【香水2022】小編室大家姐點評｜5款春夏香水推介 必入手乾淨木質/清爽花果調香氛

大家姐今日嚟訪問吓小編室嘅小T們，心目中最具春夏氣息嘅香水到底係邊支呢？等大家姐做吓筆記，公開小編室全體推薦5款最signature嘅春夏香水啦。
*香水感想主觀，文章僅供參考，購買前記得去聞香

P.S.是次揀出嘅5支香水不約而同都係中性香，男女都啱用

---

BYREDO Bal d'Afrique EdP 熱帶爵士淡香精 50ml HK$1,260(EUR €140)

BYREDO創辦人Ben Gorham嘅父親曾於非洲居住十多年，Ben Gorham閱讀父親嘅日記，以此構想出一個幻想中嘅非洲，而Bal d’Afrique就是呢個幻想嘅投射，將腦海中畫面轉化成香味，成為Ben Gorham最初創造嘅香水之一。Bal d'Afrique充滿美麗嘅想像，帶來一場活力嘅非洲慶典，充滿非洲藝術與文化、載歌載舞，係Ben Gorham送給非洲嘅「情書」。

香調：
前調：香檸檬、檸檬、橙花、金盞花、黑加侖
中調：紫羅蘭、茉莉
後調：琥珀、香根草、麝香、雪松

大家姐點評：撲鼻而來嘅熱帶水果風情——芒果與菠蘿，前調為多汁香甜嘅水果氣息，充滿活力。中調紫羅蘭帶出柔和脂粉感嘅花香氣，隱約有陣奶甜味，整體會轉化成輕甜嘅水果奶。熱情又浪漫，與名字非常相襯，總體而言係非常適合夏日使用嘅清爽柑橘調。
濃濃果甜香，啱帶去渡假，適合活潑、Outgoing嘅男男女女～

---

Jo Malone Wood Sage & Sea Salt Cologne 鼠尾草與海鹽古龍水 50ml HK$925

鼠尾草與海鹽嘅創作靈感源於海邊，遠離繁囂，獨自一人邊感受海風，邊沿岸散步。海鹽帶出嘅浪花感，結合懸崖邊嘅一片鼠尾草純樸木本香，散發出陣陣清爽、活潑、渾然嘅愉悅。

前調：秋葵籽
主調：海鹽
基調：鼠尾草

大家姐點評：透明感、輕盈嘅木質調，打破一般木質調沉實有厚度嘅印象。開頭有葡萄柚嘅清爽，一絲絲接近奶油咸爆谷嘅微鹹鹽味，呈現出於海邊散步，腳下沙粒帶點水氣嘅畫面。後續花香變得明顯，黃葵麝香及清香嘅鼠尾草，交織出溫和舒適嘅香味，整體香味十分輕柔平靜。可惜佢嘅留香好短，多數3-5個鐘就唔見咗。
小T們提到呢支係最啱男仔用嘅香水，不過其實女孩子都好啱用，非常適合簡約透明感穿搭、安靜溫柔嘅文藝少男少女們。

---

Diptyque Philosykos EdP 希臘無花果淡香精 75ml HK$1420
「Philosykos」喺希臘語嘅意思係「無花果樹之友」，Philosykos嘅創作來源就係三位創辦人於希臘皮立翁山嘅美好仲夏回憶，當時佢地經過前往海邊時必經嘅無花果樹林，途中執咗啲無花果樹葉放喺盒內，果種無花果樹嘅香味精髓就係Philosykos香水嘅基調！香水有清香嘅無花果樹葉、沉穩嘅木質調，夾雜果實嘅乳香，交織出希臘盛夏嘅情景。

前調：無花果葉、無花果
中調：椰子、草葉調
後調：雪松、木質調、無花果樹

大家姐點評：其實講起夏日香水，第一支就諗起Diptyque嘅Philosykos！當時一聞就已經有「希臘無花果樹下，仰躺草地曬太陽」嘅畫面出咗嚟。非常推薦淡香精版，因為層次會更分明，一開始係無花果葉清新草青氣息，之後慢慢滲出無花果實同椰子奶香，但裡頭微苦嘅草葉調以及之後嘅木質調無被掩蓋，反而襯托中和無花果同椰子奶味，甜而不膩，顯得更有層次。淡香水版則草青味會較輕盈，甜甜嘅時奶香會更突出。
比較文青type嘅一款木質調香水，最啱個性溫和，但又會不時展露純粹可愛一面嘅男男女女（有網民提到Philosykos係大人の可愛感，大家姐喺認同嘅～）

