【睇YouTube】鄭中基YouTube 頻道「機動電視台 RTV」有咩睇？

講起鄭中基，你可能會諗起佢係一個歌手，唱過〈無賴〉、〈我代你哭〉、〈三生有幸〉，甚至〈死啦啲青春痘〉；你可能會諗起佢係一個演員，做過《行運超人》嘅「斷蟹」、《龍咁威》嘅「龍威」、《低俗喜劇》嘅「暴龍哥」，或者係近年電視劇《暖男爸爸》嘅「阿榮」；你又可能會諗起佢有執導過電影，甚至諗起佢係一位喺相片分享網站上好出名嘅攝影師。


但係而家，你諗起佢，可能會係佢嘅新身份—YouTuber。因為 2020 年 3 月開始，佢同經理人湘姐，以及助手 Stephanie 正式營運 YouTube 頻道「機動電視台 RTV」 (編按：其實真正開台係 2018 年 11 月，不過當時並唔活躍)，不定期上載唔同類型嘅影片，甚至開過網上直播，親自同一班「自機友」(頻道訂閱者名稱) 講下唱歌心得。

點解當初佢會想「轉型」做 YouTuber 呢？除咗係被湘姐「說服」外，之前接受媒體訪問時都有提到，佢本身都有睇開啲 YouTube 片，喺拍攝等埋位嘅空檔亦成日會睇到 YouTube 上有好多正嘅嘢，而佢自己又好鍾意拍嘢，所以都會諗如果有一個 YouTube 頻道的話會拍咩呢～喺各種因素驅使下，就令佢步入咗 YouTuber 行列。


喺 2021 年 8 月，YouTube 頻道達到 30 萬訂閱人數嘅時候，佢哋就喺海洋公園怡慶坊舉行咗一個免費嘅粉絲見面會，親自同被選中入場嘅「自機友」見面，報答佢哋嘅支持，而到今日將近兩年嘅時間，已經擁有超過 39 萬訂閱者，上載影片嘅總觀看次數亦超過 2 千 7 百萬次！應該都係藝人嘅 YouTube 頻道中，比較多人睇嘅其中之一。

有好多 YouTube 頻道都設有會員制，提供一啲福利同埋專屬影片內容畀月費訂閱會員。「機動電視台 RTV」都唔例外，喺上星期正式推行「自機友」會員制。如果希望了解更多，都可以去佢哋嘅社交平台睇返詳情～

講咗一大輪，相信大家都想知道呢個頻道究竟有咩片，小薯仔就精選咗以下系列：

[Hashtag] 匪夷所思系列
https://www.youtube.com/playlist?list=PLsWfvarU2fRKkwA-js2UsJMcW1L9S2emH
每次都會有特定主題，再請觀眾喺社交平台上就住該主題留言投稿。呢個系列其實可算係而家「機動電視台」嘅「皇牌」，最多人睇之餘，亦係最大迴響，同最多人覺得好笑嘅系列。

而喺讀出或者加啲演繹落投稿嘅同時，鄭中基都會分享佢自己同該次主題相關嘅一啲趣事 / 經歷。
(有時佢自己都忍唔住笑，所以佢都會叫人唔好食飯嗰陣睇，費事大家哽親咁話～)


一人一個學校之匪夷所思
https://www.youtube.com/watch?v=W8vd2ulZBGs
呢條片收集咗好多投稿人讀書時期，喺學校發生嘅好笑事，或者係真‧黑人問號嘅事。可以話係呢個系列嘅開端，亦係「機動電視台」第一條過 100 萬觀看次數嘅片。

一人一個學校之匪夷所思 PART 2
https://www.youtube.com/watch?v=k96rzrtdTMA
因為上面條片一推出嘅反應非常熱烈，亦好多人鍾意，所以佢哋再次以同一主題收集投稿，拍咗呢段 Part 2 出嚟。

有留意開鄭中基嘅人，應該已經習慣近年佢哋打招呼嘅方式係用「Wee」，但對於其他人可能就會有啲一頭霧水。其實「Wee」嘅出處正正就係呢條片嘅其中一個投稿，講投稿人嘅老師將「喂」讀咗做「Wee」。留言好多人，甚至佢哋自己都覺得呢個好好笑，講下講下，笑下笑下，最後就變成「機動電視台 RTV」仲有團隊嘅一個標誌。


一人一個拍拖之匪夷所思 Ft. 十萬個激嬲女友的理由
https://www.youtube.com/watch?v=k96rzrtdTMA
應該有冇另一半嘅人，睇呢條片都會覺得好笑！睇返片下面嘅留言，好多人都話係笑得最開心嘅情人節 (佢係 2021 年 2 月 14 日上載嘅)。

