世界各地嘅歌手,除咗透過音樂、歌曲同現場表演去傳達佢哋想聽眾 / 粉絲收到嘅訊息外,喺音樂錄像 (Music Video,簡稱 MV) 上亦會花心機去構思。而 MV 嘅種類有好多,亦冇話有時長嘅限制,所有影片創作嘅形式都包括在內:可以係一個由真人演出嘅故事,可以係用動畫形式或者係用圖像拼湊,可以係記錄有關演唱者日常嘅片段,甚至可以係簡單地用音樂配上歌詞,都己經係一個MV。有啲以跳舞快歌為主嘅歌手亦會另外拍一個版本係將嗰首歌曲嘅編舞跳曬出嚟。

咁近代嘅 MV 又係點出現㗎呢?普遍都認為係英國嘅 QUEEN 樂隊喺 1975 年推出〈Bohemian Rhapsody〉呢首歌嗰陣所拍嘅影片,突破咗當年嘅框架,係 MV 時代開始嘅象徵;去到 1984 年,Michael Jackson 出咗〈Thriller〉嘅 MV,呢個係史上第一個有故事性嘅 MV,佢亦深深影響咗往後 MV 嘅內容,同年 Michael Jackson 亦出咗《The Making of Thriller》,係第一條講 MV 幕後製作嘅片。所以大家可以見到而家多數 MV 都會用一個故事嚟貫穿成段片,有啲歌手亦會出埋 MV 拍攝花絮。

返返嚟香港:早期歌手嘅 MV 通常會由電視台拍攝,再喺電視台播放,甚至會整成一啲叫音樂特輯嘅節目,亦未有咁著重內容同畫面;第二個渠道可以畀觀眾接觸到 MV 嘅,就係卡拉OK。大家唱 K 嗰陣見到有歌手出現嗰類 MV,其實已經係「進化版」。

隨住互聯網嘅發達,近年香港嘅歌手亦同其他地方一樣,除咗派歌上電台,亦將MV變成歌曲嘅主要宣傳渠道。唱片公司拍完就上傳去歌手嘅 YouTube 頻道,畀粉絲同觀眾可以不受任何限制咁睇,甚至會用埋 4K 拍攝,令畫質更好。而人氣旺盛嘅 MIRROR 亦將呢樣嘢發揮到極致,每逢成員個人或者係團體推出新歌,都會令粉絲們期待該首歌曲嘅 MV,當然亦會不斷睇嗰個 MV 以示支持。

事不宜遲,即刻嚟睇下小薯仔精選嘅 MIRROR 團體同成員個人單曲 MV 啦:

1. 先放團體,再以成員英文名之順序排列
2. 揀選嘅 MV 都係小薯仔主觀上鍾意嘅,多唔多觀看次數或者係咪新歌並唔喺考慮範圍


MIRROR 團體歌曲
雖然 MIRROR 出道已經係踏入第 4 年,但係推出嘅團體歌曲數量並唔多。小薯仔就幾鍾意以下兩首:



〈WARRIOR〉
https://www.youtube.com/watch?v=YI4qsJhZtwA
全個 MV 都只係以穿著黑色同白色服裝成員嘅鏡頭同跳舞部分組成,可以話算係構成比較簡單嘅一個 MV。而呢個應該都係 MIRROR 嘅歌曲 MV 裡面,其中一個可以表現出佢哋有氣勢一面嘅 MV。


〈12〉
https://www.youtube.com/watch?v=b2qXJwIW1pE
作為呢個團體第一首聖誕歌,個 MV 都幾有聖誕氣氛嘅。以喺學校發生嘅聖誕樹上星星失竊事件為主軸,再穿插成員唱歌嘅畫面,係近年喺唔同歌手嘅 MV 中都幾常見嘅形式。雖然聖誕節已經過咗幾個月,今年嘅聖誕節又有排先到,不過都可以睇下,畢竟睇 MV 係冇分時間嘅~

成員個人歌曲


Alton 王智德 x Anson Kong 江𤒹生 -〈REBOUND〉
https://www.youtube.com/watch?v=O5fXXbjT_Mc
印象中,近年香港歌手嘅 MV 比較少搵一大班藝人一齊客串同一個 MV,不過繼成員 Anson Lo 之後,Alton 同 Anson Kong 呢首噚日先推出嘅新歌,都請嚟咗 C All Star 嘅 On 仔、樂隊 ONE PROMISE 同 Nowhere Boys,仲有梁祖堯、洪嘉豪等,加上 MIRROR 隊長 Lokman 同成員 Frankie 去酒店「開 Party」。

根據兩位成員所講,為咗配合歌曲嘅氣氛,所以 MV 以佢哋參與 Party 後醉酒斷片為主去呈現出嚟,又間唔時有超級跑車穿插於畫面,加上一大班人玩得盡興嘅場面,算係近年香港歌手中比較少見嘅「吵吵鬧鬧」歡樂式 MV~

(上:〈特登〉;下:〈EGO〉)

Anson Kong 江𤒹生 -〈特登〉
MV 版本:https://www.youtube.com/watch?v=QKm8znqIM4U
微電影版本:https://www.youtube.com/watch?v=7xFuxVPNyIo
跳舞版本:https://www.youtube.com/watch?v=BeH-OaM2BQc
一開始提到所有影片創作嘅形式都可以構成一個 MV,而 Anson Kong 呢首喺 2020 年推出嘅單曲,除咗普通故事形式 MV 外,亦有跳舞版本嘅,甚至用呢首歌拍咗一個微電影出嚟!

