【香港行山路線2022】5條靚景中級行山徑｜最啱睇星星／日出日落｜週末好去處

最近越嚟越多人行山，輕鬆嘅行山徑可能都已經行過晒。想再挑戰自己嘅話，一於行啲中級難度嘅行山路線，相對亦都會比較少人冷門～ 今次就搵咗5條靚景嘅中級行山路線畀大家，可以趁週末得閒同屋企人或者朋友一齊去！當中仲有啲可以喺夜晚睇到超級多嘅星星，又或者睇到日出日落嘅靚景，想知喺邊度就繼續睇埋落去啦！新手入門就唔好亂咁挑戰啦～最緊要注意安全。

---

西貢區行山點 1. 龍蝦灣郊遊徑

雖然話係中級難度，但第一條都選擇啲冇咁難嘅畀大家，大概1小時多啲就行完，啱晒男女朋友、一堆朋友或者去開行山嘅一家大細一齊去。因為附近有好多遊樂設施，可以畀大家玩足全日啊！起點嘅大坑墩公園有燒烤場同小食亭，行多幾步仲有風箏場可以放風箏。沿住郊遊徑突出海面嘅清水灣郊野公園東岸行，路程唔算太難，而且仲有好多打卡位畀大家影吓相，放鬆一下。經石級行到上去大嶺峒觀景台，就能夠全方位俯瞰到牛尾海、清水灣等多個海灣，仲有布袋澳、牛尾洲、吊鐘洲、火石洲，以及果洲群島，真係會感受到世界之大，自己嘅渺小。


難度︰★★✩✩✩
全長︰約2.3公里
時間︰約1小時

前往交通方式：
於清水灣道「大坳門站」下車後，沿清水灣道步行約20分鐘至大坑墩入口。

離開交通方式：
沿龍蝦灣路步行約30分鐘，返回大坳門路乘九巴或小巴離開。

九巴路線 - 91
專線小巴 - 16, 103 及 103M

---

新界北區行山點 2. 吉澳文化徑

吉澳，又名為「大鵬明珠」，全因島上風光秀麗，每個位都係打卡位！佢係新界東北部面積最大嘅島嶼，島形曲折，擁有多個海灣。當地歷史悠久，歷史文化遺跡亦都好多，吉澳文化徑以吉澳大街為中心，整個島嶼嘅路都算平坦。島上有2條行山徑，分別通往高地頂及高棚頂觀景台。兩者路程相約，高地頂觀景台可飽覽深圳鹽田港方向嘅景色；高棚頂觀景台可欣賞到印洲塘嘅景色，行返落山仲有吉澳故事館，當中有唔少當地嘅文化歷史。吉澳仲有一棵好出名嘅浪漫姻緣樹，有成百年歷史。最啱帶埋另一半去樹前許願，祈求大樹保佑呢段姻緣。

如果有時間，仲可以去埋鴨洲。兩個離島只係相差15分鐘嘅船程，而且鴨洲都有好靚嘅行山路線，click入下面嘅連結就可以睇到鴨洲行山徑嘅詳情啦！

鴨洲行山徑：https://timable.com/blog/2143466
吉澳文化徑地圖及詳情：https://www.geopark.gov.hk/static/b5_s2p06.htm


難度︰★★✩✩✩
全長︰約3.5公里
時間︰約2小時

前往及離開交通方式：
搭地鐵至大學站，B出口往左邊走，沿途會經過公廁及單車出租舖頭。沿路會有指示牌，一直行15分鐘就會到達馬料水渡輪碼頭。

渡輪服務 - 馬料水至吉澳 (只限星期六、日及公眾假期，上午9時正開出)
渡輪服務 - 吉澳至馬料水 (只限星期六、日及公眾假期，下午3:30開出)

船程約1.5小時；單程收費：$45
https://www.td.gov.hk/tc/transport_in_hong_kong/public_transport/ferries/kaito_services_map/service_details/index.html#k18

---

新界中區行山點 3. 麥理浩徑(第七段)城門至鉛鑛坳

相信唔少人都聽過麥理浩徑，佢一共有10段，今次就介紹大家行第7段。城門水塘連接往針山嘅路段，上山嘅路程都幾斜㗎，而且仲有過千級樓梯。正所謂「針唔拮到肉唔知痛」，真係要親身行上去先會感受到。山頂上面前係全個沙田嘅景色，背後則可飽覽葵涌、青衣及荃灣景色。隨後再登上647米高嘅草山，就可以睇到更廣闊嘅景觀。一直行到鉛礦坳嘅終點都有唔少靚景，大家不妨可以挑戰吓！


難度︰★★★✩✩
全長︰約6.2公里
時間︰約2.5小時

前往交通方式：
在荃灣兆和街乘搭專線小巴82號往城門水塘菠蘿壩小巴總站，或乘搭途經和宜合道可風中學的公共交通工具，在可風中學下車後，沿城門道上行20分鐘至菠蘿壩小巴總站。

