鐵路如樹根般的延伸,隨之而來是便利,也為舊城區帶來了無可抗拒的士紳化,以往民生小店換成貴價咖啡室西餐廳。西營盤站2015年開通後,附近一帶食肆林立,租金瞬間被拉起,唯獨有一家小店,業主怕他捱不住,反倒主動割價,租下留人。


近年的香港,聚少離多,如果說燒賣雞蛋仔菠蘿包是港人的Comfort Food,牛腩麵魚蛋粉也榜上有名。位於半山區、被名校圍繞的枝記麵家,不同於近十年被港人熱推的清湯牛腩,小店做的是古法磨豉牛腩,又別於另一種啡色湯底的柱侯牛腩,磨豉醬煮,真心少見,但老嘢就知道,這是好東西。


疫情過後,又有移民潮,從前午飯時間坐滿學生哥的枝記,現在有點冷清。「以前就有學生,依家邊有學生?人少咗好多啦,仲好啦,反而人多我都做唔切,呢度就得兩個人,一陣大家山長水遠嚟,我招呼唔到仲衰啦。」麵鋪只有兩個人工作,兩個都是老闆,老闆盧先生負責煮麵沖奶茶,老闆娘盧太就跑樓面落單上菜。



「兩個腩麵,一個腩米。」老闆娘往廚房喊道。來這裡的,必點是磨豉牛腩,上檯的牛腩麵湯底比平常見的深色,呷上一口,一點也不鹹,帶點黃豆發酵過的甜味,經長時間炆煮,用筷子將牛腩夾起,搖搖欲墜,本以為入口會如慢煮肉失去口感,想不到腍但不爛,能吃得到肉和筋之間的彈性,濃郁入味,一啖接一啖吃不停,忍不住與身旁的友人大讚,老闆娘聽到一臉自豪,「梗係好食啦,唔同你平時食啲咩清湯腩,煲兩三個鐘就食得,我哋啲腩炆完仲要放成日,唔係嗰啲即刻整就有,我哋要早一日整,多好多功夫,冇人會好似我哋咁做,梗係好食啦。」


舖面貼上不少報道枝記的新聞,有一段是這樣的:「店子是一家三口在經營,女兒放學便會在店面幫手,星期日是家庭日,必定休息」,不過紙張泛黃褪色,女兒早由學生哥變成上班族,唯一不變的是星期日家庭日的休息,「我半退休㗎喇,退咗休又冇嘢好做,最好就係得閒開吓鋪,同啲街坊熟客傾吓偈,好多人未必係嚟食嘢,有時會嚟傾偈傾成個鐘。我呢度主要都係做熟客仔生意,你街客嚟我都未必做得切,街坊有時見人多咪一陣再嚟過囉。」



枝記雖然門口寫早上十一時開鋪,星期日休息,但實際倒是隨老闆心意,牛腩煮好才開門,賣光或累了就提早拉閘收鋪,旅行癮起就往鐵閘上貼紙仔休息數天,隨心隨性,畢竟都「半退休」。得知遠道過海而來朝聖食磨豉牛腩,老闆娘不忘提醒,「下次你嚟打個電話問吓我有冇開先,我唔係日日開,可能會去咗玩。」,是個可愛有趣的老闆娘呢。


枝記麵家
地址:半山巴丙頓道1號M4A號舖
電話:2540 2029
營業時間:早上11時至下午4時

文章獲 Lemon Media 授權轉載

FB:https://bit.ly/3yp1Pf0
IG:https://bit.ly/3lpE177
Youtube:https://bit.ly/3rQCB6J


延伸閱讀:


【香港老字號】土瓜灣糖水店|默默耕耘近40年 老闆蘭姐:我好鍾意做呢間舖
詳情:https://timable.com/blog/2239511

【香港老字號】港式西餐屹立70年 皇后飯店養育三代人 第三代老闆:不會因為時代改變
詳情:https://timable.com/blog/2232913

【香港老字號】西營盤美食|承傳兩代唐餅店 招牌光酥餅+細細粒缽仔糕
詳情:https://timable.com/blog/2238663

【香港老字號】傳統中式餅店 美其香餅家|屹立近半世紀 堅持傳承唐餅手藝
詳情:https://timable.com/blog/2205178

【香港老字號】錦田美食|59年老字號麵包舖 傳統手製忌廉筒 日賣1,200個
詳情:https://timable.com/blog/2232911




Follow埋Timable FB同IG
FB:https://www.facebook.com/timable.hk
IG:https://www.instagram.com/timable/

立即下載Timable App,隨時隨地捕捉本地活動資訊
iOS/Android: https://bit.ly/timable_app