电影节详情、购票及活动报名－ ⚡️第二届「沟」电影节网页 http://www.hkfcc.org/cultfilmfestival2018 「沟」前｜冯庆强 问：听人讲《午夜凶铃》巧惊？！ 答：惊㗎！我到依家都唔敢重睇。 问：虽然未睇过，不过我以前喺学校扮过贞子。头髮梳前，遮住脸，窒下窒下咁郁。 答：可能太深入人心。当年戏院上，观众咿哗鬼叫，开Party一样。 问：其实点解拣呢套戏？ 答：今次主题係录影带。贞子故事，同录影带直接有关，好贴题。 问：即係个故仔要讲录影带？ 答：咁又唔一定。除咗录影带本身，亦包括八十年代兴起嘅MV热、Video Art、OVA等等。 问：咩係OVA？ 答：即Original Video Animation，一种以录影带形式发行嘅原创动画片。由于直接销售，绕过咗公共广播审查，所以创作自由度好大。OVA题材可以严肃，又可以完全离经叛道，甚至有唔少作品，喺性与暴力方面，因为意识踩界，引起过争议。 问：最近，经常有人回味八十年代。你哋係咪都想怀旧一下？ 答：对我嚟讲，八十年代未足够叫旧。不过，同样问题，我问过另一位节目策划David。话晒年纪差一大截，我想知佢点睇。David Whatsapp覆『其实我做呢个programme，从来无特别怀旧过，或者谂存唔存在怀旧嘅问题。我从来无觉得VHS嘅年代好过宜家。比我拣我都会拣宜家，用一晚就可以搜罗到塔可夫斯基高清1080p全集嘅日子。做呢个programme我觉得比较有意思嘅係，以一个物质、载体作为切入点，打开一个特定年代嘅风貌。我地嘅选片第一眼望落去好似唔太集中，但我自己觉得其实都reflect咗八十年代中至九十年代流行文化以至政经环境嘅多种面向。呢个我係觉得有趣的』。 问：听讲，本来唔会有第二届？ 答：原本无话接住搞。斋放所谓沟片，我亦无咩兴趣。直至揾到录影带呢个Point，有可能扩充到成为主题，我先至提出，尝试再做。 问：今次多咗音乐呢部分，例如MV，点解？ 答：首先，MV对视觉文化影响好大。比如米高积逊82年MV〈Thriller〉，从製作到演出，只可以用轰动嚟形容。又或者麦当娜嘅〈Material Girl〉，个MV就借用咗梦露嘅经典形象，重新包装流行音乐，成为完美商品。经过六、七十年代思潮嘅衝击同挫折，八十年代係另一番景象。83年《劲舞》（Flashdance）、84年《浑身是劲》（Footloose）、86年《壮志凌云》（Top Gun）等，都加插咗歌曲，呢部分拍摄同剪辑方法，实际上係MV嗰一套。毫无疑问，MV虽然好睇，但係视觉艺术係咪一下子完全靠拢商业呢？其实又唔係，有唔少导演，发现录影带呢个媒介，可以好自主，好玩嘢，比如Derek Jarman，佢拍嘅MV同长片，形式、内容，都好激进！ 问：等于麦当娜首〈Into the Groove〉，Sonic Youth成员嘅side project就翻玩过。呢个就係八十年代其中一个面貌。 答：要补充嘅係，原本「低清游击战」裏面，有两部港产片。其中一部係黄志强导演嘅《舞厅》，另一部，就係未删剪嘅《第一类型危险》。呢两个戏，有好长时间因为种种问题而唔能够再做正式放映，只能以影带嘅形式喺坊间流传；两部电影本身同埋佢地嘅命运，都相当特别 。不过好可惜，因为成本、版权问题，最终都安排唔到放映。另外，主片单部分，中途亦要换片，但就一直决定唔到，呢个时候，David提议拣《德州风情画》、《老翻大师》两部戏。经佢一讲，我认为成个节目，因为呢个建议，概念上的确完整好多。 问：放片除咗戏院，仲有茶餐厅、观塘海滨？ 答：若果配合到内容，换下放映场地，可能几好玩。特别一提，石井岳龙套《半个人》，除左多年前香港国际电影节之外，应该再无喺香港正式公映过。而且今次放映嘅会係电影嘅足本版，因此暂时嚟讲，呢场机会难逢。 问：话时话，你最想睇边套？ 答：可能係《布袋澳跳掣》。裏面记录咗八十年代尾嘅香港，应该好有趣。