首次Rulapalooza活動圓滿落幕，而第二次Rulapalooza將會於7月11日舉行，保證為各位帶嚟更重搖滾風格嘅樂隊，盡情享受轟炸耳仔嘅音樂之夜！
開場樂隊Kyanos係一隊全女嘅金屬核樂隊，佢地已經準備好用強勁嘅音樂震撼大家！
接下來嘅Supernaut準備咗幾首經典樂隊Black Sabbath嘅cover比各位感受昔日傳奇嘅魅力。
第三隊就係Wreckage of Progress。The Underground最近嘅一篇樂評指佢地「力量、歌唱技巧、演奏技巧、結他、紅髮、金屬風節奏、搖頭，乜都齊，點能夠唔愛上佢地？」
快啲過嚟感受下佢地嘅魅力，可能你就會知點解佢地上年可以羸到去加拿大音樂節表演嘅機會。
表演最後由Two Finger Salute作收尾。呢隊龐克搖滾味濃嘅型格樂隊，唔好睇佢地斯斯文文咁，到時一定會用澎湃嘅音樂嚇大家一跳！
7月11號，咪鬼再理你精心規劃嘅gym plan，搵番你件band tee出黎同大家一齊頭fingfing享受搖滾同金屬嘅狂歡之夜啦！ 到時候Rula Live見！
