4 月 1 日本身最令人記得係愚人節,會同身邊人開下玩笑。不過由 2003 年開始,每年嘅 4 月 1 日,懷念總會如約而至,因為呢日係香港其中一位最具標誌性嘅人物同天王巨星,亦係海外影響力仍然深遠嘅「哥哥」張國榮 (Leslie) 永遠離開咗大家嘅日子。

佢個人嘅風采同氣質,直到而家都依舊鮮明地存活喺大家心中,而音樂及影視作品更係有好多經典,經常被提起、被傳頌。好多人喺今日都會想聽下佢嘅歌,睇下佢啲戲,以表達時間冇令佢喺大家嘅記憶中褪色。

小薯仔就精選咗幾套佢唔同類型嘅電影介紹畀大家:


《胭脂扣》
上映年份:1987 年
主演:梅艷芳、張國榮、萬梓良、朱寶意
預告:https://www.youtube.com/watch?v=0M6r6j1g3Ek

「我想等一個命中註定嘅人出現,然後刻骨銘心愛一場,唔計較得失,唔計較結果。」-十二少

故事發生喺 1934 年嘅香港。海味店太子爺陳振邦(十二少)(張國榮飾演) 係經常流連風月場所嘅花花公子,遇上咗石塘咀綺紅樓嘅名妓如花 (梅艷芳飾演),好快打得火熱,不過十二少屋企人反對,於是就走咗出嚟。最後喺山窮水盡下,十二少同如花就吞食鴉片殉情自盡。然而 53 年後,變成鬼魂嘅如花喺陰間等極都唔見十二少,於是就返上嚟人間搵佢,仲遇上咗喺報館做嘢嘅袁永定 (萬梓良飾演) 同佢女友凌楚絹 (朱寶意飾演)⋯⋯

改編自李碧華同名小說嘅《胭脂扣》,故事將敘事焦點放咗喺由梅姐梅艷芳飾演嘅如花身上,不過十二少亦都係一個非常重要嘅人物。梅姐同哥哥喺呢套戲中愛得轟烈,佢哋所起嘅化學作用,絕對令無數觀眾難忘。而哥哥亦曾經喺訪問中提及,自己最鍾意就係十二少呢個矛盾嘅角色。



《阿飛正傳》
上映年份:1990 年
主演:張國榮、張曼玉、劉德華、劉嘉玲、張學友、梁朝偉
預告:https://www.youtube.com/watch?v=MeXKewVM-h0

「我聽人講呢個世界上有一種雀仔冇腳嘅,佢只可以一直咁飛呀飛,飛到攰嗰陣就喺啲風入面瞓覺。呢種雀仔一世只可以落地一次,嗰一次就係佢死嘅時候。」-旭仔

故事以 1960 年代初期為背景,旭仔(阿飛)(張國榮飾演) 自細由養母湊大,未見過生母,所以佢對每個遇到女人好無情。放蕩不羈嘅佢,先後同售票員蘇麗珍 (張曼玉飾演) 以及舞女咪咪 (劉嘉玲飾演) 同居,又相繼拋棄佢哋。之後佢決定隻身去菲律賓搵生母,結果令他再次受到傷害。最後佢做咗一隻無法落地的雀仔,喺飛翔中飛向死亡。

由王家衛執導嘅《阿飛正傳》,難得地集合咗當時得令嘅影壇巨星演出;呢套電影喺金像獎同金馬獎中攞咗最佳電影、最佳導演等重要獎項,亦令哥哥攞咗生前唯一一個香港電影金像獎最佳男主角,可以話喺佢嘅代表作之一。



《霸王別姬》
上映年份:1993 年
主演:張國榮、鞏俐、張豐毅
預告:https://www.youtube.com/watch?v=QBjd8KKl27U

「我是虞姬,虞姬是我。」-程蝶衣

故事開始於1930年嘅北京,由哥哥飾演嘅程蝶衣同張豐毅飾演嘅段小樓都係孤兒,自細就跟住同一個師傅學戲。到咗大個啲,佢哋要決定自己專攻嘅技藝嗰陣,程蝶衣被選擇做「旦」角,而段小樓就做「生」角。幾年後,佢哋合演嘅《霸王別姬》已經名震當地,不過程蝶衣戲內愛上咗虞姬嘅丈夫項羽,戲外就愛上咗段小樓。

小有名氣嘅兩位伶人,亦開始咗兩條唔同嘅路:段小樓同風塵女子菊仙 (鞏俐飾演)戀愛再結婚;悲傷又妒忌菊仙嘅程蝶衣將所有心力投放喺舞台上,仲將自己交咗畀有錢嘅袁四爺 (葛優飾演),成為「佢嘅人」。

