【Friday 那些年】和你數一起追過的韓國男子團體 #1

因為一個 20 年都冇變過嘅電話號碼，再次將台灣藝人大 S 徐熙媛同韓國元祖一代團之一CLON (酷龍) 成員具俊曄拉返埋一齊，甚至令佢哋拉埋天窗。喺好多年輕人問緊「who？」嘅同時，其實亦令唔少有一定年資嘅粉絲回想返當年喺資訊 / 互聯網未咁發達嗰陣，追星嘅日子。

唔知以下小薯仔介紹嘅呢幾個團體，大家又有冇追過或者對佢哋有所認識呢？


CLON (클론 / 酷龍)
成員：具俊曄 (구준엽)、姜元來 (강원래)
出道年份：1996 年
代表作：
〈빙빙빙 (Bing Bing Bing)〉
https://www.youtube.com/watch?v=NvxxChFqsaw

〈Kungtari Shabara〉
https://www.youtube.com/watch?v=6SrNsoDomho
兩位成員本身係高中同班同學，亦都喺佢哋學校同學校附近區域出晒名非常鍾意跳舞。畢業後佢兩個就參加咗個跳舞比賽，被李秀滿發掘，做咗當時得令嘅歌手玄振英嘅舞蹈員，變咗「玄振英與 Wawa」 1 期成員，不過之後因為要服兵役，所以好快就退出咗。


喺 1996 年就被天王級嘅音樂製作人金昌完發掘，於是就組成咗「CLON」呢個雙人組合，主打 Hip-Hop 舞曲同饒舌曲風。第一隻碟嘅主打歌〈Kungtari Shabara〉一推出就非常受歡迎，仲喺各個音樂節目攞咗 12 個 1 位，最後以新人身份攞埋首爾歌謠大賞嘅大賞 (即係全個頒獎禮最大嘅獎)！而 1997 年推出嘅第二隻碟，裡面兩首主打歌〈빙빙빙 (Bing Bing Bing)〉同〈도시탈출 (都市逃出 / 逃離城市)〉除咗紅遍全個韓國，連喺台灣、香港、中國同其他亞洲國家都有好高人氣，歌曲亦被台灣歌手徐懷鈺同香港歌手杜德偉改編做中文版本～之後更加喺台灣同北京舉行演唱會！


不過喺 2000 年 11 月，成員姜元來遇到車禍，造成下半身癱瘓，令 CLON 嘅演藝事業要暫停。而呢段時間具俊曄都一直陪喺姜元來身邊，並且講明唔會單飛發展！直到 2005 年，佢哋先再推出新碟～


H.O.T. (High-five Of Teenagers)
成員：文熙俊 (문희준)、張佑赫 (장우혁)、Tony An (安勝浩 / 안승호)、Kangta (安七炫 / 안칠현)、李在元 (이재원)
出道年份：1996 年
代表作：
〈전사의 후예 (폭력시대) (戰士的後裔)〉
https://www.youtube.com/watch?v=631bfFu7vaU

〈Candy〉
https://www.youtube.com/watch?v=K2N3eDW5kUc
如果話上面 CLON 已經好紅，咁 H.O.T. 作為當時啱啱創立嘅 SM 娛樂所推出嘅第一組男團，人氣強勁程度絕對有過之而無不及，主宰咗大眾文化，令當時嘅青少年瘋狂迷戀，出碟、週邊產品、演唱會門票每次一出都好快被搶購一空。「H.O.T. 症候群」轟動韓國社會之餘，甚至奠定埋現今韓國偶像產業嘅發展方向，包括偶像文化、應援文化等。


佢哋喺 1996 年 9 月出道之後，第一隻碟嘅主打歌〈전사의 후예 (폭력시대) (戰士的後裔)〉用咗非常短嘅時間就獲得大量粉絲嘅支持，更有一段長時間高鋸各個音樂節目排行榜嘅榜首！後續曲〈Candy〉嘅可愛形象，為佢哋帶嚟咗更多嘅少女粉絲～而之後推出嘅歌曲同專輯都令人氣有增無減，甚至喺其他地方都有唔少粉絲，所以令佢哋喺 2001 年解散之前，一直都係韓國男團嘅頂峰！

而佢哋推出嘅歌曲題材，除咗最大路嘅愛情，仲包括唔少社會議題，好似係反對校園暴力同呼籲老師唔好體罰學生，歌詞亦非常緊扣主題，被視為係當時青少年嘅「代言人」，仲有服裝同髮型髮色，都為當時仲係偏向保守嘅韓國社會，帶嚟非常大嘅衝擊。