微電影形式嘅歌曲 MV ,未必同原來版本嘅 MV 內容相關,可以係一個新嘅故事。不過呢首歌嘅微電影版本,其實就係原本故事情節嘅延伸發展,令看者感受到嘅嘢再多啲。

Anson Lo 盧瀚霆 -〈EGO〉
MV 版本:https://www.youtube.com/watch?v=VnnoAz6taAM
跳舞版本:https://www.youtube.com/watch?v=gMkAc5TMKY4
Anson Lo 呢幾年推出咗唔少個人作品,大多數都係跳唱歌曲,所以有普通 MV 嘅版本之餘,亦有跳舞版本嘅。

雖然佢最近新出咗一首〈Mr. Stranger〉。但係如果講到 MV,小薯仔就比較中意〈EGO〉。呢個 MV 表面上好似冇一個好完整嘅故事,只係以一啲同歌詞 / 歌曲連繫到嘅畫面同跳舞場面構成,不過其實呢啲畫面連同歌詞己經帶出到歌者想表達嘅嘢,算係個簡單易明嘅 MV。


Edan 呂爵安 -〈E先生連環不幸事件〉
MV 版本:https://www.youtube.com/watch?v=7FPL4DRizgk
鋼琴版本: https://www.youtube.com/watch?v=UUhkNZYwnsc
大部分情歌嘅 MV,都會以故事形式呈現歌曲內容,而Edan 推出嘅幾首個人歌曲都係情歌,所以啲 MV 都係用故事嚟串連。

呢首 2021 年推出嘅歌,雖然 MV 內容係以三角戀為主,不過有個特別之處係歌曲鋼琴獨奏嗰部份,MV 中都有配合返,出現 Edan 自己彈鋼琴嘅場面。

上面寫嘅成員個人 MV 另一個版本都係出跳舞版,但係 Edan 呢首出嘅另一個 MV,就係佢彈全首歌嘅鋼琴版本。


Ian 陳卓賢 -〈留一天與你喘息〉
https://www.youtube.com/watch?v=uuV8wZ_P8r4
Ian 推出嘅歌曲都比較偏向抒情或者係 R&B 風格,所以佢嘅 MV 都比較多用故事形式。

點解小薯仔會揀呢個 MV 呢?主要係幾鍾意 MV 嘅內容同設定,講述一對喺精神病院嘅戀人結伴逃離嘅故事。畫面配合返歌詞,再加上而家嘅大環境下,畀到人一種舒服嘅感覺,所以都幾推介大家睇嚟放鬆下。


Jer 柳應廷 -〈人類群星閃耀時〉
https://www.youtube.com/watch?v=cWQ99uzuqJ8
Jer 出嘅歌都鍾意用一個系列嚟串連埋,而呢首歌就屬於「重生三部曲」嘅第 3 首。呢個 MV 雖然睇落好似係一個單獨嘅故事,但其實裡面都有加插頭兩部曲—〈狂人日記〉同〈砂之器〉嘅 MV 人物,交代返佢哋嘅後續發展,同呢兩首歌做返個呼應。最特別係,呢個係第 1 個 MV 運用 XR 技術 (即係 Extended Reality,虛實混合)!


(上:〈半〉;下:〈Dear My Friend,〉)

Jeremy 李駿傑 -〈半〉
https://www.youtube.com/watch?v=s2VfMoHgjA4
雖然係 Jeremy 第 1 首嘅個人單曲,不過呢個 MV 就係成員甚至團體中,比較大膽嘅。MV 中搵咗 Fish 廖子妤,做 Jeremy 嘅「另一半」,當中除咗穿插 Jeremy 跳糅合 Urban Dance 同現代舞嘅舞蹈部份,跟隨住故事情節發展,甚至有殺人見埋血、發生親密關係等嘅場面,完全帶畀觀眾視覺上嘅衝擊。

姜濤 -〈Dear My Friend,〉
https://www.youtube.com/watch?v=S3cHTNEsCcY
姜濤作為最早推出個人單曲嘅 MIRROR 成員,作品其實都唔少。而呢首攞咗「我最喜愛歌曲」嘅,背景相信都唔使多作介紹。MV 裡面嘅場景同情節,都同姜濤同朋友所發生過嘅事有關。就算未經歷過相關情況,了解咗歌曲背後嘅意義,再睇埋個 MV,應該都會感受到當中嘅情感。

MIRROR 團體同有出個人歌曲嘅成員,每首歌再加有啲唔同嘅版本,合計有 65 個 MV。因為篇幅有限,所以恕小薯仔唔能夠每個都列出。想睇曬咁多個 MV,可以去返 MIRROR 嘅 YouTube 頻道:https://www.youtube.com/playlist?list=PLgFYQFfidPfuimRBpEG1PTUeUbIPW8Ulb

撰文:小薯仔
照片來源:MIRROR YouTube 上傳之各 MV 截圖;MIRROR Instagram;網上圖片


延伸閱讀:
【睇YouTube】MIRROR成員嘅YouTube頻道有咩睇?
https://timable.com//zh-hk/blog/2140181

【睇電視2022】ViuTV 籃球劇《季前賽》睇MIRROR同ERROR喺球場上揮灑汗水!
https://timable.com//zh-hk/blog/2128581

【睇電視2022】ViuTV 新運動劇《i.SWIM》繼續青春熱血!
https://timable.com/zh-hk/blog/2126092


Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下載Timable App,隨時隨地捕捉本地活動資訊
iOS/Android:https://bit.ly/timable_app