【金像獎2022】今屆角逐各獎項嘅電影你睇過幾多？一文整理20套獲提名電影

香港電影金像獎由 1982 年開始舉行，去到今年已經嚟到第 40 屆。有人會問，2022 年唔係應該係第 41 屆咩？理論上係嘅，但係 2020 年 9 月金像獎大會就宣佈，因為疫情一直變化，戲院喺 2020 年大部分時間都未能夠正常營業，令到該年預期會上映嘅電影要大幅度延期，所以第40屆香港電影金像獎頒獎典禮就會順延去到 2022 年舉行。

而且今屆仲有個特別之處—本身符合金像獎參選資格嘅其中兩樣條件，係需要喺該屆頒獎禮舉行前一年嘅 1 月 1 日至 12 月 31 日香港作首輪公開售票放映，並連續 7 日內於 50 個座位以上嘅常規放映電影場地上映不少於 5 場嘅香港電影。但係正如上面提到，因為疫情關係，2020 年戲院關閉時間較長，然後好多電影都要延期上映，於是乎頒獎典順延之餘，2020 同 2021 年符合資格嘅大約 70 套電影都合併埋喺同一屆競逐。

咁金像獎嘅各個獎項又點決定入圍名單同最終得獎者呢？除咗屬於非常設獎項嘅「終身成就獎」同「專業精神獎」外，其餘 19 個獎項都會經 2 輪：第 1 輪會由已向香港電影金像獎協會登記而又被核實嘅合資格「香港電影金像獎選民」同「第一輪專業評審團」各佔 50% 嘅投票選出每個獎項嘅提名名單；第 2 輪就係由「第二輪專業評審團」、金像獎十四個屬會會員，聯同香港作曲家及作詞家協會會員選出得獎者。如果想了解更多評選方法，可以去 http://www.hkfaa.com/rules.html 睇返詳情。

講完一大輪金像獎嘅背景，不如簡介下今屆有份入圍各個獎項嘅電影啦（包含香港電影 17 套及亞洲華語電影 3 套）：

1. 由於篇幅所限，未能放上每套電影嘅海報片同預告，敬請見諒
2. 金像獎對香港電影嘅定義為符合以下條件其中兩項：導演係持有香港永久性居民身份證嘅香港居民 / 出品公司 (最少 1 間) 係香港合法註冊公司 / 必須最少有 6 個工作項目嘅工作人員係持有香港永久性居民身份證嘅香港居民，而每個工作項目只計算一位，依據 15 個獎項計算
3. 獲得最佳原創電影歌曲提名嘅電影會將該首歌曲放埋出嚟

香港電影

《智齒》
導演：鄭保瑞
主演：林家棟、劉雅瑟、李淳及池內博之
預告：https://www.youtube.com/watch?v=e6ZUJMVNXNw

故事講咩：啱啱由學堂畢業嘅任凱（李淳飾演）因為一單連環兇殺案，同剛復職嘅斬哥（林家棟飾演）開始成為拍檔。不過破唔到案之餘，反而引發咗一連串事故⋯⋯一方面，斬哥撞返殺佢妻兒嘅街童（劉雅瑟飾演），被激發嘅恨意一發不可收拾；另一方面，任凱因為一時大意，唔見咗自己枝佩槍，仲唔覺意被兇手攞到。呢個兇手潛伏喺城市之中，令危機逐步逼近⋯⋯

呢套電影改編自中國知名犯罪心理小說作家雷米嘅同名小說，係入圍電影中唯一一套以黑白拍攝，亦喺今屆金像獎獲得 14 項提名，包括最佳電影、最佳導演、最佳編劇、最佳男主角、最佳女主角、最佳女配角、最佳攝影、最佳剪接、最佳動作設計、最佳美術指導、最佳服裝造型設計、最佳原創電影音樂、最佳音響效果同最佳視覺效果，可以話係提名數量上嘅大贏家。


