【香港行山路線2022】5條西貢靚景行山徑｜有齊不同難度｜週末好去處

西貢被譽為「香港後花園」，講起西貢，多數都會諗起去食海鮮，但除此之外仲有其他好去處㗎。今次就介紹5條西貢區嘅靚景行山路線畀大家，由輕鬆入門級到難度高嘅都有，方便大家選擇條啱自己行嘅路。最緊要係量力而為，記得注意安全同埋保護大自然啊～趁住天氣好嘅週末，就同屋企人或者男女朋友一齊去啦！

---

西貢區行山點 1. 荔枝莊地質景點

如果鍾意睇充滿年月洗禮嘅大自然景觀嘅你，就一定要去呢個位於赤門海峽東南岸嘅荔枝莊。荔枝莊海岸嘅岩石，係由火山湖以及火山附近湖底嘅泥沙混合火山灰固結形成。火山灰及被沖入湖底嘅泥沙反覆疊加，形成顆粒粗幼不一，顏色深淺交替嘅深淺色岩石，佢嘅紋路超多層次，真係睇得出係時間嘅痕跡。灘岸嘅紅樹林，加上岸邊同埋海水下面色彩變幻嘅岩石，真係好似去咗世外桃源，望住一日都唔會厭。咁特別嘅地質公園，喺香港真係唔係咁容易睇到㗎，真係好值得去一次～

＊出發前請睇清楚潮汐漲退嘅時間啊！
https://www.hko.gov.hk/tc/tide/predtide.htm


難度︰★✩✩✩✩
全長︰約1公里
時間︰約1小時

前往及離開交通方式：
可從西貢墟乘坐7號專綫小巴，在海下路白沙澳下車，沿山徑步行前往，路程約3.5公里；或乘坐街渡渡輪前往荔枝莊。

渡輪服務 - 馬料水至塔門 (途經荔枝莊)
星期一至五 - 08:30, 15:00
星期六、日及公眾假期 - 08:30, 12:30 及 15:00

渡輪服務 - 塔門至馬料水 (途經荔枝莊)
星期一至五 - 11:40, 18:00
星期六、日及公眾假期 - 11:40, 14:15 及 18:00

---

西貢區行山點 2. 大灘郊遊徑

沿住大灘郊遊徑一路行，就可以欣賞到西貢獨特多變嘅海岸風光，睇到香港清晰嘅海岸線，夠晒靚！路途主要都係以大石以成，行吓行吓就會到達紅樹林，可以見到可愛嘅彈塗魚及招潮蟹，仲有其他罕見嘅動植物。沿路一直行，能夠遠眺蚺蛇尖、高流灣及塔門等地，包保全程都大靚風景。去到海下灣，仲有可以欣賞到清澈見底嘅海洋。大家記得唔好亂拋垃圾啊！


難度︰★★✩✩✩
全長︰約6.7公里
時間︰約2.75小時

前往交通方式：
在西貢墟乘7號小巴至海下路近猴塘溪下車。

離開交通方式：
在海下路尾乘搭7號專線小巴返回西貢墟。

---

西貢區行山點 3. 萬宜地質步道

除咗吉澳有罕見嘅地質岩石之外，原來西貢區都有！萬宜水庫東壩只係距離西貢市中心大約40分鐘嘅車程就到啦～企喺壩上，一邊係香港儲水量最大嘅人工水庫，而另一邊就係壯麗嘅六角岩柱群，可以話係世界級嘅景觀啊。岩柱由熔岩、岩屑及火山灰的混合物冷卻後收縮而成，大約喺1億4千萬年前形成；而另一幅S形扭曲嘅六角形岩柱，係由劇烈嘅地殼運動，令當時未完全凝固嘅岩柱扭曲摺疊，變成現時咁獨特嘅S字形。一路往海邊行，仲可以見到破邊洲，佢就好似一件蛋榚切件，超特別。去到東壩下一條木橋步道，仲可以近距離探視海蝕洞。

