【睇電影2022】戲院重開後有咩戲睇？一文整理4月上映電影 (上)

隨住本地疫情放緩，政府亦喺早前宣佈咗會逐步放寬社交距離措拖，而包括戲院在內嘅公眾娛樂場所亦將會重開！所以一眾片商都開始將之前因為戲院關閉而延期嘅電影，排返上映日期～

小薯仔就首先整理咗 4 月 21 日上映嘅戲，一齊嚟睇下啦：

入場買飛前請注意：
根據香港政府公布之《預防及控制疾病（規定及指示）（業務及處所）規例》（第599F章）及《預防及控制疾病(疫苗通行證)規例》（第599L章）
2022 年 4 月 21 日至 4 月 29 日，入場觀眾需要打至少一針或持有效豁免證明；
2022 年 4 月 30 日至 5 月 30 日，入場觀眾需要打至少兩針或持有效豁免證明。

而入場前戲院職員會檢查顧客嘅安心出行及「疫苗通行證」。持有「有效豁免證明」之觀眾，請出示實體證明書或包括二維碼嘅紀錄畀返職員掃描。


《星夢動物園 2》
粵語版配音：Gigi 梁詠琪、黃德斌、柯煒林、陳葦璇、Mischa 葉巧琳
詳情：https://timable.com/event/2005096

故事簡介：大劇院老闆樹熊阿畢同他嘅 SING 夢班底，憑住精彩演出，成功令新畢氏劇院谷底反彈。而雄心勃勃嘅阿畢更決定進軍殿堂級舞台，喺世界知名嘅基斯托大樓影院開騷，但佢先要得到大老闆灰狼大亨·基斯托首肯。豬舞王威猛先生忽發奇想，提議新騷由收山多年嘅搖滾傳奇獅子羅威擔大旗，而呢個大膽構思竟然得到大老闆嘅賞識！阿畢為圓夢，硬住頭皮出盡渾身解數去遊說對方復出。呢個尋夢過程刺激又有趣，最重要係令巨 SING 幫一眾弟兄姊妹們，再次感受到音樂能夠治癒人心嘅無比威力！

* 本身排喺賀歲檔期上嘅《星夢動物園 2》，係呢個檔期中少數排喺戲院重開後即刻上嘅。第一集《星夢動物園》2016 年喺香港上映嘅時候，成續非常好，唔知第二集會唔會再創票房佳績呢？


《月球隕落》
主演：荷爾芭莉 (Halle Berry)、柏德烈韋遜 (Patrick Wilson)、約翰畢利 (John Bradley)、米高班納 (Michael Peña)、查理龐馬 (Charlie Plummer)、于文文 (Kelly Yu)、當奴修打蘭 (Donald Sutherland)
詳情：https://timable.com/event/2043614

故事簡介：人類面臨滅絕浩劫，美國太空總署署長（荷爾芭莉 飾）同月球陰謀論天才（尊畢利 飾）聯同前頂尖太空人（柏德烈韋遜 飾）組成太空團隊，肩負起人類生存嘅最後希望－阻止月球隕落。而太空團隊登月後發現月球竟然係個高科技巨型基地⋯⋯


《藍宇》20 週年紀念 4K 修復版 (III)
主演：胡軍、劉燁
詳情：https://timable.com/event/2100815

故事簡介：高幹子弟陳捍東（胡軍 飾）喺下屬嘅引薦下，邂逅由東北去到北京求學嘅青年藍宇（劉燁 飾）。藍宇因為生活所逼，只能選擇出賣肉體，因緣際會下就成為咗捍東嘅交往對象。兩個人本來訂好「好聚好散」嘅遊戲規則，點知擦出火花，喺世所不容嘅情網中越陷越深⋯⋯

* 係華語電影嘅一套 BL 經典之作！當年首次上映嗰陣有睇過嘅觀眾，相信都仲記得陳捍東同藍宇嘅故事，配上黃品源嘅〈你怎麼捨得我難過〉，真係流過唔少眼淚。


《奪命狂呼》
主演：莉芙金寶 (Neve Campbell)、大衛雅奇 (David Arquette)、歌迪妮覺絲 (Courteney Cox)、積奎爾 (Jack Quaid)、珍娜奧蒂嘉 (Jenna Ortega)
詳情：https://timable.com/event/2106554

故事簡介：鬼面殺手再度出現，新一批受害者全部同胡士堡（Woodsboro）呢個小鎮過往嘅秘密有關！薛妮（Sidney Prescott）同警長杜威（Dewey Riley）夫婦又捲入血腥漩渦，唯有憑住過往多次逃出生天嘅經驗，同鬼面殺手決一死戰！

* 係《奪命狂呼》系列嘅第五套電影


《死亡立方》
主演：菅田將暉、杏、岡田將生、田代輝、齊藤工、吉田鋼太郎
詳情：https://timable.com/event/2110524

故事簡介：六個互不相識又毫無關係嘅男女醒嗰陣發現自己被困喺一個神秘立方體迷宮中。喺呢個無法理解嘅處境下，佢哋嘗試尋找出口，點知遇上各種致命陷阱，除非可以破解立方體中嘅神秘密碼，否則死路一條。不安焦慮將六個人嘅精神同肉體逼至極限，而人性醜陋一面亦漸漸浮現⋯⋯佢哋當中有冇人能夠活生生咁行返出去？

* 改編重拍至加拿大導演雲新素拿他利嘅科幻驚慄懸疑電影《心慌方》(CUBE)


