【睇劇2022】韓劇《二十五，二十一》5大拍攝取景地 回憶心動的青澀戀愛

近排令唔少觀眾都非常投入嘅其中一套大熱韓劇《二十五，二十一》，除咗喺韓國收視不斷創新高，喺 Netflix (特別係韓國) 更加係成日都喺排行榜嘅榜首！

故事就行青春愛情路線，男女主角金泰梨同南柱赫外型合襯之外，每一集嘅台詞、運鏡同一眾演員嘅演技都非常精彩㗎！當中亦留下咗一幕幕經典場面，唔知大家又會唔會經常回想起呢？而韓國觀光公社香港支社 (KTOHK) 就好貼心地為大家整合咗 5 個劇中經典場面嘅拍攝地點，等大家可以喺疫情過後飛去重溫青澀主角們嘅心動時刻！


第一站：聲音磨坊 (소리 방앗간)
地址：全羅北道全州市完山區西學 3 街 63 號西學洞藝術村 (전주시 완산구 서학 3 길 63 서학동 예술마을)；全羅北道全州市完山區西學 3 街 85-3 (전주시 완산구 서학 3 길 85-3)
網站：http://www.seohakro.com/seohak-home/
由南柱赫飾演嘅男主角白易辰，劇中就喺一間叫 명진 책 대여점 嘅漫畫店度做兼職，呢間舖頭嘅原名就叫「소리 방앗간」，即係聲音磨坊。喺劇集播出之後，即刻吸引咗唔少人去打卡！不過當然就見唔到白易辰呢位暖男啦～


聲音磨坊其實係位於西學洞藝術村裡面，藝術村嘅特色小店林立，包括由攝影師開設嘅攝影藝廊，仲有咖啡店、書店等嘅舖頭，充滿咗文藝氣息！而且距離全洲韓屋村都唔太遠，結束喺韓屋村嘅觀光行程，不妨可以嚟呢度行下㗎！


第二站：寒碧窟 (한벽굴)
地址：全羅北道全州市完山區校洞山 7-2 (전주시 완산구 교동산 7-2)
雖然每集嘅結尾都係經典場面，但係第 2 集最後嘅幾分鐘，由金泰梨飾演嘅女主角羅希度，喺隧道口同被爸爸債主追數嘅白易辰講嘅一番話，就成為咗劇中經典台詞之一：「以後只有我同你兩個一齊玩嗰陣，你可以背住佢哋覺得幸福。只有我同你一齊嘅時候，就偷偷地享受片刻嘅幸福啦。」

呢個咁經典嘅場面原來係喺全洲一個叫「寒碧窟」(한벽굴) 嘅地方拍攝。呢度係 1931 至 1981 年間，全羅線列車會通過嘅一條隧道，不過而家就變成咗全洲市民嘅散步熱點。夏天嘅寒碧窟，就好似劇中場景呈現出嚟咁，綠意盎然；去到秋天就會有紅黃相間嘅楓葉做點綴，真係可以講話係唔同季節性有唔同景色！同聲音磨坊一樣，喺播出後都吸引咗唔少劇迷去到隧道口朝聖同打卡。


而寒碧窟附近仲有被指定為全羅北道第 15 號有形文化財產嘅寒碧堂 (한벽당)，呢個係喺 1404 年由朝鮮王朝嘅開國元勳兼文臣—月塘崔湛先生，為自己所修建嘅別墅閣樓。因為位於僧岩山峭壁嘅旁邊，所以周圍嘅景色都好靚！喺寒碧堂俯瞰嘅雲霧景色，更加被評為全洲八景之一㖭！


第三站：馬羅尼矣公園 (마로니에공원)
地址：首爾特別市鐘路區大學路104 (서울특별시 종로구 대학로 104)
網站：http://parks.seoul.go.kr
喺第 8 集嘅結尾，羅希度同網友「糯米糕」喺網上面傾咗 3 年偈，終於決定見面，於是雙方就相約拎住黃玫瑰喺馬羅尼矣公園見面。點知原來「糯米糕」嘅真正身份係由苞娜飾演，一直睇羅希度唔順眼嘅高宥琳，佢發現一直以嚟同自己傾心事嘅網友竟然係羅希度嗰陣，嚇到將手中嘅黃玫瑰塞畀旁邊嘅白易辰，仲匿埋咗喺遠處。因為咁，令羅希度誤以為「糯米糕」就係白易辰，仲好霸氣同佢講「我要擁有你」㖭！


