1994年10月14日，喺数以十万计目击者注视下，一对情侣于美国加州某餐厅内落单、食早餐、讨论日常、讨论打劫，决定打劫，掹枪，起身、然后响起「标」一声 —— 画面定格，转黑，「PULP FICTION」二字随住〈Misirlou〉绵密而刚猛嘅结他扫射缓缓升起。对于香港戏院，又或许多喺内陆城市长大嘅电影观众，呢一幕有机会係佢哋人生第一次接触衝浪摇滚（surf rock）嘅时刻。 顺应六十年代美国西岸，尤其加州海岸一带兴起嘅衝浪文化而诞生嘅surf rock，高峰时期足以同全美最受欢迎嘅girl groups同Motown乐派分庭抗礼。经典代表除咗《危险人物》收录嘅 Dick Dale，仲有名人堂级数嘅 The Ventures，以及无数音乐人奉为编曲圣经嘅 The Beach Boys。 到底点样嘅声音，先可以表现出大海无量，海水与海浪之间前堆后拥嘅结构呢？ 呢班上世纪嘅乐手利用结他音箱嘅自然回放（guitar amp feedback）原理，造出机械式嘅速弹效果，加上鼓手喺同样脉衝内各玩不同节拍，营造出一种浪高浪低，整个大海从四方八面涌紧埋嚟嘅刺激感 —— 五十年后，几个大韩indie仔女喺釜山海边band房练嘢时开始思考：喂，呢种弹法其实同shoegaze係咪有啲似。 釜山，排喺首尔后嘅韩国第二大城市，除咗係尸杀列车终点站外，亦因其热带气候与稳定嘅风季档期，成为全球surfing界知名嘅海港都市。喺当地成长结成，Say Sue Me 多次提到家乡浪声对佢哋音乐创作嘅影响，不下于 Yo La Tengo、Pavement、Blur、Ride 等由细听到大嘅欧美独立名团；第一张EP《Big Summer Night》由开场曲〈Fight the Shark〉到收尾〈Spy on Motorbike!〉，到处能够听见六十年代衝浪曲式，与九十年代美式噪音流行美学基因。 根据乐队后来自己收集返嚟嘅说法，Say Sue Me（下称SSM）会喺美国乐迷间走红，似乎係因为佢哋嘅音乐令人感受到一种对时间，而非对地方嘅乡愁，就我自己嚟讲，播 SSM 时会谂起2010前后，听 Best Coasts、Vivian Girls、The Drums 嗰种纯粹，而大西洋对岸嘅乐迷则形容佢哋为 Alvvays 与 Yo La Tengo 混合体。 意外行出国际线嘅 SSM 喺2017年签约伦敦厂牌 Damnably（厂牌旗下有日本嘅 Otoboke Beaver 同埋香港嘅 DAVID BORING 唷 :3），双方连线未几即推出全新EP《Semin》，为年前遭遇车祸，陷入半昏迷状态嘅创团鼓手筹募医药费。 我谂 SSM 另一个吸引自己嘅地方，係你从音乐中已经听得出佢哋份人牌品好。技术扎实，编曲用声唔算花巧但细腻有余，每个轰炸与安静嘅段落，都可以实在地感受到乐器背后每个岗位嘅情绪，呢样玩摇滚最基本嘅嘢，佢哋做得好好。由当初开心夹band开心玩，到遇上人生高高低低，喺 SSM 躁动轻快嘅曲式底下，有一种定海神针嘅气度 —— 某程度上，就好似 Yo La Tengo 首〈Ohm〉畀我嘅感觉，唔係一样嘅音乐，但係相似嘅甜美安心。 女主唱 Sumi 抱住「再坏嘅事，背后都可以有一个好原因」想法，与乐队写下〈Good For Some Reason〉收拾心情 ，按原定计划继续录製第二张大碟。 2018年，Say Sue Me 推出《Where We Were Together》，一张于爽劲与浮躁之间保持绝妙平衡嘅”surf gaze”专辑，大概亦係唔少本地shoegaze迷接触到 SSM 嘅契机。该碟除咗继续受西方圈子追捧，意外喺韩国当地引起迴响，一举入围韩国大众音乐赏五项提名，同届数目仅次于进入上升期嘅 BTS（？！），最终赢得modern rock album/ song两个奖项。2019年底，SSM 成为首支登上你成日喺YouTube碌到嗰个「Live on KEXP」嘅韩国乐队，并且第二度参加德州 SXSW，获评为最佳现场演出之一。 而佢哋再次出现喺 KEXP，已经係美国时间上星期五嘅事。 去年夏天，全球疫情步入尾声阶段，Say Sue Me 喺几首韩剧插曲热身后，录好第三张大碟《The Last Thing Left》，再次入围韩国大众音乐赏，与 Black Midi、Wet Leg、Alvvays 等一同入选Reddit ‘Indieheads’群组（会员260万人）嘅年度专辑名单。比起出道作嘅青春烂漫，见到有浪就衝落海嘅爽劲，现在式嘅 SSM 依然以大海为伴，却係有时由得浪花湿吓脚，有时天气好落水踩吓板嘅成熟状态。 Yo La Tengo 低音结他手 James McNew 係如此形容：灵魂层面嚟讲，呢张碟有一种既新鲜，又老练嘅气场。喺 Say Sue Me 嘅演奏中，我哋可以听出呢班人对创作音乐嘅爱，亦可以听到佢哋对过去时光与城市面貌嘅爱；或者由 Sumi 以韩文主唱嘅〈꿈에 (To Dream)〉，最能够表现出现在式 SSM 嘅动人特质，首歌好似花田上几片雨云一样，有欢乐，有脆弱，爱与失落，人就係咁。