確診數字每日繼續維持喺以萬計嘅呢段時間,相信大家仍然都係比較多留喺屋企~除咗工作以外,應該都仲會煲劇同睇戲嚟打發時間。

上一篇就講咗幾篇近期 Netflix 上討論度幾高,又或者係即將上架嘅節目,喺呢一篇,小薯仔不如就推介下幾套近期上咗架嘅韓劇畀大家啦!


《少年法庭》(소년 심판 / Juvenile Justice)
預告: https://www.youtube.com/watch?v=KHninbQaBCQ
主演:金憓秀、金武烈、李星民、李姃垠
呢套由打造過唔少人氣韓劇嘅洪鍾燦導演同金玟錫編劇共同創作,Netflix 自己出品嘅《少年法庭》,絕對係近期大熱,而且討論度非常高嘅韓劇。全劇總共有 10 集,已全數上架,不過因為涉及「少年犯罪」嘅內容,所以被列為 16 歲以上先可以觀看。


劇集講述由金憓秀飾演嘅沈恩錫,係極度厭惡少年犯嘅精英法官,呢班青少年都會因為年齡,而唔會喺法律上得到嚴厲嘅制裁。佢去到地方法院嘅少年刑事合議庭擔任右陪席法官,仲負責審理複雜嘅少年犯罪案件,但係唔會對佢哋手下留情。面對住犯下各種罪行而企上少年法庭嘅少年罪犯,同埋負責嘅同僚法官,佢深刻意識到青少年喺呢個社會上面對咩問題,亦努力令自己喺厭惡少年犯同追求公義刑罰間取得平衡。

呢套劇集主要想探討未成年人士犯罪嘅議題,題材對比一眾講親情、友情、愛情嘅韓劇係非常新鮮。不過其實呢樣嘢都係韓國社會,甚至好多有設立少年法嘅國家面對緊嘅現實問題。而劇中好多情節其實都係改編自韓國真實案件,例如係「仁川女童分屍案」。

除咗題材,主要演員陣容都引起話題:女主角金憓秀喺韓國三大影視頒獎禮—青龍電影獎、大鐘獎同百想藝術大賞都攞過最佳女主角;李星民攞過大鐘獎同百想藝術大賞嘅最佳男主角;李姃垠都喺以上提及嘅 3 個頒獎禮中攞過最佳女配角,而音樂劇演員出身嘅金武烈雖然暫時未有喺呢幾個頒獎禮上攞過獎,不過都係實力派演員。


《社內相親》(사내 맞선 / TA Business Proposal)
預告:https://www.youtube.com/watch?v=68HiU17KpEg
主演:安孝燮、金世正、金旻奎、薛仁雅、李德華
《社內相親》改編自韓國網絡漫畫家 HaeHwa 所創作嘅同名人氣網絡漫畫,係一套甜蜜浪漫喜劇,全劇總共有 12 集。

故事講述由金世正飾演嘅申夏莉收到朋友陳映書 (薛仁雅飾演) 嘅請求,映書想夏莉假扮佢出席一場相睇,目的係想嚇走對方。但係估唔到相睇對象竟然係佢公司嘅社長—由安孝燮飾演嘅姜泰武,而姜泰武仲要向夏莉求婚,令到夏莉成個計劃亂曬⋯⋯

因為同韓國同步播出嘅關係,所以而家只係上咗第 1 同第 2 集。鍾意完咗先一次過睇嘅朋友,可以喺 4 月 5 號睇曬 12 集。


《二十五,二十一》(스물다섯 스물하나 / Twenty-Five Twenty-One)
預告:https://www.youtube.com/watch?v=FhWBssPtZ4k
主演:金泰梨、南柱赫、金知妍、崔顯旭、李珠明
《二十五,二十一》係由《請輸入檢索詞 WWW》嘅導演鄭智炫同編劇權度銀一齊打造嘅新劇,全劇總共有 16 集。

故事發生喺 1998 年,嗰陣嘅韓國面對緊 IMF 金融危機。金泰梨所飾演嘅羅希度,係個充滿熱情嘅劍擊選手,不過佢所屬嘅高中劍擊隊就因為呢個危機而解散,令佢要轉校。而 18 歲呢年,佢遇上咗 22 歲,因為屋企破產而面臨人生考驗,但係努力重建緊自己生活嘅白易辰 (由南柱赫飾演)。3 年間,21 歲嘅羅希度不斷搏命向前衝,最後變咗國家代表選手,而 25 歲嘅白易辰就成為咗電視台記者,佢哋嘅故事仍然繼續。

睇簡介都知道係一套青春電視劇,當然亦包含羅曼史。不過除咗金泰梨同南柱赫呢條感情主線外,加上咗金知妍、崔顯旭、李珠明嘅 5 人幫友情線,以及每人同青春嘅碰撞再成長都係值得留意嘅部份。

