【金像獎2022】金像獎5位入圍最佳女主角 前輩新人各有優勢

今屆金像獎將會喺 7 月 17 日假九龍灣國際展質中心匯星舉行，而所有獎項嘅提名名單都已經喺 2 月公佈咗。之前介紹過入圍最佳男女配角嘅演員，今次講下入圍最佳女主角嘅演員，包括周秀娜、王丹妮、劉雅瑟、吳君如同埋鞏俐。

一齊嚟睇下小薯仔整理嘅 5 位入圍演員簡介啦：


周秀娜《馬達‧蓮娜》
演員 IG：https://www.instagram.com/chrissienana
近年將事業重心主要放喺電影上嘅周秀娜 (Chrissie)，2017 年憑《29+1》令大眾眼前一亮，仲首次被提名金像獎最佳女主角，今次係相隔 5 年後，佢第 2 次獲得呢個獎項嘅提名。

喺《馬達．蓮娜》中，佢飾演由外地去到澳門賺錢嘅蓮娜，日一份夜一份，同搭開嗰架的士嘅司機馬達 (張繼聰飾演) 慢慢發展出一段感情。戲中嘅佢舉手投足上都有種經歷咗好多嘢嘅感覺，亦做到嗰種離鄉別井打工嘅無奈。唔少觀眾都覺得佢比起《29+1》嗰陣嘅演技成熟咗唔少～


王丹妮《梅艷芳》
演員 IG：https://www.instagram.com/l_for_louise
本身係模特兒嘅王丹妮 (Louise)，喺出演《梅艷芳》前，係完全冇參與過任何電影或劇集嘅拍攝。而呢套出道作，就為佢帶嚟人生首個金像獎最佳女主角同埋最佳新演員嘅提名。

喺試鏡嗰陣，已經被大讚同梅艷芳相似。由於佢冇演出經驗，所以喺開拍前接受咗半年嘅訓練，由演技、歌曲到舞蹈，再到真．梅艷芳嘅神態等都喺呢段期間落力揣摩；而戲中嘅造型、佢嘅眼神、一啲表情、聲線同講嘢方式，令大部份入場嘅觀眾都覺得佢同梅姐嘅氣質非常相似，亦令佢成為今屆嘅影后大熱之一！


劉雅瑟《智齒》
演員 IG：https://www.instagram.com/liuyase
2012 年嘅《致我們終將逝去的青春》為劉雅瑟打開更大嘅知名度，2020 年嘅《麥路人》「媽媽」一角令佢獲得首個金像獎最佳女配角提名，而《智齒》就係佢首次喺香港電影中擔任第一女主角 (同時係佢從影以嚟第一套三級片)，亦為佢帶嚟第一個金像獎最佳女主角提名。

戲中佢飾演誤殺斬哥 (林家棟飾演) 妻兒，再被拾荒者山田收 (池內博之飾演) 綁架嘅街童王桃。雖然有打人嘅場面，但係大部分時間都係處於被虐打嘅狀態，極度搏命嘅演出同細緻嘅角色演繹，令好多人都對佢讚譽有加，甚至先攞咗今屆香港電影評論學會大獎嘅最佳女演員！所以佢亦係另一位影后大熱嘅人選～


吳君如《媽媽的神奇小子》
演員 IG：https://www.instagram.com/sandrangky
吳君如從影以嚟已經拍咗過百套電影，過去曾經獲得 6 次金像獎最佳女主角提名 (喺 1998 年第一次獲獎)，今次係佢第 7 次獲得呢個獎項嘅提名。

今次喺《媽媽的神奇小子》裡面，佢有兩個身份－第一個係飾演蘇樺偉嘅媽媽，第二就係呢套戲嘅監製。佢喺開拍前都有親自去拜訪蘇媽媽，喺傾偈過程中去了解蘇媽媽，並將對方嘅性格特質、同阿仔嘅日常相處等元素再加自己嘅詮釋，去演繹返呢個角色；同梁仲恆 / 馮皓揚嘅母子情都感動到唔少觀眾！佢憑呢套電影攞到影后嘅呼聲亦都好高～


鞏俐《奪冠》
自 1987 年踏入影圈後，鞏俐主演嘅電影好多都非常有名，亦創造咗無數經典角色，到而家喺國際影壇都係成就，地位同影響力最高嘅華人女演員。攞過無數次嘅國際電影獎項，今次係佢第 4 次獲得金像獎嘅最佳女主角提名 (喺 2007 年第一次攞到呢個獎)。

喺《奪冠》中，佢飾演中國女排嘅重要人物，同時亦係傳奇－郎平。喺開拍前，佢做咗非常多嘅準備，令自己進入角色。雖然佢呈現出嚟嘅郎平，成個造型都同原本嘅郎平幾乎一樣，喺演繹上亦傳神，不過好多人都覺得比較似《郎平傳》。唔知有票可投嘅相關人士，又會點揀呢？

以上嘅電影中，《智齒》及《梅艷芳》都已經串流上咗香港 Disney+！大家可以喺金像獎頒獎禮前重溫各位入圍演員嘅演出。
未有 Disney+ 睇唔到？立即訂閱：http://disneyplus.bn5x.net/e42ooX


撰文：小薯仔
資料來源：維基百科、香港電影金像獎網頁、媒體訪問及網上資料
照片來源：《梅艷芳》、《智齒》、《媽媽的神奇小子》Facebook；周秀娜、王丹妮、劉雅瑟Instagram；WeDistributionHK YouTube 上載之電影《奪冠》鞏俐成為郎平特輯影片截圖

---

延伸閱讀：
哥哥張國榮5套電影推介 當中有你鍾情嘅作品嗎？
https://timable.com/blog/2163967

【金像獎2022】金像獎4位入圍最佳男主角 大前輩同新人邊位會脫穎而出？
https://timable.com/blog/2174406

【金像獎2022】金像獎5位入圍最佳男配角 前輩新人各有千秋
https://timable.com/blog/2156900

【金像獎2022】金像獎5位入圍最佳女配角 前輩新人競爭激烈
https://timable.com/blog/2150199

【金像獎2022】今屆角逐各獎項嘅電影你睇過幾多？一文整理20套獲提名電影
https://timable.com/blog/2133881


Follow埋Timable FB同IG
FB：https://www.facebook.com/timable.hk
IG：https://www.instagram.com/timable/

立即下載Timable App，隨時隨地捕捉本地活動資訊
iOS/Android：https://bit.ly/timable_app