《梅艷芳》
導演：梁樂民
主演：王丹妮、劉俊謙、廖子妤、林家棟、古天樂、楊千嬅及楊祐寧
預告：https://www.youtube.com/watch?v=2RU_-1yw9Dw

故事講咩：根據巨星梅艷芳嘅真實經歷稍作改編，由王丹妮飾演梅艷芳。4 歲喺荔園登台嘅小歌手，到成為風靡亞洲嘅舞台天后，再到人生最後一段路，同埋感情生活、同家姐嘅相處，以及對工作對朋友對香港嘅付出，都有喺電影中呈現。

或者你未必清楚知道「梅艷芳」背後嘅故事，但係小薯仔相信，香港應該大部分人最起碼都一定會聽過「梅艷芳」呢個名，聽過 / 睇過佢一啲代表作。而呢套電影就係將呢位「香港女兒」嘅傳奇一生搬上銀幕，重現當時情懷。

喺今屆金像獎獲得 12 項提名，包括最佳電影、最佳導演、最佳女主角、最佳男配角、最佳女配角、最佳新演員、最佳攝影、最佳美術指導、最佳服裝造型設計、最佳原創電影音樂、最佳音響效果同最佳視覺效果，提名數量僅次於《智齒》。

* 廖子妤憑呢套電影及《智齒》獲得兩個最佳女配角提名；王丹妮亦憑呢套電影同時獲得最佳女主角及最佳新演員提名。


《濁水漂流》
導演：李駿碩
主演：吳鎮宇、蔡思韵、謝君豪、李麗珍、朱栢康、寶珮如及柯煒林
預告：https://www.youtube.com/watch?v=Dive0mfX_UM
主題曲：〈濁水漂流〉(主唱：黃衍仁)
https://www.youtube.com/watch?v=dunxtsO0nCQ

故事講咩：啱啱出冊嘅輝哥 (吳鎮宇飾演) 返到去深水埗街角，重遇一班街友—越南難民 老爺 (謝君豪飾演)、洗碗工 陳妹 (李麗珍飾演)、毒癮好深嘅大勝 (朱栢康飾演) 同埋半身不遂嘅阿蘭 (寶珮如飾演)。然而正正喺呢晚，就遇上食環署人員「洗太平地」，佢同班街友嘅家當盡失。一位剛畢業嘅社工何姑娘 (蔡思韵飾演) 協助佢哋打官司申請索償，並要求政府道歉。喺佢哋另覓居所嗰陣，仲識咗個口齒不清嘅年輕街友叫木仔 (柯煒林飾演)，於是合力搭建小木屋群，相依為命。可惜天橋底下畢竟龍蛇混雜，一班街友看似平靜嘅生活再次被打破，而一次意外更令佢哋被逼四散。

呢套電影亦係改編自真人真事，同時更加難得地集合咗吳鎮宇、謝君豪同李麗珍三位金馬獎影帝影后，而吳鎮宇除咗擔任男主角外，亦身兼出品人一職。

喺今屆金像獎獲得 11 項提名，係提名數量第 3 多嘅電影，包括：最佳電影、最佳編劇、最佳男主角、最佳男配角 x2、最佳女配角、最佳新演員、最佳美術指導、最佳原創電影音樂、最佳原創電影歌曲及新晉導演。

* 柯煒林憑呢套電影同時獲得最佳男配角及最佳新演員提名。


《媽媽的神奇小子》
導演：尹志文
主演：梁仲恆、吳君如、馮皓揚、張繼聰、盧海鵬及錢小豪
預告：https://www.youtube.com/watch?v=uo5yR2w8Z04
主題曲：〈神奇之路〉(主唱：柳應廷)
https://www.youtube.com/watch?v=kZItlJawxvw

