网络世界咁大，除有一众娱人娱己嘅YouTubers、bloggers、插画家呢班网络「明星」，亦有另1班有视野嘅I.T.人，透过製作网站赚钱之余，重默默建立1套全新嘅价值观，改变网民浏览习惯。 今期「Wero」嘅2位主角、活动资讯平台网站Timable创办人Mike同Sam，2010年因「无聊」而揼咗Timable呢个消閒资讯网，2012年全身投入网站管理，2013年已经回本；网站每月平均浏览量由最初30万人次去到2013年平均300万人次，又揾到西九文化艺术区、Yahoo!等「大客」合作。咁成功，全因Mike同Sam愿意全情投入，佢哋话除咗见到有商机，重希望改变香港人嘅谂法：揾地方hea？上Timable揾啦！ Timable简介 香港消閒节目活动搜寻平台，提供音乐、展览、话剧、节庆资讯，其后重加入旅遊、数、亲子、时尚等范畴。亦有话剧、演唱会等票务买卖。 因冇节目创业 未做访问前，由Timable易用嘅网页设计以至丰富嘅内容，笔者以为佢哋公司好大规模，员工冇100都几十。但当去到佢哋嘅办公室，先知原来只係请咗1位员工，3个人喺1间约100呎嘅办公室办公！ 两位老闆——80后嘅Mike同Sam係中学同学，虽然大学时代分别入读科技大学同香港大学，但同样都係选修computer engineering，佢哋志趣相投，大家都锺意饮咖啡，Mike话：「09年嗰阵我哋各自有份正职，不过閒时都会出嚟玩。有日我哋2个坐喺间coffee shop，谂嚟谂去都谂唔到去边度玩，于是就谂：香港可能有好多活动或者艺术展览发生紧，但因为冇渠道宣传，于是就出现『有人冇活动去，有活动冇人去』嘅情况。」 于是，佢哋开始分工合作：Sam负责写网站程式；Mike负责揾活动资讯。大家可能唔识读网站名称Timable，Sam就教大家：「佢係读『Time麻部』，呢个字係我哋创，係有『time table（时间表）』嘅意思，亦係我哋设计网站嘅概念。喺香港，同一日唔同时分都有各项活动进行紧，我哋想用『时间』为主打搜寻方法，方便读者依自己嘅时间揾活动。当然，我亦有活动类型嘅搜寻功能，方便喜好某种活动类型嘅读者。」 对于普罗大众嚟讲，可能觉得揾活动资讯只要上网就得，原来绝对唔係。「边个话？初时揾资讯真係揾到头痛！」Mike话：「虽然话各大机构同组织都愿意提供活动资讯，不过佢哋好多都冇网页，我要成日出去文娱中心单张同打电话先到资料。」（Oscar）