YouTube video


相信大家都仲記得喺 2020 年 12 月,Netflix 就上咗一套改編自日本漫畫家麻生羽呂同名漫畫嘅日劇,叫《今際之國的有栖》(台灣譯做《今際之國的闖關者》) 。呢套漫改劇一上架之後就大受歡迎,有唔少觀眾都大讚故事設定、劇中遊戲同視覺效果等嘅元素非常吸引佢哋追落去,個個都話好緊張好刺激!


Netflix 喺套劇上咗架兩個星期後,就宣佈會製作第二季。而今日,日本 Netflix 嘅官方社交平台就 post 咗一眾主要演員,包括山﨑賢人、土屋太鳳、村上虹郎、三吉彩花、櫻田通、朝比奈彩、青柳翔 同仲里依紗嘅煞科感言,山﨑賢人都喺自己嘅社交媒體上放咗煞科嘅相。最重要係,佢哋都喺 caption 寫咗《今際之國的有栖》第二季會喺 2022 年 12 月,喺全球嘅 Netflix 獨家上架!講咗兩年嘅第二季終於都有確實消息,一眾劇迷漫畫迷應該都好興奮!

講咗咁多,不如趁呢個時間嚟重溫下《今際之國的有栖》第一季嘅故事概要同呢季一啲主要角色簡介:


第一季一共有 8 集,描述無所事事嘅「玩家」有栖良平同兩個朋友被困喺今際之國-一個平行時空下嘅東京。佢哋同其他一齊被困嘅「玩家」們,被逼參加一系列既危險又暴虐無情嘅「遊戲」,而遊戲類型同難度都由啤牌嘅 4 個花色決定。喺第一場遊戲中生存落嚟嘅玩家會獲得「簽證」,參加嘅遊戲越多,簽證時間就會越長;而簽證到期嘅玩家將會被從空中射出嘅紅色雷射光處決。

葵扇 (黑桃) 代表要用體力取勝嘅遊戲,梅花代表要團隊合作嘅遊戲,階磚 (方塊) 代表要「食腦」,靠智力嘅遊戲,而紅心就係「心理遊戲」,想贏就要靠玩弄人心同背叛夥伴。


有栖良平|山﨑賢人 飾演
演員 IG:https://www.instagram.com/kentooyamazaki
佢對生活失去咗目標,又覺得同屋企格格不入,於是成日都沉迷喺 online game (線上遊戲) 之中。

有一日夜晚同苅部大吉,以及勢川張太,呢兩位好朋友一齊出去玩嗰陣,意外地被困喺「今際之國」裡面,為咗生存就不斷參加各種遊戲,然後發現自己擅長「紅心 (♥)」遊戲。


宇佐木柚葉|土屋太鳳 飾演
演員 IG:https://www.instagram.com/taotsuchiya_official
身為登山 (攀岩) 高手嘅宇佐木柚葉,因為長期訓練嘅關係,所以體能好好,擅長「葵扇 (♠)」遊戲。而佢亦喺遊戲中依靠力量存活,同時通過咗最艱苦嘅時刻。


苅部大吉|町田啟太 飾演
演員 IG:https://www.instagram.com/keita_machida_official
生性驍勇善戰嘅苅部大吉,本身係調酒師嚟,不過因為同老闆嘅情人「有路」,而被「炒魷魚」。喺「今際之國」中,就同宇佐木柚葉一樣,擅長「葵扇 (♠)」遊戲。


勢川張太|森永悠希 飾演
演員 Twitter:https://twitter.com/morry0629
缺乏抱負嘅勢川張太,係位非常忠誠嘅 IT 公司員工。但係佢其實最享受嘅係,同有栖良平以及苅部大吉相處嘅時間~喺「今際之國」,佢就擅長「梅花 (♣)」遊戲。

然而因為喺參加名為「是生是死」嘅遊戲嗰陣,他隻腳被嚴重燒傷,所以就拖慢咗兩個朋友嘅進度。


苣屋駿太郎|村上虹郎 飾演
演員 IG:https://www.instagram.com/rainbowsan
神秘安靜又狡猾嘅苣屋駿太郎,擅長「階磚 (♦)」遊戲。佢同另一位玩家-水雞光合作偷咗「海濱」創辦人兼領導者帽匠嘅一副啤牌。另一方面,其實佢係一個人挖掘緊「今際之國」嘅秘密。

喺幫助有栖同宇佐木逃脫「鬼抓人」呢個遊戲之後,就開始對佢哋產生咗興趣。


粟國杜園|青柳翔 飾演
佢係「海濱」裡面「武鬥派」嘅大佬,亦係帽匠最好嘅朋友。每次佢喺參加遊戲嘅時候,都會表現出壓倒性力量嘅戰士,亦係擅長「葵扇 (♠)」遊戲嘅玩家。不過喺第一季嘅結局附近,佢被逼殺死咗帽匠,自此就逐漸成為一個既自戀又兇殘嘅領導者。


加納未來|仲里依紗 飾演
演員 IG:https://www.instagram.com/riisa1018naka
成日展現微笑嘅加納未來係個優雅而神秘嘅女人,擅長「紅心 (♥)」遊戲。佢喺「海濱」嘅地位非常重要,亦係喺劇情發展中一個非常關鍵嘅角色。喺第一季嘅結局,她就開啟咗收集人頭牌 (J、Q、K) 嘅第二階段遊戲。

原著漫畫嘅第二季就係下一輪遊戲嘅開始,亦會出現人頭牌 (J、Q、K) 嘅關卡;而「今際之國」嘅國民都會登場同一眾玩家玩遊戲。究竟劇集嘅第二季會唔會跟返呢個走向呢?又會加入咩新嘅角色?大家一齊拭目以待!

如果對第一季嘅印象(無論係角色定劇情)都已經變得模糊,咁就要快啲上 Netflix 重溫了~

注意:呢篇文章所放出嘅只係 2020 年宣佈籌備第二季嘅片段,並未係真正預告。當真正預告釋出嘅時候就會更新返。


撰文:小薯仔
資料來源:Netflix《今際之國的有栖》頁面、維基百科、媒體報導
照片來源:《今際之國的有栖》官方網站;山﨑賢人 Instagram


延伸閱讀:
【睇劇2022】Netflix 4月上架韓劇推介 打發時間實有嘢睇!
https://timable.com//zh-hk/blog/2161103

【睇劇2022】3套人氣BL劇推介!睇完令腐女心大爆發
https://timable.com//zh-hk/blog/2147951

【抗疫2022】Netflix 近期韓劇推介 留喺屋企實有嘢睇!#2
https://timable.com//zh-hk/blog/2142722

【抗疫2022】Netflix 3月片單推介 留喺屋企實有嘢睇!
https://timable.com//zh-hk/blog/2140530


Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下載Timable App,隨時隨地捕捉本地活動資訊
iOS/Android:https://bit.ly/timable_app