故事講咩：蘇樺偉 (少年：馮皓揚 / 成年：梁仲恆 飾演) 一出世就被診斷患上黃疸病，導致腦部受損，註定一生都係個弱聽同四肢痙攣的殘疾人士。不過蘇媽 (吳君如飾演) 堅持要救個仔，仲決定就算阿仔到 80 歲都行唔到，都會孭住佢行。然而奇蹟出現—偉仔唔止慢慢長大，仲學識行路，甚至被發掘出跑步天賦！少年時代開始加入殘障人士田徑隊，同蘇媽一齊奮鬥嘅佢，之後就成為咗家傳戶曉嘅「神奇小子」─ 喺 1996 年夏季殘疾人奧林匹克運動會為香港拎到歷史性嘅第一金，到 2008 年夏季殘疾人奧林匹克運動會，攞到男子200 米金牌外，亦打破咗呢個項目嘅世界紀錄。

呢套係改編自退役傷健運動員蘇樺偉經歷嘅傳記電影。而吳君如除咗飾演「蘇媽」一角，亦係電影嘅監製。值得一提嘅係，呢套電影有獲提名代表香港角逐第 94 屆奧斯卡金像獎最佳國際影片㗎！

而喺今屆金像獎獲得 9 項提名，包括：最佳電影、最佳編劇、最佳男主角、最佳女主角、最佳男配角、最佳新演員 x2、最佳原創電影音樂及最佳原創電影歌曲。

* 梁仲恆憑呢套電影同時獲得最佳男主角及最佳新演員提名；馮皓揚憑呢套電影同時獲得最佳男配角及最佳新演員提名

《怒火》
導演：陳木勝
主演：甄子丹、謝霆鋒及秦嵐
預告：https://www.youtube.com/watch?v=mX7D4z9dcOA
主題曲：〈對峙〉(主唱：謝霆鋒)
https://www.youtube.com/watch?v=ffV6pfErPxg

故事講咩：重案組督察張崇邦 (甄子丹飾演) 圍剿國際毒梟嗰陣，遇上了一班「黑吃黑」嘅蒙面悍匪屠殺警察。張崇邦努力追查悍匪行蹤時，發現悍匪首領竟然係昔日戰友邱剛敖（謝霆鋒飾演），邱剛敖曾經係警隊明日之星，甚至當然時同張崇邦亦師亦友。當佢哋再次見面，一切恩怨，係時候嚟個了斷⋯⋯

電影喺 2019 年 7 月開拍，不過身兼監製嘅陳木勝導演喺拍攝期間證實患上末期鼻咽癌，並喺 2020 年 8 月逝世，所以就成為咗佢嘅遺作。

喺今屆金像獎獲得 8 項提名，包括：最佳電影、最佳導演、最佳攝影、最佳剪接、最佳動作設計、最佳原創電影歌曲、最佳音響效果及最佳視覺效果。


《手捲煙》
導演：陳健朗
主演：林家棟、Bipin Karma、袁富華、白只及太保 (張嘉年)
預告：https://www.youtube.com/watch?v=URQwUksdR7E

故事講咩：退役華籍英軍關超 (林家棟飾演) 加入黑社會維生，但近年經濟不景，成日入不敷支。一日，南亞裔古惑仔文尼 (Bipin Karma 飾) 為躲避仇人，誤闖關超屋企，仲以一百萬酬勞哀求佢收留五日，關超欣然接受。另一邊廂，關超早前促成咗江湖大佬大口泰 (袁富華飾演) 同台灣黑幫菜甫 (杜燕歌飾演) 嘅金錢龜走私交易，大口泰收貨後竟發現貨不對辦，仲要關超交返 150 萬訂金出嚟！但文尼突然攞出一包毒品畀關超用嚟換錢還債。件事看似完結，不過文尼竟然又被大口泰手下捉走！究竟要自保定救人？關超食一啖手捲煙，作出咗最終決定！

呢套電影係第 4 屆首部劇情電影計劃嘅大專組得獎項目，喺今屆金像獎獲得 7 項提名，包括：最佳男主角、最佳攝影、最佳剪接、最佳美術指導、最佳服裝造型設計、最佳動作設計同新晉導演。