呢套都係同韓國同步播出嘅劇集,所以而家只係有頭 8 集,結局將會喺 4 月 3 號播出。


《三十九》(서른, 아홉 / Thirty-Nine)
預告:https://www.youtube.com/watch?v=TQVaPu_11FQ
主演:孫藝真、田美都、金芝賢、延玗臻、李茂生、李泰煥
好多韓劇都係邊拍邊播,不過呢套就採取 100% 事前製作,即係播出之時,全套劇集已經煞科,而且所有後期製作都己經做好。


上面有兩套都係主打愛情,而一共 12 集嘅呢套就描述緊女性之間嘅友情—以 3 位就嚟 40 歲嘅摯友為中心,分別係孫藝真飾演嘅車美昭、田美都飾演嘅鄭燦榮,以及係金芝賢飾演嘅張珠喜。佢哋由高中二年級開始,到 39 歲嘅呢個時候,都陪伴住大家度過彼此人生中嘅時間,呢個故事亦係關於佢哋嘅愛情、友情同人生。

而除咗友情之外,身為一套現實嘅人性羅曼史,愛情都係唔少得嘅,所以 3 位女主角都會分別同 3 位男主角—延玗臻飾演嘅金善優、李茂生飾演嘅金真皙同李泰煥飾演嘅朴賢俊展開感情線。

呢套亦都係同韓國同步播出嘅劇集,所以而家只上架咗 6 集。


《氣象廳的人們:社內戀愛殘酷史篇》(기상청 사람들: 사내연애 잔혹사 편 / Forecasting Love and Weather)
預告:https://www.youtube.com/watch?v=GJj4RS99-TE
主演:朴敏英、宋江、尹博、金亞瑩 (Yura)
呢套係《山茶花開時》導演車榮勳嘅新作,總共有 16 集。


故事以韓國國家氣象廳為背景,其中穿插住有關天氣嘅情節。講由朴敏英飾演嘅陳夏京,係氣象廳統籌組組長,同氣象廳發言人,由尹博飾演嘅韓氣峻,拍咗 10 年拖。兩個人準備結婚之前,陳夏京揭發咗男方有第三者,婚事亦隨之告吹;兩個月後,陳夏京就升咗職,由宋江飾演嘅李時雨都同時調咗去跟陳夏京,成為佢嘅下屬。而陳夏京原本唔想同前男友再喺同一地方做嘢,諗住出國進修,不過最後留低咗,仲同李時雨越行越近⋯⋯

雖然睇上面簡介會覺得成套劇可能係循序漸進嘅發展,但其實一開始就已經講男女主角發生咗一夜情,跟住呢兩個人就發展辦公室戀情,所以劇集感情線嚟講真係發展得快㗎!而兩男兩女嘅配搭,當然唔少得四角戀啦~

佢係呢篇推介中,第四部同韓國同步播出嘅劇集,所以而家上架嘅集數亦只係 8 集,4 月 3 號先會播出大結局。


同場加映
《海賊:鬼怪的旗幟》

預告:https://www.youtube.com/watch?v=JVd-YG76s9Y
主演:姜河那、韓孝周、李光洙、權相佑、蔡秀彬、吳世勳、金盛吳、朴志煥
呢套就唔係劇集,而係 Netflix 投資拍攝,並且向全世界發行嘅第一套韓國電影。雖然佢話就話係 2014 年上映嘅電影《海賊:奔向大海的山賊》續集,不過因為各種因素,呢集嘅登場人物同故事都係全新嘅設定,同上一集已經冇關連。

電影講述一班由韓孝周飾演嘅海浪為首嘅海盜同由姜河那飾演嘅禹武治帶領嘅義賊團,為咗尋找消失喺茫茫大海嘅皇家寶藏,成為呢個寶藏嘅主人,於是齊齊出海。喺呢個冒險嘅途中當然會遇到好多狂風暴雨啦,又要解開一啲未知嘅謎團,不過最後喺遇到敵人嘅時候都有一齊抵抗!

喺韓國上映嘅時候,連續 14 日都係票房冠軍,亦係當地今年第一部票房過百萬嘅電影~

想輕輕鬆鬆笑下,呢套冒險喜劇電影都可以一睇!應該睇完都會爽!

撰文:小薯仔
資料來源:Netflix 頁面、維基百科、媒體報導
照片來源:Netflix 頁面、tvN 網站、JTBC Drama Facebook、SBS Facebook、@netflixkr Instagram、Namu wiki


延伸閱讀:
【抗疫2022】Netflix 3月片單推介 留喺屋企實有嘢睇!
https://timable.com//zh-hk/blog/2140530

【睇YouTube】Alton x Anson Kong 新歌〈REBOUND〉|MIRROR 團體同成員單曲MV 有咩睇?
https://timable.com//zh-hk/blog/2141832

【睇YouTube】MIRROR成員嘅YouTube頻道有咩睇?
https://timable.com//zh-hk/blog/2140181

【睇YouTube】鄭中基YouTube 頻道「機動電視台 RTV」有咩睇?
https://timable.com//zh-hk/blog/2128791


Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下載Timable App,隨時隨地捕捉本地活動資訊
iOS/Android:https://bit.ly/timable_app