喺 2018 年，韓國節目《無限挑戰》特輯就成功邀請到佢哋合體演出，喺第一日開放觀眾申請入場嗰陣，就超過 10 萬人作出申請，令官方網站死 server！呢個特輯仲令節目收視率比起同時段所有節目都高㖭！


水晶男孩 (젝스키스 / SECHSKIES)
成員：殷志源 (은지원)、李宰鎮 (이재진)、金在德 (김재덕)、張水院 (장수원)、姜成勳 (강성훈，現已退團)、高志鎔 (고지용，現已退團)
出道年份：1997 年
代表作：
〈사나이 가는 길（폼생폼사）男兒之路（品生品死）〉
https://www.youtube.com/watch?v=4v4PFanJj_U

〈Couple〉
https://www.youtube.com/watch?v=42GaJk4YNLQ
水晶男孩係當年 SM 娛樂嘅競爭對手 DSP Media ，為咗抗衡已經非常成功嘅 H.O.T. 而打造出嚟嘅組合。SECHSKIES 其實係德文，解做 6 粒水晶，意指係可以左右命運，而佢哋都非常成功地同 H.O.T. 一齊被韓國媒體並稱為 90 年代後期韓國樂壇兩大山脈。

1997 年出道後嘅第一首主打歌〈학원별곡 (學園別曲)〉係批判當時教育制度，而同名專輯推出咗之後都獲得極大迴響，令佢哋人氣急速上升，成為咗各種廣告商嘅新寵，亦理所當然地變成咗當時 H.O.T. 嘅最大對手。喺 1998 年推出咗〈Couple〉呢首歌，仲唱到街知巷聞～甚至喺呢年嘅「首爾歌謠大賞」，兩個團體仲一齊獲得「年度大賞」呢個最大獎項！


然而喺 2000 年 5 月，仲喺事業巔峰嘅佢哋突然喺酒店召開記者會，宣佈解散。直到 2016 年，韓國節目《無限挑戰》特輯 (冇錯又係《無限挑戰》)，邀請佢哋擔任主角，先再次合體出現喺大眾面前 (除咗已經退出咗娛樂圈嘅高志鎔)，亦因為呢個節目舉辦嘅游擊演唱會非常成功，所以令佢哋正式重新開始團體活動。不過到 2019 年，因為姜成勳宣佈退出團體，水晶男孩就正式變咗 4 人組合。


SHINHWA (신화/ 神話)
成員：Eric (文晸赫 / 문정혁)、李玟雨 (이민우)、金烔完 (김동완)、申彗星 (신혜성)、JunJin (朴忠栽 / 박충재)、Andy (李先鎬 / 이선호)
出道年份：1998 年
代表作：
〈T.O.P. (Twinkling of paradise)〉
https://www.youtube.com/watch?v=tosQj7d58SU

〈Perfect man〉
https://www.youtube.com/watch?v=Lxe9yXVa24Q
神話呢個團體，同佢哋個名一樣，都係神話嚟！1998 年 3 月出道之後，到呢一刻，成員嘅構成冇變過，人數冇加減，亦冇解散同冇暫停過團隊活動，係韓國史上最長壽嘅偶像組合！佢哋亦以呢樣嘢登上咗健力士世界紀錄！

同時每次團體合約完咗，都係將 6 位成員嘅團體合約一齊轉去新公司，佢哋甚至係 K-pop 史上，第一隊自己成立公司去管理團體合約嘅組合㖭！


雖然出道時間比上面 3 個組合遲，但係佢哋嘅人氣其實都唔差㗎！呢 24 年間亦有好多膾炙人口嘅歌曲，大家啲歌都好經常出現喺唔同嘅綜藝節目中，而佢哋喺節目上發揮出嘅出色綜藝感，都係男團中數一數二嘅～

話就話係第一代男團，不過喺成員全部服完兵役嘅 2012 年，再次完整體活動期間播出嘅團體綜藝節目《神話放送》就吸引咗唔少年紀比較輕嘅粉絲，而且佢哋由嗰陣開始都有繼續出團體新歌，都令到唔少人可以透過音樂接觸返佢哋。


撰文：小薯仔
資料來源：維基百科、Namu Wiki及網上資料
照片來源：newszeen @tistory 網站；길거리 인문학도 Naver Post 網站 / Douban；eramorrgetta @tistory網站；DJ Koo、H.O.T.、Tony An Instagram；SECHSKIES、SHINHWA Facebook


Follow埋Timable FB同IG
FB：https://www.facebook.com/timable.hk
IG：https://www.instagram.com/timable/

立即下載Timable App，隨時隨地捕捉本地活動資訊
iOS/Android：https://bit.ly/timable_app