九巴 - 32, 36, 40X, 46P, 46X, 47X, 48X, 73X, 278X, N36, 40P, 46P, 47A, 234C, 273C, 273P, 278P
專線小巴 - 94, 312, 403, 403A, 403X, 94S (94S只在星期日及公眾假期服務。)

離開交通方式：
可由鉛鑛坳繼續步行完成麥理浩徑第八段前往荃錦公路離開, 或由鉛鑛坳沿衛奕信徑第七段步行約一個半鐘到元墩下，再前往新屋家或打鐵屻乘坐專線小巴離開。

專線小巴路線 - 23S 及23K

---

西貢區行山點 4. 北潭涌至標尖角遠足徑

由北潭涌行到去萬宜水庫東壩大約需時3-4小時，但都唔算話非常難行，慢慢行都幾舒服～萬宜水庫東壩有好多特色位，去到一定大開眼界，例如木橋步道、7千多塊嘅防波錨形石、S形六角岩柱、破邊洲等自然及人工景觀。沿着萬宜地質步道往海邊行，會見到巨大嘅管風琴──破邊洲。踏上東壩下一條木橋步道，就可以近距離探視海蝕洞，超級宏偉！位於東壩北面嘅半圓形海角「標尖角」，係唔少香港人嘅打卡位～ 行到上去就可以從高處俯瞰整個東壩，遠眺浪茄灣、罾棚角咀一帶嘅風景，更可從上而下欣賞六角形嘅火山岩柱。

破邊洲詳情：https://timable.com/blog/1900022


難度︰★★★✩✩
全長︰約11.3公里
時間︰約3.5小時

前往交通方式：
可乘搭九巴或小巴前往北潭涌，閘口即起點位置。

離開交通方式：
沿路返回大網仔路，然後乘搭九巴或小巴離開。星期日及公眾假期可於東壩乘坐專線小巴9A返回北潭涌。

九巴路線 - 94, 96R (96R只在星期日及公眾假期行駛）
專線小巴路線 - 7, 9 及 9A ( 9A只在星期日及公眾假期行駛）

---

新界北區行山點 5. 印洲塘郊遊徑

香港首份非物質文化遺產清單中包含客家文化，全因佢哋正逐漸消失。船灣郊野公園東北海岸嘅荔枝窩，就有條超過四百年歷史嘅圍村，係香港保存得最好嘅客家圍村。除咗文化歷史豐富之外，仲有多種植物、淡水生物及動物，而且仲包括瀕危嘅黃胸鵐同稀有嘅燕鳳蝶。村內亦有多棵特色古樹，例如全港最大嘅銀葉古林、樹幹中空嘅秋楓樹等。另外更可以欣賞到全港最大嘅紅樹林，鍾意大自然嘅你哋必定要嚟行吓。行到去三椏涌海岸，就睇到晒整個印洲塘海岸公園，鐵質含量極高嘅砂岩造成呢個橙粉紅色嘅海灣，因岩層形成時嘅高溫狀態加強了氧化條件所致。


難度︰★★★✩✩
全長︰約13.2公里
時間︰約6小時

前往交通方式：
可乘搭九巴或小巴前往烏蛟騰祠心路路口，再沿烏蛟騰路直走至盡頭，起點在左邊。

離開交通方式：
沿路返回起點乘搭公共交通工具離開。在星期日及公眾假期，可於荔枝窩乘搭渡輪前往馬料水離開。

九巴路線 - 275R (275R只於星期日及公眾假日行駛)
專線小巴路線 - 20R
渡輪服務 - 只限星期日及公眾假期（下午3:30一班）


資料來源：漁農自然護理署
www.hiking.gov.hk

編輯：Athena

---

延伸閱讀：


【香港行山路線2022】5大輕鬆親子行山徑｜一小時行完仲有靚景打卡位｜週末好去處
詳情：https://timable.com/blog/2143466

【港島行山郊遊】新手必行！5大輕鬆簡單秋冬行山路線
詳情：https://timable.com/blog/2024423

【香港周圍遊】西貢萬宜水庫東壩壯麗景色 行山兼睇世界級地質奇觀
詳情：https://timable.com/blog/1985693

【香港遊】靚景行山路線 「破邊洲」欣賞海平線
詳情：https://timable.com/blog/1900022

【香港行山路線2022】5條西貢靚景行山路線｜有齊不同難度｜週末好去處
詳情：https://timable.com/blog/2161130

---

Follow埋Timable FB同IG
FB：https://www.facebook.com/timable.hk
IG：https://www.instagram.com/timable/

立即下載Timable App，隨時隨地捕捉本地活動資訊
iOS/Android: https://bit.ly/timable_app