊隊輸咗就裸跑。

呢件事後，令大家慢慢重拾返籃球夢，而喪波就做咗佢哋嘅教練，仲搵埋朱昆潤 (由梁業飾演) 同楊舜光 (由 193 飾演) 加入。呢 5 個人，再加個教練，就去挑戰全港各區嘅大小街場，亦逐漸令呢隊「雜牌軍」變成有組織嘅正規籃球隊。

拍運動劇嘅演員就未必個個都有玩開嗰項運動嘅，不過今次出演嘅大部份男性演員，據佢哋自己所講，每個人讀書時期都有打開波，甚至係而家成為咗藝人，都仍然有繼續打。當中姜濤同張繼聰都係眾所周知，鍾意打籃球嘅表表者，而 193 以前更加係南華籃球少年隊嘅一員！

劇集喺 10 月 24 日就出咗街，可以睇下以下一啲劇集角色嘅簡介：


痴漢籃球隊


高家孝 (阿孝)｜MIRROR 成員姜濤 飾演
演員 IG：https://www.instagram.com/keung_show
阿孝讀緊覺東中學嘅時候，係學校籃球隊隊員。幾年前嘅學界比賽，因為「投訴球證」令學校輸波，最後就自己主動離隊，再唔敢參與籃球比賽。喺投身社會後，成為咗快餐店店員，閒時都會一個人喺凌晨時段去籃球場打波。

賽場位置係控球後衛，擅長 Crossover、No Look Pass

有個細佬叫「老闆仔」，因為父母都唔喺身邊，所以就負起咗養育嘅責任。

而飾演呢個角色嘅姜濤本身就好鍾意打波，所以佢話會「寓工作於娛樂」～


關浩德｜MIRROR 成員呂爵安 (Edan) 飾演
演員 IG：https://www.instagram.com/edanlui
關浩德係一間體育用品嘅太子爺，有個好錫佢嘅爸爸同成日鬧佢又好煩嘅家姐，而興趣係唔做嘢，成日同兩個朋友 Richard 同 Joseph 去玩。

不過佢喺籃球場上都有強項㗎，就係射三分波，司職小前鋒。


張智良 (張良 / 阿良)｜MIRROR 成員邱士縉 (Stanley) 飾演
演員 IG：https://www.instagram.com/stanleysc_
張良係一位廣告服務客戶經理，已婚，有個女。佢為咗家庭努力工作，一段長時間放棄咗打籃球。

打中鋒嘅佢，擅長嘅籃球技術係 Dream Shake。


朱昆潤 (朱潤)｜ERROR 成員肥仔 (梁業) 飾演
演員 IG：https://www.instagram.com/fatboyip
朱潤係一位快餐店經理，同阿孝同埋佢細佬住埋一齊 (嚴格嚟講係租咗阿孝屋企嘅一間房)，亦係阿孝嘅中學同學。

佢喺籃球場上嘅身份係一名得分射手，自稱喺球隊裡面係靠「符碌」同運氣。


楊舜光 (光仔)｜ERROR 成員193 (郭嘉駿) 飾演
演員 IG：https://www.instagram.com/deniskwok193
光仔係個無業嘅廢青同埋釋囚，啱啱放監出嚟。

但係喺籃球場上，佢嘅身份就變咗一個大前鋒，負責搶籃板，「絕技」係 Trash Talk。


陳尚波 (喪波)｜張繼聰 (Louis) 飾演
演員 IG：https://www.instagram.com/louischeung2013
喪波雖然正職係一位小巴司機，但係其實佢以前係一個籃球高手嚟㗎！可惜歲月催人，佢條腰出咗問題，唔可以繼續打籃球。

成日都笑上面 5 個年輕人，有時又折磨下佢哋，不過見到佢哋好有潛質，於是乎就同佢哋組織咗呢隊球隊，仲發生咗好多熱血嘅故事～


翰林大學籃球隊


卓立鋒 (阿鋒)｜MIRROR 成員陳卓賢 (Ian) 飾演
演員 IG：https://www.instagram.com/iancychan
阿鋒係好典型嘅籃球精英，亦係好出名嘅大專籃球員。中學打學界，升到大學就打大專籃球比賽，係翰林大學籃球隊 A 隊隊長，都算已經半隻腳踏咗入職業聯賽。同阿孝係覺東中學籃球隊成員，但係不滿阿孝輸波後主動離隊。

