母亲节係一个感谢母亲嘅节日。喺美国、加拿大同埋一啲其他嘅国家，每年5月嘅第二个礼拜日就係母亲节。喺其他一啲国家日子就唔一样。做母亲嘅喺呢一日通常会收到礼物。康乃馨被视为送畀母亲嘅花。 母亲节嘅起源係古希腊。喺呢一日，古希腊人会向希腊众神之母赫拉致敬。之后去到17世纪中，呢个节日就传到去英国。喺呢一日，出咗外面嘅后生仔会返屋企，送一啲小礼物俾妈妈。 而家嘅母亲节起源係美国，由安娜·贾维斯（Anna Jarvis, 1864－1948）发起。佢一生人都冇结婚，一路陪喺佢嘅妈妈身边。安娜·贾维斯嘅妈妈心地好，又好有同情心，佢话应该搞一个纪念日嚟纪念静静鸡付出嘅妈妈，但係呢个愿望仲未实现佢就过咗身。 安娜·贾维斯喺1907年开始搞活动，申请母亲节做法定嘅节日。节日喺1908年5月10号喺美国嘅西弗吉尼亚和宾夕法尼亚州正式开始。1913年，美国国会确定改每年5月嘅第二个礼拜日做法定嘅母亲节，仲规定呢一日家家户户都要挂国旗，表达对妈妈嘅尊敬。安娜·贾维斯嘅母亲生前最锺意嘅康乃馨，就做咗母亲节嘅象征。