牛角包每人限購三個咋,仲有其他抹茶產品俾抹茶控大飽口福!
抹茶控可能對Chef Tiff's Kitchen(CTK)唔陌生,今次Tiff就同黃婉曼開設嘅RISE嚟個crossover合作推出抹茶熔岩牛角包。牛角包由前東京藍帶學院技術總監,RISE嘅麵包大師Stephane Reinat反覆實驗,以Red Label麵粉同丸久小山園抹茶粉製作,既有濃厚抹茶味,又保留到牛油香味,鬆化得嚟味道都好有層次。牛角包賣點係「熔岩」,切開就係流心抹茶吉士!抹茶吉士成份有法國忌廉、日本雞蛋黃、3.6牛乳同丸久小山園抹茶粉,經多次調配改良,香醇幼滑,試問一眾抹茶控又點忍到口?
Menu
預訂時間由25/6 9PM開始,PICKUP日期時間則為15/7&16/7 3:45-4:45PM。
*因配合餐廳本身運作,PICKUP逾時不候,食物亦不能暫存待取。如有需要可找親友代取。
上次推出80份5分鐘賣晒,大家今次要捕實~
關於Chef Tiff's Kitchen
近年有唔少人喺Instagram開店,Chef Tiff's Kitchen就係其中一間成功小店。23歲嘅陳蔚琦Tiff正職係一位音樂創作人,又要keep fit又鍾意抹茶嘅佢一開始研究同製作較低糖健康嘅抹茶甜品就係為咗滿足自己,亦會同朋友分享。經無數朋友試食和鼓勵下,Tiff終於喺2015年10月膽粗粗咁開設咗屬於佢嘅Instagram (IG) 甜品店 @cheftiffskitchen 電音實驗廚房 (CTK)。CTK 嘅甜品就好似佢寫嘅歌一樣,專門以實驗形式創作唔同類型嘅低糖抹茶甜品,並選用高級食材同山政小山園宇治抹茶粉, 以保證食品質素。初期只係有特濃宇治抹茶千層蛋糕及少量其他甜品,冇幾耐CTK就推出咗原創抹茶芝士撻,亦係全港首個推出抹茶芝士撻的品牌。
CTK至今成立一年有多, 已經有過萬名followers, 亦有唔少週刊訪問報導同food bloggers推介,每次嘅團購都會迅速爆滿!儲夠Budget嘅Tiff計劃成為2017年樂壇新人,但佢都希望盡力保持CTK運作,同各位抹茶控繼續交流!
則評價