破邊洲詳情：https://timable.com/blog/1900022


難度︰★★✩✩✩
全長︰約4.3公里
時間︰約3小時

前往及離開交通方式：
1. 乘搭九巴路線94號或96R(96R只在星期六、日及公眾假期行駛）前往「上窰」巴士站，沿大網仔路前行至岔路口，靠右沿西貢萬宜路繼續步行約9公里；或

2. 可於北潭涌乘坐專線小巴路線9A (只在星期日及公眾假期) 往返北潭涌與萬宜水庫東壩。

---

西貢區行山點 4. 麥理浩徑(第一段)北潭涌至浪茄

今次介紹另一段麥理浩徑畀大家，路段都算長，但就相對平坦，去之前要有定心理準備。上面講完萬宜水庫，嚟到呢度就可以離遠欣賞到呢個「玻璃水庫」啦，仲可以一次過睇晒山景同埋海景，真係好靚啊～行完呢段嘅行山徑，可以選擇繼續行第2段，或者去浪茄灣營地休息吓。浪茄灣嘅海岸都有唔少靚景可以畀大家影吓相，有流紋岩嘅獨特風景。流紋岩係細小粒狀嘅火山岩，喺溶岩面層與底層以急速及不同冷卻速度嘅情況下形成。大家可以盡情欣賞流紋岩所形成嘅灰啡色六角柱體，又或者留低睇日落及星星，都係一個唔錯嘅選擇。


難度︰★★★✩✩
全長︰約10.6公里
時間︰約3小時

前往交通方式：
可乘搭公共交通工具前往「上窰」巴士站；或乘搭專線小巴於大網仔路及北潭路交界落車。

九巴路線 - 94, 96R（96R只在星期六、日及公眾假期行駛）
專線小巴路線 - 7 及 9

離開交通方式：
由浪茄返回東壩乘坐專線小巴路線9A（只在星期日及公眾假期行駛）至北潭涌巴士總站，或前往西灣亭乘坐居民巴士NR29到西貢大會堂。

---

西貢區行山點 5. 大浪灣遠足徑

呢條比較難嘅行山徑，大家要量力而為，記得帶齊裝備先好去啊！唔少行山友都好鍾意去嘅大浪灣遠足徑，會途經兩個面向太平洋嘅海灣，全個路程都會覺得香港真係好靚呀！西灣及鹹田灣嘅海水夠晒藍，水清沙幼，一定會影相影到唔捨得走。去到西灣至赤徑段，可以發現岸壁與石頭有岩層嘅變化。原來呢一段路係大約1億4千多萬年前，西貢火山活動創造嘅多道岩層之上，完全感受到大自然嘅威力。


難度︰★★★★✩
全長︰約12公里
時間︰約5小時

前往交通方式：
於西貢市中心乘坐鄉村小巴NR29至西灣路尾下車，起點位於西灣亭。

離開交通方式：
在北潭坳乘搭公共交通工具離開。

九巴路線 - 94及96R (96R只在星期六、日及公眾假期行駛)
專線小巴路線 - 7

---

資料來源：漁農自然護理署
www.hiking.gov.hk

編輯：Athena

---

延伸閱讀：


【香港周圍遊】西貢深涌大草原 全平路適合新手親子遊
詳情：https://timable.com/blog/1991194

【香港周圍遊】西貢萬宜水庫東壩壯麗景色 行山兼睇世界級地質奇觀
詳情：https://timable.com/blog/1985693

【香港周圍遊】西貢海下熱門打卡位 到底好唔好影?
詳情：https://timable.com/blog/2111227

【香港遊】靚景行山路線「破邊洲」欣賞海平線
詳情：https://timable.com/blog/1900022

【香港郊遊路線2022】港島熱門靚景打卡位｜輕鬆到達最啱睇日落｜週末好去處
詳情：https://timable.com/blog/2169446

---

Follow埋Timable FB同IG
FB：https://www.facebook.com/timable.hk
IG：https://www.instagram.com/timable/

立即下載Timable App，隨時隨地捕捉本地活動資訊
iOS/Android: https://bit.ly/timable_app