* 林家棟憑呢套電影同《智齒》獲得兩個最佳男主角提名


《殺出個黃昏》
導演：高子彬
主演：謝賢、馮寶寶、林雪及鍾雪瑩
預告：https://www.youtube.com/watch?v=FMYsSHRl_M4

故事講咩：田立秋 (謝賢飾演)、蔡鳳 (馮寶寶飾演)、葉一叢 (林雪飾演) 喺 60年代曾係令人聞風喪膽嘅殺手三人組，無奈時代蛻變，亦敵不過年紀，三個人只好除低件戰衣，重過平凡生活，然而步入黃昏之年，就被社會標籤咗做「冇用」。一晚，電台播出一首叫〈青春之歌〉嘅點唱歌，令佢哋三個重燃一團火，之後仲重聚，一齊「重出江湖」。不過重組後嘅目標竟然係一班有病又孤獨嘅老人⋯⋯

呢套電影嘅特別之處係，主角再唔係圍繞住年輕人，而係一班上咗年紀嘅人，而且亦令「四哥」謝賢第一次提名金像獎最佳男主角！另外，呢度又要再提起林家棟呢個名，因為佢雖然喺戲中冇演出，但佢其實係呢套電影嘅監製兼其中一個編劇。

而喺今屆金像獎就獲得 5 項提名，包括：最佳編劇、最佳男主角、最佳男配角、最佳女配角及最佳新演員。

* 鍾雪瑩憑呢套電影同時獲得最佳女配角及最佳新演員提名。


《一秒拳王》
導演：趙善恆
主演：周國賢、查朗桑提納托古 (Chanon Santinatornkul)、林明禎、趙善恆、盧海鵬、袁富華、張建聲及熊倬樂
預告：https://www.youtube.com/watch?v=DmWENYkUxRY
主題曲：〈時間的初衷〉(主唱：周國賢 & 恆仔@ToNick)
https://www.youtube.com/watch?v=Tk3zzF648RE

故事講咩：廢中周天仁 (周國賢飾演) 成日都喺酒吧避債度日，連個仔 (熊倬樂飾演) 都對佢毫無期望。不過因為佢有一秒預知嘅超能力，之後竟然被發掘去做拳手！從未認真看待自己嘅天仁，決定運用超能力，喺擂台上搵返失落已久嘅人生初衷，為自己好好活一次。

喺今屆金像獎獲得 4 項提名，包括：最佳編劇、最佳動作設計、最佳原創電影歌曲及新晉導演。

《拆彈專家 2》
導演：邱禮濤
主演：劉德華、劉青雲及倪妮
預告：https://www.youtube.com/watch?v=WBbpjsEi8xk

故事講咩：香港發生連環爆炸案，令全城人心惶惶。前拆彈專家潘乘風 (劉德華飾演) 喺案發現場昏迷咗，被警方列為頭號嫌疑犯，懷疑佢同邪惡組織「復生會」有密切聯繫。而潘乘風醒返後，面對警方一連串嘅盤問同即將來臨嘅牢獄之災，決定逃走並親自查明真相⋯⋯

喺今屆金像獎獲得 4 項提名，包括：最佳剪接、最佳動作設計、最佳音響效果及最佳視覺效果。

《第一爐香》
導演：許鞍華
主演：馬思純、俞飛鴻及彭于晏
預告：https://www.youtube.com/watch?v=HLR5Ld1fAyg

故事講咩：上海大學生葛薇龍 (馬思純飾演) 嚟香港讀書，投靠咗姑媽梁太太 (俞飛鴻飾)。點知梁太太就利用佢做餌誘去吸引男人，令葛薇龍漸漸沉迷喺紙醉金迷嘅世界裡面。後來佢遇到花花公子喬琪喬 (彭于晏飾演) ，仲被對方吸引。為咗繼續過上流生活，佢不惜出賣埋自己嘅靈魂，費盡心機嫁咗畀喬琪喬，最終令自己淪為梁太太同喬琪喬嘅斂財工具。

