一提起觀塘，你會諗到咩？多人到爆？見唔到盡頭嘅工廈？定係塞到想嘔？呢到好似無乜新嘅可能，但偏偏我哋就係要創造更多，變出更多可能！
今次共享空間 The Wave 同 非實力派 決定聯手為觀塘注入新氣，大搞「憑實力塞爆觀塘市集」！召集各路人物相聚，當中包括知名本地設計師、手作人、插畫家同 Board Game 等等高手，實力搞個市集，以實力開心過 Summer！
以下係檔主介紹 (排名不分先後)：
歡樂馬介休｜IG：https://www.instagram.com/bacalhau.ent/
澳門好受關注嘅新媒體，由一班 80、90 後嘅後生仔女組成嘅團隊，致力拍攝玩樂綜藝為題材嘅網上影片，受到香港、澳門同埋鄰近地區嘅網友歡迎。
特別係近年拍嘅大型戶外綜藝節目《真係GAME》令到外界睇到佢哋團隊嘅創意、熱血同埋拼勁！
歡樂馬介休嘅宗旨：「我哋係一班係現實嘅生活裡面，努力尋找歡樂嘅鹹魚」，Game Never Over！
香城 允行｜IG：https://www.instagram.com/heungshing_hk/
超人氣本地年輕插畫家，創作人允行鍾意按民意即日創作圖文，香城嘅出現係因為一啲無聊諗法而面世，允行希望香港人可以透過佢嘅作品而會心微笑。
無紙用工作室｜IG：https://www.instagram.com/nopaperstudio/
「無紙用工作室」插畫風格係參照 70 至 80 年代嘅電影海報，糅合西方鬼馬作風同埋國畫筆法，透過手繪電影標題、人像主演角色同埋密集嘅文字排版等懷舊元素，描繪出「貼地」話題，記錄本地文化。
Hira Hira Store｜IG：https://www.instagram.com/hirahira_store/
有冇用過以紙塑人形技術製作既電飯煲？眼袋招財貓人形聽落好似好詭異，實際上好 CUTE 㗎！由 5 個人用佢哋工作以外嘅寶貴時間，默默動手一紙、一筆、一針、一線、一包、一貼，走過七年時間，成就咗滿滿日式風味嘅 Hira Hira Store。
打邊爐研究院｜IG：https://www.instagram.com/daabinlo_vision/；https://www.instagram.com/daaidaabinlocardgame/
香港首創「打邊爐」卡牌遊戲，融合打邊爐同埋本土文化。由打邊爐研究院製造嘅卡牌遊戲，無論創作同設計都係「香港製造」，卡牌以打邊爐為題，玩家要收集或者搶其他人嘅食材先可以贏到遊戲，遊戲內包含各式各樣本地食材卡牌同埋湯底牌，亦有經典迷因（Meme）主角作為角色牌，「合成字」同廣東話文化都蘊藏係卡牌當中。
OYTY Studio｜IG：https://www.instagram.com/oytystudio/
散發住濃厚懷舊氣息嘅香港本土特色小店 OYTY Studio，由 Oscar Yeung 同埋 Tim Yeung 兩兄弟去主理，主打手工皮革同埋錢幣飾物。從手鏈、頸鏈、戒指等嘅首飾，到皮帶扣、手錶扣、皮具鈕釦等嘅配件，OYTY Studio 嘅錢幣飾物好多元化，唔少客人都特登慕名而黎，尋找承載住回憶嘅個一年，藉住錢幣追憶過去。
Johnee Lau｜IG：https://www.instagram.com/johnee_lau/
本地動畫師兼插畫師，以「核突可愛風」同「食字」作品而知名度大增，最出名嘅作品有《GALAMAN》（胳肋底超人）。Faster Piece 係 Johnee 同觀眾互動嘅方式，即係你出題我畫，觀眾會寫字詞或者名畀佢，等佢即時以「食字梗」方式畫出黎。
東尼電機｜IG：https://www.instagram.com/tonyelectronic/
東尼電機嘅發明裝置相信熟悉嘅人都會聽過，「起步斑馬線」、「選擇困難症神器」等等，全部發明都係為咗解決生活上嘅煩惱，又有創意又幽默又盛。
美富紋身 MoFo Tattoo｜IG：https://www.instagram.com/mofo_tattoo/
有紋身同冇紋身嘅朋友都一定聽過美富紋身MoFo Tattoo！美富紋身師同時亦係插畫師，風格有好多種：卡通、小清新、寫實風、書法風格、卡通圖案、黑白素描風⋯⋯歡迎嚟市集睇睇！市集當日會賣自家製Tee shirt、扇同埋紋身貼紙等等。
＊請注意，現場不設紋身服務
When Night Comes｜IG：https://www.instagram.com/whenightcomes__/
將復古元素重新融入現今生活嘅飾物店，店主經常搜集各地嘅飾物，復古款式，佢仲會親自製作耳環，而款式係以金屬同埋花朵嘅配搭為主，款式簡潔。
另外，When Night Comes 部分絕版嘅 Vintage 飾物都保存得好好，每件 Vintage 飾物都包含獨一無二嘅價值同埋時髦意義，好值得收藏，再去延續佢嘅故事，擁有新的開始。
SUNSI.CO｜IG：https://www.instagram.com/SUNSI.CO/
結合古物同植物嘅小店 SUNSI.CO，將日本塊根植物引入香港，每一棵塊根植物都有古怪、奇特嘅外表，係日本有「珍奇植物」嘅稱號。
另外，SUNSI.CO 以「食物+植物」概念為主題嘅工作坊，同一個芝士蛋糕品牌合作 ，將非洲塊根植物同埋鋁罐包裝嘅 Cheesecake 聯乘埋一齊。食完芝士蛋糕後，將鋁罐清洗乾淨，再將非洲塊根植物種植到鋁罐包裝裡面，既環保又創新 ！
* 所有入場人士必須在入口處掃描 The Wave 的安心出行二維碼，並在進入活動場地之前出示有效的疫苗接種記錄或醫療豁免證明
* 所有人士必須正確佩戴口罩
* 活動場地內禁止飲食