馬羅尼矣公園係因為種咗好多馬羅尼矣樹而得名。呢個作為首爾市民文化藝術基地而設立嘅公園，過去曾經係首爾大學文、理、法學院嘅所在地，而家就變咗舉辦各種露天文化活動、雕塑展覽嘅場地，仲匯聚咗文藝會館等各種文化設施，令呢個年輕文化藝術之地散發出獨特嘅文化氣息。


第四站：三浦海水浴場 (삼포해수욕장)
地址：江原道高城郡竹旺面三浦里 (강원도 고성군 죽왕면 삼포리)
網站：http://sampobeach.co.kr/
喺第 10 集，白易辰拍攝緊羅希度同高宥琳嘅紀錄片嗰陣，發現佢哋好想去從來都冇經歷過嘅校外教學 (即係修學旅行)，於是就帶佢哋，同埋佢哋嘅同學—由李宙明飾演嘅池昇琬以及由崔顯旭飾演嘅文智雄一齊去海邊旅行，製造回憶。


太梁高中 5 人幫去嘅海邊，就係位於江原道高城郡嘅三浦海水浴場。高城郡位於東海岸嘅最北邊，有好多著名嘅旅遊勝地，例如係花津浦海水浴場同 HANI 薰衣草農場等。而三浦海水浴場就係唔少韓國人都推薦嘅度假勝地，水清沙幼，連韓國綜藝節目《帶輪子的家》都曾經喺呢度進行拍攝㗎！如果入住埋海邊嘅酒店，更可以隨時將迷人海景同醉人日落一覽無遺！


最後一站：春川大橋 (춘천대교)
地址：江原道春川市槿花洞 (강원도 춘천시 근화동)
仲記唔記得喺第 9 集最後同第 10 集嘅開頭，白易辰喺橋上面對羅希度嘅動人表白？相信嗰幕都令好多螢幕前嘅觀眾心動到係咁尖叫—「我愛緊妳呀羅希度！」、「無論妳做咩，展現出邊種模樣，我都愛原原本本嘅嗰個妳呀！」一句句直球式嘅告白，都令一眾劇迷對住個螢幕瘋狂大嗌「白易辰咁樣『勾引』對方根本有罪呀！」

其實呢幕經典場面嘅拍攝地點，正正就係位於江原道嘅春川大橋。呢條大橋全長 1058 米，闊 25 米，連接槿花洞同中島，亦可以通去暫定今年 5 月 5 日開幕，全球首個位於島上嘅樂高樂園—春川 Legoland 嘅入口。

呢條大橋嘅設計好獨特，中間部分有個巨型嘅圓形～橋上亦設有一條散步步道，唔少春川嘅市民都會喺上面一邊散步一邊欣賞兩邊美麗嘅江景，而夜晚大橋亮燈之後都好靚㗎！可以話春川大橋喺日頭同夜晚有截然不同嘅魅力！


整理：小薯仔
資料由韓國觀光公社香港支社 (KTOHK) 提供
照片來源：韓國觀光公社香港支社 (KTOHK)、《二十五，二十一》劇照 / tvN

---

延伸閱讀：
【抗疫2022】Netflix 近期韓劇推介 留喺屋企實有嘢睇！#2
https://timable.com//zh-hk/blog/2142722

【抗疫2022】Netflix 3月片單推介 留喺屋企實有嘢睇！
https://timable.com//zh-hk/blog/2140530

Follow埋Timable FB同IG
FB：https://www.facebook.com/timable.hk
IG：https://www.instagram.com/timable/

立即下載Timable App，隨時隨地捕捉本地活動資訊
iOS/Android：https://bit.ly/timable_app