呢套電影改編自張愛玲嘅成名作之一，1943 年出版嘅中篇小說《沉香屑·第一爐香》。喺今屆金像獎獲得 4 項提名，包括：最佳攝影、最佳美術指導、最佳服裝造型設計以及最佳原創電影音樂。

《奪冠》
導演：陳可辛
主演：鞏俐及黃渤
預告：https://www.youtube.com/watch?v=9v3EAnNitak

故事講咩：以傳奇中國女排主教練郎平 (由鞏俐飾演) 嘅故事為主線，講述由 1981 至 2016 年嘅中國女排喺國際體壇上點樣不斷創造佳績。

喺今屆金像獎獲得 3 項提名，包括：最佳導演、最佳女主角同最佳女配角。

《長津湖》
導演：陳凱歌、徐克、林超賢
主演：吳京及易烊千璽
故事講咩：以韓戰時嘅「長津湖戰役」為原型改編嘅電影。

喺今屆金像獎獲得 3 項提名，包括：最佳剪接、最佳音響效果及最佳視覺效果 。

《除暴》
導演：劉浩良
主演：王千源、吳彥祖、春夏及衛詩雅
故事講咩：1990 年代，刑警鍾誠 (王千源飾演) 受命追捕由悍匪張隼 (吳彥祖飾演) 率領嘅犯罪集團「老鷹幫」。張隼集團喺多個地方都有作案，罪行累累，仲挑釁警方，態度十分囂張。最終，經過 10 年嘅不懈努力，警方最終將張隼一團人捉拿歸案。

電影改編自中國嘅張君案，喺今屆金像獎獲得 2 項提名，包括：最佳女配角及新晉導演。

《好好拍電影》
導演：文念中
預告：https://www.youtube.com/watch?v=v3pWbNS9_7k

故事講咩：本身係電影美指嘅文念中用咗 4 年時間拍攝，記錄唯一一位六次奪得金像獎最佳導演嘅許鞍華導演，喺電影內外嘅面貌。以影壇一眾重量級人物嘅訪問，以及許導演嘅多年創作貫穿佢嘅人生。

電影喺今屆金像獎獲得 2 項提名，包括最佳導演及新晉導演。

《馬達‧蓮娜》
導演：陳雅莉
主演：張繼聰及周秀娜
預告：https://www.youtube.com/watch?v=iosUwSuKiyI&t=1s

故事講咩：失婚又不善辭令嘅馬達 (張繼聰飾演) 因為受失眠困擾，去咗做夜間的士司機，有日遇上由外地去到澳門做外勞嘅陪酒女郎蓮娜 (周秀娜飾演)。蓮娜嘅出現令馬達嘅生活多咗一點色彩，亦令馬達開始以為自己可以擺脫失婚嘅傷痛。蓮娜亦都知馬達愛上佢，只係佢背後埋藏咗一段未能夠釋懷嘅過去⋯⋯呢個係兩個於澳門浮沉，各有過去嘅陌生人相遇，相愛，相知嘅故事。

呢套電影係《金馬創投會議》入圍作品。而全套電影都喺澳門取景，並獲澳門特別行政區政府文化局資助。喺今屆金像獎獲得最佳女主角 1 項提名。

《真‧三國無雙》
導演：周顯揚
主演：古天樂、王凱、楊祐寧、林雪及張建聲；韓庚特別演出
故事講咩：東漢末年，民間爆發咗黃巾起義，劉備 (楊祐寧飾演) 帶住關羽 (韓庚飾演) 同張飛 (張建聲飾演) 將其平定，但董卓 (林雪飾演) 竟然趁機霸佔朝野，仲引發新一輪嘅動盪。