而現實中，演員陳卓賢喺打排球並成為香港男子成年排球代表隊隊員前，其實係開始打籃球先嘅！當年佢讀書嘅時候，每日放學後都係先練完籃球，再練排球。不過後來發覺咁樣太攰，所以先專注打排球。

陳國秋 (阿秋)｜陳安立 (Brian) 飾演
演員 IG：https://www.instagram.com/bluebanana8
阿秋係卓立鋒「背後嘅男人」，係佢嘅好兄弟兼隊友。喺球隊裡面係相對比較成熟嘅一員，經常擔任「和事佬」嘅角色。

而演員陳安立以前同邱士縉係中學師兄弟，係校隊隊友之餘，兩個人亦有一齊打街場，佢而家都有加入藝人籃球隊㗎！

張仕南 (男神)｜P1X3L 成員吳啟洋 (Phoebus) 飾演
演員 IG：https://www.instagram.com/phoebus_ng
「男神」係個善良嘅球員。喺佢嘅世界入面，所有嘢都係粉紅色，好美好～

演員吳啟洋喺現實中，開始打手球，成為港隊 U16 手球代表隊成員前，佢其實都係開始打籃球先㗎！

其他角色
九姐｜練美娟 (娟姐 / Florica) 飾演
演員 IG：https://www.instagram.com/linkuen13
九姐係一位快餐店嘅總經理。處事認真，而且不平則鳴，工作上亦比較嚴厲。仲同朱潤有感情線㖭！

雖然劇裡面未必有佢打籃球嘅劇情，但係唔講唔知，喺現實，演員練美娟以前真係學校嘅籃球校隊隊員嚟！

關瑜欣 (關家姐)｜李敏 (Ranya) 飾演
演員 IG：https://www.instagram.com/ranyayaya
冇錯，關家姐就係關浩德嘅家姐。因為媽媽過咗身，身為長女同女強人嘅佢要負上照顧家庭 (爸爸同細佬) 嘅責任，所以個性比較硬朗，有時甚至會有啲心狠手辣。

因為細佬關浩德嘅唔長進，所以佢會成日都鬧細佬，對佢都好嚴格。

何瑪莉 (河馬)｜葛綽瑤 (Yoyo) 飾演
演員 IG：https://www.instagram.com/Yoyo_kot
河馬係一個就讀會計系嘅大學四年級學生，同時亦係球隊軍醫。
佢因為中學時收到阿孝畀佢嘅一盒豆奶，同時阿孝幫佢「趕走」咗蝦佢嘅同學，於是就瘋狂鍾意咗阿孝，幾年嚟都不斷搵佢。

究竟一路打開街場嘅球員，對上一直受正統籃球訓練嘅球員，會擦出咩火花呢？而街頭籃球隊嘅成員又會點樣磨合？一班人氣偶像喺劇中一齊打波又係點嘅樣？大家記住追到尾嘞！

睇完籃球未夠喉，想睇下其他運動劇感受返嗰股熱血同衝勁？小薯仔都搵咗兩套同樣係 ViuTV 出品嘅：
空手道 - 《打天下》：https://viu.tv/encore/warriors-within
男子排球 - 《男排女將》：https://viu.tv/encore/we-are-the-littles


撰文：小薯仔
資料來源：ViuTV《季前賽》記者會、維基百科及各媒體報導
照片來源：ViuTV、Brian 陳安立、張繼聰 Louis Cheung Facebook 及 Makerville 網站《季前賽》頁面

---

延伸閱讀：
【睇電視2022】ViuTV 新劇《反起跑線聯盟》3月21日開播！
https://timable.com/zh-hk/blog/2147764

【睇電視2022】ViuTV 新運動劇《i.SWIM》繼續青春熱血！
https://timable.com/zh-hk/blog/2126092

【睇電視2022】ViuTV《二月廿九》續集《940920》3月7日開播！
https://timable.com/zh-hk/blog/2125672

【Call For COLLAR】《全民造星IV》女團正式出道
https://timable.com/zh-hk/blog/2119980


Follow埋Timable FB同IG
FB：https://www.facebook.com/timable.hk
IG：https://www.instagram.com/timable/

立即下載Timable App，隨時隨地捕捉本地活動資訊
iOS/Android：https://bit.ly/timable_app