---

Aesop Tacit EdP 悟香水淡香精 50ml HK$900

Aesop與調香師賽琳．巴雷爾（Céline Barel）合作，研發7年時間嘅悟香水，靈感來源自王家衛的電影《花樣年華》；超現實藝術家基里訶（Giorgio de Chirico）；幾首塞吉．甘斯柏（Serge Gainsbourg）的歌曲；以及一種綠色（彩通色號 #363），打造出充滿清新綠意香調結合地中海氣息，以當代角度重新繹了舊世界古龍水。悟香水三大成分：日本香橙、岩蘭草(香根草)、羅勒，大量羅勒調配，並散發出陣陣柑橘清香，極具鮮明嘅現代感，活潑嘅香調個性，令人感到活力充沛。

前調：日本香橙、羅勒、丁香
中調：迷迭香、薄荷、甜茴香
後調：雪松、岩蘭草之心、琥珀

大家姐點評：清新草本柑橘調，聞上去感覺係暖陽光灑落草地嘅感覺。開頭嘅柑橘調有新鮮柚子微苦香氣，酸酸澀澀，清新淡雅，有股日式天然寧靜味道。羅勒與香根草慢慢出現，帶出清涼草本氣息，香水感覺充滿清爽綠意，後面香辛料同木質香有溫暖低調嘅氛圍，係清新大自然嘅感覺。不過留香時間短，維持3-5小時左右。
最啱有書卷味，氣質淡雅嘅人最適合，噴上去營造出乾淨氛圍。

---

LE LABO Baie 19 EdP 樹果19淡香精 50ml $1,590

樹果19亦被戲稱為「清水19」。原因係佢聞起嚟似雨後嘅味道，水氣從潮濕嘅大地蒸發嘅感覺，正正就係Petrichor嘅味道，係初雨嘅香氣。乾爽嘅杜松子、廣藿香，以及充滿綠意嘅葉子，乾燥後又被大雨浸潤所散發嘅味道，就似是雨後味道製成標本一樣。

以乾杜松子和廣藿香為主要調性，結合漿果、棉花、鼠尾草和麝香，複製悶熱乾燥的雨後那股自然淡雅的氣息，充滿木質和青草的馥郁柔軟，讓人一噴灑上就能感受到陣雨過後的宜人舒適。

前調：漿果、棉花
中調：綠葉
後調：廣藿香、麝香、杜松

大家姐點評：以乾杜松子和廣藿香為主調，結合漿果、棉花、鼠尾草及麝香，營造出恬靜柔軟嘅香氣，還原夏日微雨，雨後大自然嘅水氣味道，非常清涼。大家姐聞到有啲泥味，但木質及青草香氣包圍下，營造出獨特柔和之感。
適合氛圍恬靜，偏知性嘅人群。

---

撰文：Timable大家姐
圖片來源：Jo Malone [email protected]、[email protected]/官網、[email protected]/官網、[email protected]官網、LE [email protected]

---

延伸閱讀：
【睇劇2022】Netflix 4月上架韓劇推介 打發時間實有嘢睇！
詳情：https://timable.com//zh-hk/blog/2161103

【防曬2022】小編室大家姐點評｜親測4款臉部防曬 清爽高效防曬 邊款最好用
詳情：https://timable.com/blog/2168422

【復活節2022】精選酒店Staycation優惠餐飲住宿套餐｜有海景浴缸｜人均$809起
詳情：https://timable.com/blog/2156572


Follow埋Timable FB同IG
FB：https://www.facebook.com/timable.hk
IG：https://www.instagram.com/timable/

立即下載Timable App，隨時隨地捕捉本地活動資訊
iOS/Android：https://bit.ly/timable_app