改編自日本光榮特庫摩嘅同名電子遊戲，亦已獲對方正式授權。喺今屆金像獎獲得最佳服裝造型設計 1 項提名。

《狂舞派 3》
導演：黃修平
主演：顏卓靈、蔡瀚億、楊樂文、劉敬雯及霍嘉豪（Heyo）
預告：https://www.youtube.com/watch?v=Ndl0hPu3u08
主題曲：〈歡迎嚟到呢座城市〉(主唱：霍嘉豪、阿弗、劉敬雯、Jan Curious、Kids Choir-戴天信、戴菲然、范芯堯、李寶瑜、莊冬晴)
https://www.youtube.com/watch?v=gwrRmAuWzQw

故事講咩：龍城工廈區原本係個工業區，近呢廿年因為租金平，吸引咗唔少各個範疇嘅創作人進駐，佢哋畀人稱為 KIDA (Kowloon Industrial District Artists)，包括近年上映嘅跳舞電影《狂舞派》及《狂舞派 2》嘅好多幕前幕後，都以龍城為基地。然而工廈近年不斷急劇加租，仲出現各種頻繁嚴厲嘅巡查，背後其實就係地產商作祟，要將龍城轉型成商貿區。某日，呢班創作人收到個工作邀請，但係明眼人都知係一項幫地產商塗脂抹粉嘅工程，佢哋當中有人覺得可以藉此令更多人認識，亦有人反對⋯⋯

呢套係 2013 年上映嘅《狂舞派》續集，不過並冇延續上集嘅熱血追夢故事，仲將《狂舞派 2》放入電影中，成為咗「戲中戲」，亦係入圍電影中唯一一套以廣東話口語做字幕。

喺今屆金像獎獲得最佳原創電影歌曲 1 項提名。

亞洲華語電影
今屆金像獎會有 3 套台灣電影一齊競逐最佳亞洲華語電影呢個獎項。


《月老》
導演：九把刀
主演：柯震東、王淨、宋芸樺及馬志翔
預告：https://www.youtube.com/watch?v=gEqXgmrgGgM

故事講咩：被雷擊而死嘅阿綸 (柯震東飾演) 去到陰間，失去生前嘅所有記憶外，亦需要選擇自己係現階段就投胎轉世 (不過有機會變成蝸牛) 定係擔任神職累積陰德先再轉世為人。最後佢揀咗做月老新鮮人，同衝動嘅粉紅女 Pinky (王淨飾演) 成為拍檔，上返人間執行任務。當阿綸遇上拖住狗狗阿魯嘅主人小咪 (宋芸樺飾演) ，前世嘅記憶就返曬嚟—記起小咪係自己嘅生前摯愛；佢打算幫陽間嘅小咪搵到新嘅姻緣，但每一條綁喺小咪手上嘅紅線竟然都被燒毁⋯⋯同時，由陰間走佬上人間嘅鬼頭成 (馬志翔飾演) ，搵返 500 年前背叛兼殺死自己嘅馬賊兄弟復仇。阿綸仲為小咪啲紅線綁唔到而開心，殊不知鬼頭成已經將小咪當做下一個要毁滅嘅目標⋯⋯

呢套電影係改編自台灣作家九把刀嘅同名小說，有睇過 2011 年上映嘅 《那些年，我們一起追的女孩》，應該會對九把刀同柯震東呢個組合好熟悉，而今次亦係佢哋第 3 次合作。

《美國女孩》
導演：阮鳳儀
主演：林嘉欣、莊凱勛、方郁婷及林品彤
預告：https://www.youtube.com/watch?v=VR9RtdYZcMo

故事講咩：2003 年，移民美國 5 年嘅莉莉 (林嘉欣飾演)，因為患上乳癌，所以帶埋芳儀 (方郁婷飾演) 同芳安 (林品彤飾演) 兩個女由洛杉磯返去台灣新店，同疏離多年嘅老公宗輝 (莊凱勛飾演) 團聚。不過由於中文唔好，妹妹芳安喺班上嘅成績嚴重落後，被同學叫佢做「美國女孩」，而且對媽媽嘅病亦非常無力，只係想返美國；而家姐芳儀亦有各種叛逆行為，令隨時擔心癌症會惡化嘅莉莉不能諒解。喺各種因素影響下，莉莉同芳儀不斷發生衝突，仲喺芳安因為 SARS 被送去醫院隔離嗰陣到頂⋯⋯但係呢場意外嘅疫情，令莉莉一家逼住要面對彼此嘅心結，亦成為修補關係嘅契機。