喺時代動亂結束後,歷盡滄桑嘅程蝶衣同段小樓再喺同個舞台上合演一段《霸王別姬》,而呢次亦係程蝶衣最後一次演虞姬。

同樣改編自李碧華同名小說嘅《霸王別姬》,係哥哥從影生涯中,其中一套喺國際影壇上有非凡成就嘅電影,喺各個影展上獲獎無數,仲係第一套亦係目前唯一一套奪得法國康城影展最高榮譽-金棕櫚獎嘅華語電影。哥哥將程蝶衣嘅一舉手一投足都演得絲絲入扣,呢套戲呢個角色將佢嘅演技推向顛峰,係佢嘅一個里程碑。



《春光乍洩》
上映年份:1997 年
主演:梁朝偉、張國榮、張震
預告:https://www.youtube.com/watch?v=IP7Jay7IiBU

「不如我哋從頭嚟過。」-何寶榮

呢個故事主要發生喺阿根廷,圍繞黎耀輝(梁朝偉飾演)同何寶榮(張國榮飾演)呢對戀人。由香港去到阿根廷,兩個人都係處於分分合合嘅狀態。有一日,何寶榮買咗盞燈,佢同黎耀輝都覺得靚,於是就出發搵燈上嘅伊瓜蘇瀑布。不過途中盪失路,仲開始發生爭執,最後何寶榮主動提議暫時分開下。

兩個人分道揚鑣後,咁啱都去咗布宜諾斯艾利斯生活。佢哋某日喺黎耀輝工作嘅酒吧中重遇後,亦發生咗好多事。最後黎耀輝選擇離開何寶榮同布宜諾斯艾利斯,再次返到香港。

「兜兜轉轉行咗好多冤枉路,我終於嚟到伊瓜蘇。我覺得好難過,因為我始終覺得企喺呢個瀑布下面應該係兩個人。」-黎耀輝

呢套電影亦係由王家衛執導,以獨特嘅拍攝手法被認為係呈現電影美學嘅經典之作,甚至有人話佢係藝術電影㖭~而哥哥同梁朝偉呢個組合,亦係可一不可再!


《鎗王》
上映年份:2000 年
主演:張國榮、方中信、黃卓玲、陳法蓉、谷德昭

「你返到屋企之後做呢個動作一百次,一千次。直至你每次瞄準嘅目標都準確。一開槍就只有一個目的,就係要贏!」-Rick 彭奕行

由哥哥飾演嘅彭奕行 (Rick),係熱愛鎗械同射擊嘅實戰射擊(IPSC)比賽高手,同時亦係改鎗能手;任職重案組高級督察嘅苗志舜 (方中信飾演) 亦同樣熱愛鎗械同射擊。喺一次比賽中,兩人實力不分高下,不過比賽中途就發生咗意外,令 Rick 舉鎗自衛殺咗人,呢次事件亦令佢患上心理障礙。之後佢牽涉入一宗兇殺案,警方甚至扣押埋 Rick 嘅女朋友,令 Rick 公然挑戰由苗志舜為首嘅專案小組,甚至同警隊火拼,槍傷 / 殺咗好多苗志舜嘅同事⋯⋯

呢套電影可能喺哥哥出演嘅作品中比較冷門,不過其實係佢喺角色上有突破嘅一套電影,因為係佢第一次 (亦係最後一次) 正式扮演反派。呢個角色既複雜又多層次,仲有內心戲同各種情感轉變,哥哥就將自己嘅演繹發揮到淋漓盡致,亦獲得好多好評!好多人甚至覺得呢套係佢隱藏嘅「神作」。

由於篇幅所限,小薯仔冇辦法將佢拍過嘅眾多電影一一列出,只係揀選咗啲自己主觀上比較鍾意嘅出嚟。如果大家希望了解更多佢同佢嘅作品,可以到維基百科 https://zh.wikipedia.org/wiki/%E5%BC%B5%E5%9C%8B%E6%A6%AE 慢慢睇。


撰文:小薯仔
資料來源:維基百科、Yahoo 奇摩電影《阿飛正傳》、《霸王別姬》頁面
照片來源:英皇戲院、甲上娛樂 Facebook;Yahoo 奇摩電影《阿飛正傳》、《霸王別姬》頁面;IMDb


Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下載Timable App,隨時隨地捕捉本地活動資訊
iOS/Android:https://bit.ly/timable_app