今屆金像獎將會喺 7 月 17 日假九龍灣國際展質中心匯星舉行,而所有獎項嘅提名名單都已經喺 2 月公佈咗,入圍最佳男配角就包括古天樂、林雪、馮皓揚、柯煒林同謝君豪 5 位演員。

一齊嚟睇下小薯仔整理嘅 5 位入圍演員簡介啦:


古天樂《梅艷芳》
演員 IG:https://www.instagram.com/kootinlok_louis
喺電視台拍劇出身嘅古天樂,千禧年頭嘅《尋秦記》時不時都有唔少人提起,而拍完呢套劇之後,佢嘅演藝事業重心就轉移去電影方面,產量亦非常多。喺 2008 年憑《門徒》提名金像獎最佳男配角之後,今次係相隔 14 年後第 2 次獲得呢個獎項嘅提名。

喺《梅艷芳》呢套戲裡面,佢飾演以劉培基為原型嘅時裝設計師 Eddie,係梅艷芳嘅形象設計師、恩師兼摯友。好多觀眾睇完都覺得佢呈現出嚟嘅造型神態同劉培基本人都算幾神似,不過其他幾位入圍演員嘅演出都唔可以忽視,又要睇下手中有一票嘅相關人士會唔會對佢投下呢一票了~


林雪《殺出個黃昏》
1986 年加入香港電影圈嘅林雪,參演過唔少電影,喺 2000 年首次憑《鎗火》獲得金像獎嘅最佳男配角提名,今次係佢第 3 次獲得呢個獎項嘅提名。

喺佢以往嘅電影演出中,唔少角色都係配角。今次喺《殺出個黃昏》飾演殺手三人組嘅車手葉一叢,戲份就相對較重,亦係 3 條故事線中嘅其中一條。特別係佢對顏子菲飾演嘅性工作者菁菁動情,可惜襄王有心,神女無夢,到最後仲畀「人情」祝福佢結婚嘅情節都令好多觀眾留下印象。喺戲中其他場口嘅演出亦獲得好多好評,所以都係有力嘅奪獎候補。


馮皓揚《媽媽的神奇小子》
演員 IG:https://www.instagram.com/masonfung1005
馮皓揚 (羊羊) 喺拍攝嘅時候年僅 14 歲,到小薯仔落筆呢刻都只係 17 歲,係所有入圍演員中年紀最細嘅一個。年紀輕輕嘅佢,早前經過深思熟慮後亦決定咗休學,成為一個全職演員。

戲中,佢飾演蘇樺偉嘅少年版,好多人都覺得佢同成年版蘇樺偉 (梁仲恆) 都將角色演得形神兼備,令唔少觀眾都覺得有驚喜!佢嘅演出相信都會為一眾相關人士喺投票時增加苦惱。

而除咗最佳男配角,佢同時都憑呢套電影獲得最佳新演員嘅提名!


柯煒林《濁水漂流》
演員 IG:https://www.instagram.com/willallwailam
柯煒林 (Will) 喺 2016 年拍攝咗人生中第一套長篇電影《點五步》,呢套電影為佢打開咗知名度,之後除咗電影,都陸續演出咗唔少類型嘅作品,包括劇集、MV。而今次係佢參與電影演出後,第一次獲提名金像獎最佳男配角。

喺《濁水漂流》中,佢飾演身上成日帶住口琴,患有失語症嘅「木仔」,係位年青嘅露宿者,亦被吳鎮宇飾演嘅輝哥當係仔一樣。因為角色設定,佢喺戲中幾乎冇對白,所以要透過其他方式去表達情緒同將「木仔」嘅人物性格表現出嚟,佢演繹呢個角色都獲得唔少正面評價~

同羊羊一樣,佢同時都憑呢套戲獲得最佳新演員嘅提名!


謝君豪《濁水漂流》
謝君豪喺舞台劇同電影版《南海十三郎》中嘅精彩演出,仍然令人回味。之後佢參與演出嘅舞台劇同影視作品,亦奠定咗佢喺觀眾心中,係位好戲之人。今次係佢自 2000 年憑《千言萬語》獲得金像獎最佳男配角嘅提名後,第 2 次入圍呢個獎項。

喺電影裡面,佢飾演由越南嚟到香港,人生起伏好大嘅難民「老爺」。比起佢以前演出嘅角色,今次嘅造型同演繹都有個好大嘅轉變,好多人喺睇嗰陣未必第一時間會認得係佢。而且佢同個仔視像通話嘅嗰一幕,唔少觀眾都讚佢嘅情緒變化同面部表情非常細膩!唔知呢一幕又會唔會打動到相關人士,為佢投下一票呢?


撰文:小薯仔
資料來源:維基百科、香港電影金像獎網頁、媒體訪問及網上資料
照片來源:《梅艷芳》、《殺出個黃昏》、《媽媽的神奇小子》、Blacklight Artist Management Facebook;柯煒林 Instagram;「安樂影片 Edko Films Ltd」YouTube 上載之《殺出個黃昏》電影製作特輯影片截圖;Yahoo 奇摩電影《濁水漂流》頁面


延伸閱讀:
哥哥張國榮5套電影推介 當中有你鍾情嘅作品嗎?
https://timable.com/blog/2163967

【金像獎2022】金像獎4位入圍最佳男主角 大前輩同新人邊位會脫穎而出?
https://timable.com/blog/2174406

【金像獎2022】金像獎5位入圍最佳女主角 前輩新人各有優勢
https://timable.com/blog/2163068

【金像獎2022】金像獎5位入圍最佳女配角 前輩新人競爭激烈
https://timable.com/blog/2150199

【金像獎2022】今屆角逐各獎項嘅電影你睇過幾多?一文整理20套獲提名電影
https://timable.com/blog/2133881


Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下載Timable App,隨時隨地捕捉本地活動資訊
iOS/Android:https://bit.ly/timable_app