電影改編自導演阮鳳儀嘅童年際遇，係佢嘅第一套長篇電影，亦係一套「半自傳」。而且飾演媽媽莉莉嘅林嘉欣亦同飾演大女芳儀嘅方郁婷憑住呢套電影同時入圍金馬獎嘅最佳女主角！


《消失的情人節》
導演：陳玉勳
主演：劉冠廷及李霈瑜
預告：https://www.youtube.com/watch?v=dNPVoJpL-MU

故事講咩：喺郵局做嘢嘅曉淇 (李霈瑜飾演) 性格急，而且行事俐落同反應敏捷，不過偏偏等唔到愛情，30 歲都依然單身。有日開始，佢發覺不論陰晴，有個慢半拍嘅「寄信男」(劉冠廷飾演) 每日都會嚟寄一封神秘嘅信。喺情人節前夕，佢就被一個「陽光男」搭訕，仲成功約到佢，以為可以拍拖啦，點知瞓醒一覺，佢期待嘅情人節竟然消失咗！而佢仲要斷片，對嗰日發生啲乜都冇印象，甚至連「寄信男」同「陽光男」都唔見埋！於是，佢決定去踏上搵返呢日真相嘅旅程⋯⋯

呢套電影由導演陳玉勳自編自導，喺 2020 年第 57 屆金馬獎獲得 11 項提名，更加獲得當中 5 個獎項，包括最佳劇情長片、最佳導演、最佳原著劇本、最佳剪輯同最佳視覺效果！

金像獎主席爾冬陞喺接受媒體訪問時表示，目前仍然決定喺 4 月 17 號香港文化中心舉行頒獎禮。而小薯仔喺度都希望今屆頒獎禮可以如期順利舉行，等關注呢項香港電影界盛事嘅觀眾都可以透過指定平台睇轉播，見證各個得獎單位誕生～
(24/3/2022 更新：金像獎大會宣布頒獎禮將喺 7 月 17 日九龍灣國際展貿中心匯星舉行)

以上嘅入圍電影中，《怒火》、《智齒》、《濁水漂流》、《一秒拳王》、《除暴》、《折彈專家2》、《狂舞派3》，《月老》及《梅艷芳》都已經串流上咗香港 Disney+！大家可以喺金像獎頒獎禮前重溫。
未有 Disney+ 睇唔到？立即訂閱：http://disneyplus.bn5x.net/e42ooX


撰文：小薯仔
資料來源：維基百科、香港電影金像獎網頁及網上資料
照片來源：網上圖片；《殺出個黃昏》、《一秒拳王》、《月老》Facebook

---

延伸閱讀：
哥哥張國榮5套電影推介 當中有你鍾情嘅作品嗎？
https://timable.com/blog/2163967

【金像獎2022】金像獎4位入圍最佳男主角 大前輩同新人邊位會脫穎而出？
https://timable.com/blog/2174406

【金像獎2022】金像獎5位入圍最佳女主角 前輩新人各有優勢
https://timable.com/blog/2163068

【金像獎2022】金像獎5位入圍最佳男配角 前輩新人各有千秋
https://timable.com/blog/2156900

【金像獎2022】金像獎5位入圍最佳女配角 前輩新人競爭激烈
https://timable.com/blog/2150199


Follow埋Timable FB同IG
FB：https://www.facebook.com/timable.hk
IG：https://www.instagram.com/timable/

立即下載Timable App，隨時隨地捕捉本地活動資訊
iOS/Android：https://bit.ly/timable_app