2022香港5間本地農場介紹｜本土農夫種植物 食得安心有機健康農作

香港市面上售賣嘅蔬菜，雖然大部分都係由其他地方輸入，不過其實本地嘅農夫一直都有繼續種緊唔同品種嘅蔬菜㗎！近年都越嚟越多人加入本地耕作嘅行列，而本地有機農產品又越嚟越多種類，同時當然唔少得多咗各種唔同嘅農墟可以畀呢班農夫一個新嘅銷售渠道啦～

而且根據蔬菜統營處嘅資訊，本地種植除咗因為運送距離比較短，而令市民可以買到最新鮮嘅菜之外，呢種短途運輸方式更加可以幫助減低碳足跡，對可持續發展同地球環境都有幫助。

小薯仔今次就揀咗幾個本地農場，如果大家對佢哋嘅產品有興趣，可以直接搵佢哋查詢：



俏姐農場
https://www.facebook.com/ciuze
俏姐嘅農場設喺大埔林村，除咗種植肉薑、粉葛、西洋菜、油麥菜、生菜同椰菜等唔同嘅農作物外，仲會將呢啲自家種植嘅作物製成手工食品，好似係陳皮檸檬燉冰糖同薑黃粉咁。

新鮮嘅農產品可以聯絡俏姐交收，如果想親自落田摘菜，亦可以聯絡佢預約時間。



歐羅有機農場
https://www.facebook.com/aulawfarm
歐羅呢個種植有機菜嘅農場，位於元朗錦田。佢哋所種植嘅蔬果包括：生菜、大白菜、油麥菜、紅菜頭、西蘭花、韮菜、車厘茄同楊桃等，另外仲有竹蔗包～

大家可以喺農墟或者係網站單次購買佢哋嘅農產品，如果需要長期訂購，亦可以揀月購套餐，每星期一次喺指定地點同時間自取，或者由佢哋送貨。
（不過因為疫情嚴重，送貨服務會喺 14/3 – 1/4 期間暫停，之後再視乎情況決定）



麥棠農場
https://www.facebook.com/honeysfarmhk
呢個係 2 位年輕人位於元朗錦上路嘅自家農場。佢哋奉行以尊重在地生命嘅有機方式去生產本地新鮮蔬菜嘅模式，順應植物生長、時令，而且用清水洗滌啲菜就可以煮食。有意大利生菜、羅馬生菜苗、芫茜、皇帝菜同菠菜苗等。

想買佢哋嘅出品，可以 WhatsApp 佢哋聯絡交收或者落田自己摘。



華記有機農場
https://www.facebook.com/WahKeeOrganicFarm
同樣係位於元朗錦上路嘅華記有機農場，係全港 133 個經嚴格檢驗各方面後先可以獲「有機認證農場」嘅其中一個。每一樣蔬菜都係新鮮即日採摘㗎！有椰菜花、車厘茄、生菜、紫椰菜、粟米等嘅蔬菜～

如果想購買，可以用電話落單 / 逢星期三去到中環天星碼頭嘅農墟，又或者親身去到農田採摘，詳情可以聯絡佢哋查詢。


高原農場
https://www.facebook.com/hkmountainfarm
位於大帽山嘅高原農場，係家庭式嘅小型農場，用自然農法同有機耕作方式去種植時令蔬果，最近就有白菜仔、菜心、生菜同油麥菜，仲有白蘿蔔。佢哋亦會不定期推出包含唔同菜款嘅菜包以供選購。

不過受前排連續幾日大雨嘅影響，雖然啲菜苗繼續生長緊，但係就趕唔上收割期。所以呢段時間會先暫停供菜。

撰文：小薯仔
照片來源：各農場 Facebook


Follow埋Timable FB同IG
FB：https://www.facebook.com/timable.hk
IG：https://www.instagram.com/timable/

立即下載Timable App，隨時隨地捕捉本地活動資訊
iOS/Android：https://bit.ly/timable_app