【金像獎2022】金像獎4位入圍最佳男主角 大前輩同新人邊位會脫穎而出？

今屆金像獎將會喺 7 月 17 日假九龍灣國際展質中心匯星舉行，而所有獎項嘅提名名單都已經喺 2 月公佈咗。之前介紹過入圍最佳男女配角同最佳女主角嘅演員，今次會講入圍最佳男主角嘅演員，包括林家棟、謝賢、梁仲恆同埋吳鎮宇。

小薯仔就整理咗 4 位入圍演員嘅簡介，一齊嚟睇下啦：



林家棟《手捲煙》《智齒》
演員 Facebook：https://www.facebook.com/lamkatung
喺電視台出身嘅林家棟，曾經做過好多電視劇嘅男主角，不過喺 2000 年代後，就專注電影拍攝。「轉型」後嘅佢，電影產量都唔少，亦得到好多佢係好戲之人嘅認同。但直到 2017 年，先憑《樹大招風》首次獲得香港電影金像獎嘅最佳男主角提名，同時亦獲得呢個獎項。今次係佢第二次入圍，都係第一次以兩套電影獲得「影帝」雙提名。

佢喺《手捲煙》同《智齒》兩套電影中所飾演嘅角色外型上有啲啲相似嘅感覺，實際上性格、背景就非常唔同：《手捲煙》中，佢係游走喺幾個黑幫堂口嘅退役「華裔英兵」關超，以走私金錢龜同水貨為生。佢演嗰種被壓逼嘅江湖小人物就好入型入格，而且戲中同喺邊緣掙扎嘅古惑仔文尼嗰段由互相利用到惺惺相惜嘅關係，都做得好有層次，結合埋戲外佢零片酬演出去支持新導演，唔少觀眾都將呢分加埋落演技到；到《智齒》就變成重案組資深警察，不過對因毒駕撞傷佢妻子嘅街童王桃就恨之入骨。而重遇呢個「兇手」後就激發起滔天恨意。相比起《手捲煙》，《智齒》嘅角色比較陰沉，因為對白唔多，要點樣詮釋角色嘅性格矛盾，仲有絕望無力，都係個挑戰。最後出嚟嘅成品，就令好多觀眾都對佢嘅演繹有非常多嘅正面評價！


謝賢《殺出個黃昏》
人稱「四哥」嘅謝賢，係入圍者中，演藝經驗最豐富，亦係最年長嘅獲提名演員！由 1953 年踏入影壇至今，演出過無數黑白同彩色電影，仲有接近三十套電視劇，但獲獎嘅次數寥寥可數。喺金像獎中，除咗曾經喺 2019 年獲得終身成就獎外，今次其實係佢第一次獲得最佳男主角嘅提名！

喺戲中，佢飾演田立秋－60 年代叱咤江湖嘅一個殺手組織主力，擁有一身曾經令人聞風喪膽嘅好刀法，不過過咗花甲之年，只能回歸平凡，手腳又變慢，甚至連整刀削麵都敵不過機器。某日因為馮寶寶飾演嘅副主力蔡鳳搵佢出山，幫生無可戀嘅老人了結生命，令佢遇上被「中出即飛」一心尋死嘅少女，仲被少女改變咗。監製林家棟說服咗四哥除低佢最標誌性嘅黑超去演出，而四哥亦演活咗一個步入黃昏嘅老年人嗰種孤獨，同埋遇到少女鍾雪瑩後嘅變化，唔少觀眾都大讚佢嘅演繹非常出色！

甚至佢喺年頭嘅第 28 屆香港電影評論學會大獎，同埋新鮮熱辣出爐嘅第 18 屆香港電影導演會年度大獎，分別獲得最佳男演員同最佳男主角，更加令佢被視為今屆金像獎嘅奪獎大熱，有機會從影 69 年嚟，首次喺金像獎問鼎影帝！


梁仲恆《媽媽的神奇小子》
演員 IG：https://www.instagram.com/bing0606
今屆獲得最佳男主角提名嘅名單中，有最年長最深資歷嘅謝賢，亦有相對年輕，仲係初次踏入影圈嘅梁仲恆 (阿炳)。佢喺香港演藝學院戲劇學院以一級榮譽畢業後，就做咗全職嘅舞台劇演員，演出過好多套舞台劇。通過試鏡獲得第一次拍攝電影嘅機會，呢套電影仲為佢帶嚟人生中首個金像獎最佳男主角以及最佳新演員提名。

戲中佢飾演成年版嘅蘇樺偉。喺真正入組前，佢除咗自己用半年時間練跑，就係相約現實喺同一個屋邨長大嘅蘇樺偉一齊打機、傾偈同跑步，再從中留意蘇樺偉嘅說話、對答方式，仲有舉止；進入拍攝後，佢就將嗰段時間嘅準備全部投入落角色。最後真正喺大銀幕放映嘅時候，佢嘅演出就大獲好評，觸動到好多觀眾嘅心！亦因為佢將戲中嘅蘇樺偉演繹得形神兼備，唔少人甚至以為佢本身都係一位身體唔健全嘅人士，所以都有好多人睇好佢有機會攞獎㗎！


吳鎮宇《濁水漂流》
演員 Facebook：https://www.facebook.com/FrancisNg.Page
同樣係電視台出身嘅吳鎮宇，都係由電視劇轉戰電影，早期多數做小角色嘅佢，喺《古惑仔》系列開始奠定喺影圈嘅地位。過去曾經 5 次獲提名金像獎最佳男主角，今次係佢第 6 次獲得呢個獎項嘅提名。

喺《濁水漂流》呢套戲，佢負責兩個部分，一個係出品人，另一個就係最主要嘅男角色－露宿者輝哥。從影以嚟首次出演露宿者呢個類型嘅角色，無論係角色造型定係言行，好似係大量粗口同吸毒場面，都好「貼地」，而且佢喺戲中嘅台詞，亦引起咗好多觀眾嘅共鳴；另外同「木仔」柯煒林嘅對手戲同埋同其他露宿者嘅群戲，亦有好多人覺得好正！不過都有唔少人認為由謝君豪飾演嘅老爺比較突出，所以就要睇下佢喺戲中嘅演出，會唔會說服到一眾相關人士投佢票了～

以上嘅電影中，《智齒》，《濁水漂流》及《梅艷芳》都已經串流上咗香港 Disney+！大家可以喺金像獎頒獎禮前重溫各位入圍演員嘅演出。
未有 Disney+ 睇唔到？立即訂閱：http://disneyplus.bn5x.net/e42ooX


撰文：小薯仔
資料來源：維基百科、香港電影金像獎網頁、媒體訪問及網上資料
照片來源：《媽媽的神奇小子》、《殺出個黃昏》、《濁水漂流》、《手捲煙》Facebook；浸大電影學院網站；IMDb

---

延伸閱讀：

【金像獎2022】金像獎5位入圍最佳女主角 前輩新人各有優勢
https://timable.com/blog/2163068

【金像獎2022】金像獎5位入圍最佳男配角 前輩新人各有千秋
https://timable.com/blog/2156900

【金像獎2022】金像獎5位入圍最佳女配角 前輩新人競爭激烈
https://timable.com/blog/2150199

【金像獎2022】今屆角逐各獎項嘅電影你睇過幾多？一文整理20套獲提名電影
https://timable.com/blog/2133881


Follow埋Timable FB同IG
FB：https://www.facebook.com/timable.hk
IG：https://www.instagram.com/timable/

立即下載Timable App，隨時隨地捕捉本地活動資訊
iOS/Android：https://bit.ly/timable_app