同時呢條片嘅片尾亦都新增咗一個小環節叫「啷讀 C 生暴龍哥」，鄭中基會以《低俗喜劇》角色「暴龍哥」所使用嘅廣西腔去讀一啲「潮文」。


一人一個婚禮之匪夷所思 crossover Ft. Pomato 小薯茄
https://www.youtube.com/watch?v=l3HsX7zDZuo
講咗拍拖，點都要講埋結婚嘅～

呢條片同其他匪夷所思系列片有啲分別 ：今次投稿唔係鄭中基坐喺度齋講，而係聯同另一個 YouTube 頻道「小薯茄」一齊做咗套短劇去呈現出嚟，亦係「機動電視台」嘅第一個短劇。

一人一個四大長老之匪夷所思
https://www.youtube.com/watch?v=-5TUWTbxb9Q
同爸爸媽媽一齊睇呢條片的話，唔知佢哋會係咩反應呢？


一人一個工人姐姐之匪夷所思
https://www.youtube.com/watch?v=NxVP_tMhfIw
相信屋企有工人姐姐嘅人，應該有時都唔太理解佢哋一啲行動 / 說話，繼而鬧出咗唔少笑料又或係無奈。而鄭中基喺呢條片都分享咗好幾個自己嘅經驗，仲好笑到令觀眾都想佢出一條片專講自己屋企嘅！

工人姐姐之匪夷所思 Part.2 爆笑回歸
https://www.youtube.com/watch?v=NhpU4lrZBc4
同「學校」主題一樣，因為第一條片太好反應，不斷 keep 住有人留言投稿講自己嘅工人姐姐，所以就再次用呢個主題拍 Part 2！佢哋仲話因為太好笑，搞到剪片都好難㖭呀！

呢條片到今日為止，其實只係出咗幾日，但係仍然係 YouTube 熱門嘅第 3 位，可見都好多人鍾意～

Reaction 系列
https://www.youtube.com/playlist?list=PLsWfvarU2fRI1GneuOn38dUVfS_azZ3sC
呢個就冇好似上面「匪夷所思系列」咁，有一個特定嘅關鍵字喺影片標題。不過話明叫 Reaction，所以鄭中基當然係會對某個主題作出反應，例如係聽人哋翻唱佢嘅歌、同團隊買一啲「無謂家品」返去做實測，同埋翻睇返自己嘅舊 MV 再講下同拍該 MV 當時嘅事。


聽你哋翻唱我啲歌 (上)
https://www.youtube.com/watch?v=tRyDbHl9VUM
聽你哋翻唱我啲歌 (下)
https://www.youtube.com/watch?v=inPq0w8FWY0
聽你哋翻唱我啲歌 #3
https://www.youtube.com/watch?v=EofCksN_Ffk
呢幾條聽人哋翻唱佢嘅歌再畀評語 (建議)，並分享一啲唱歌小心得嘅片，相對上會比較認真。而 #3 嗰條片中， MIRROR 成員陳卓賢 (Ian) 之前喺 MOOV Live 呢個活動中翻唱〈閉目入神〉嘅片段都有「入選」。

其他


2022 年新春特備節目
https://www.youtube.com/watch?v=EwkJjviFVto
佢哋有個叫 [DOFEST] 嘅系列，係以一啲節日為主題去拍嘅。而呢條就係今年農曆新年出，仲係全個團隊一齊出動。睇完真係笑到停唔到！裡面都有一個環節講下點應付一啲親戚會問嘅問題，可以睇定嚟留返下年用啊！

礙於篇幅所限，小薯仔冇辦法逐一介紹所有片，所以都只係揀咗啲比較多觀看次數，而且主觀上都幾鍾意嘅出嚟。如果大家對呢個 YouTube 頻道都有興趣，可以直接去 https://www.youtube.com/channel/UC7Zayxj2DitG-4C7JMUfd4w 收睇佢哋其他片。希望佢哋嚟緊都可以出更多其他類型嘅片啦！

另外附上頻道同主要成員嘅 IG
鄭中基：https://www.instagram.com/tinyeyes39
湘姐：https://www.instagram.com/sheung_sheung_sheung
Stephanie：https://www.instagram.com/mama.step
機動電視台 RTV：https://www.instagram.com/rtv_runningteam

注意：大部分影片都含有粗口，如果聽到粗口會打冷震，撳入去前記住要三思啊！


撰文：小薯仔
資料來源：網上資料及媒體訪問
照片來源：「機動電視台 RTV」YouTube 上載之影片截圖及社群；鄭中基 Instagram 及 Facebook


Follow埋Timable FB同IG
FB：https://www.facebook.com/timable.hk
IG：https://www.instagram.com/timable/

立即下載Timable App，隨時隨地捕捉本地活動資訊
iOS/Android：https://bit.ly/timable_app