《怪獸與鄧不利多的秘密》
主演：艾迪烈柏尼 (Eddie Redmayne)、祖迪羅 (Jude Law)、丹方格 (Dan Fogler)、艾薩米勒 (Ezra Miller)、丹方格 (Dan Fogler)、哥倫杜納 (Callum Turner)、嘉芙蓮禾達史東 (Katherine Waterston)、艾歷遜蘇度 (Alison Sudol)、麥斯米克森 (Mads Mikkelsen)
詳情：https://timable.com/event/2110836

故事簡介：鄧不利多（祖迪羅）得知法力強大嘅黑巫師葛林戴華德（麥斯米克森）企圖統治魔法世界，於是就派紐特（艾迪烈柏尼）帶領一班強悍嘅魔法師，加多一個勇字當頭嘅麻瓜，攜手執行危險任務。過程中遇上無數奇珍異獸，仲同葛林戴華德日益壯大嘅追隨者們正面交鋒！危機逼近，喺魔法世界戰況刻不容緩嘅情況下，鄧不利多仲可唔可以繼續袖手旁觀？

*《怪獸與牠們的產地》系列第三部曲！有睇開嘅朋友，或者係《哈利波特 (Harry Porter)》粉絲，呢套電影應該都唔會錯過～


《變鈦》(III)
主演：雲遜連頓 (Vincent Lindon)、雅嘉特魯塞爾 (Agathe Rousselle)
詳情：https://timable.com/event/2112475

故事簡介：Alexia 細個曾經喺車禍中同死神擦身而過，好彩及時做手術換上鈦金屬頭皮，而佢大個後就癖戀汽車，更愛車愛到做埋車展性感女郎。因為一次被粉絲追蹤而殺咗對方後，她就變到肆無忌憚咁殺人，繼而踏上逃亡之旅⋯⋯

* 獲得第 74 屆康城影展最高榮譽金棕櫚獎


《喪盡癲才》
主演：尼古拉斯基治 (Nicolas Cage)、貝哲羅柏斯卡 (Pedro Pascal)、蒂芬妮夏迪舒 (Tiffany Haddish)、尼奧柏德烈夏里斯 (Neil Patrick Harris)
詳情：https://timable.com/event/2112475

故事簡介：懷才不遇嘅前巨星基治 (尼古拉斯基治) 瀕臨破產邊緣，唯有出賣自己，出席瘋狂「基粉」富豪哈維 (貝哲羅柏斯卡) 嘅生日派對，以賺取 100 萬酬勞。估唔到之後 CIA 特工踢爆哈維原來係大毒梟，仲要求基治幫手做臥底救出人質！於是，基治決心盡地一煲，挑戰成世人最破格嘅角色：「尼古拉斯基治」！

* 尼古拉斯基治「做自己」之作，仲喺戲中自嘲自己事業兜踎、濫拍、豪使、欠債同破產！


《二人小町》(只限指定戲院上映)
主演：和泉素行、陳漢娜、劉漪琳、濱津隆之
詳情：https://timable.com/event/2174138

故事簡介：死神王喜龍（和泉素行 飾）愛上咗要帶去地獄嘅女仔－黎小町。為咗帶佢去地獄，王喜龍慢慢接近佢，仲喺同佢發生親密關係嘅某個月圓之夜，坦白自己死神嘅身分。後來王喜龍同小町講，自己可以帶走另一名和佢同名同姓同年出生嘅女仔，小町為咗求生，便話畀王喜龍知，自己有個符合晒條件嘅好友。估唔到去搵另一個「黎小町」嘅王喜龍，竟同對方陷入咗真正嘅愛情⋯⋯

《幪面超人 Beyond Generations》
詳情：https://timable.com/event/2172986

故事簡介：從過去，連接現在，通往未來。幪面超人聖刃同幪面超人 REVICE 聯手，揭露幪面超人跨越 100 年嘅秘密！

* 幪面超人 50 周年紀念電影

《劇場版 Free! -the Final Stroke- 前篇》
詳情：https://timable.com/event/2172994

故事簡介：一班熱血嘅追夢者將要游向世界舞台！喺夢想之地‧悉尼，他們又會睇到咩景色？ 賭上一切，向世界挑戰！

* 《Free!》系列最終章

《古董局中局》
詳情：https://timable.com/event/2177815

故事簡介：「奪寶小分隊」成員許願（雷佳音 飾）、藥不然（李現 飾）、黃煙煙（辛芷蕾 飾）、付貴（葛優 飾）又鑒寶又墓室探險，一場圍繞國寶佛頭展開嘅古玩江湖驚世騙局即將上演。

另外，《史賓沙》會再度上映；《梅艷芳》同啱啱攞咗本年奧斯卡最佳國際電影嘅《Drive My Car》亦會繼續上映


撰文：小薯仔
資料及照片來源：各電影之發行公司

---

延伸閱讀：
【睇電影2022】戲院重開後有咩戲睇？一文整理4月上映電影 (下)
https://timable.com/blog/2173599

哥哥張國榮5套電影推介 當中有你鍾情嘅作品嗎？
https://timable.com/blog/2163967


Follow埋Timable FB同IG
FB：https://www.facebook.com/timable.hk
IG：https://www.instagram.com/timable/

立即下載Timable App，隨時隨地捕捉本地活動資訊
iOS/Android：https://bit.ly/timable_app