从梦景取材，来自京都嘅独立唱作人青叶市子喺19岁发表首张大碟《剃刀乙女》，确立以木结他与人声二重唱嘅简约配置。其有如森林精灵吟唱嘅歌声，加上清透暖流一般嘅另类日式民谣质感，既吸引Cornelius 小山田圭吾 、细野晴臣等神人搭档演出，亦喺欧美得到广大迴响，受邀与 Black Country, New Road、Japanese Breakfast、Weyes Blood 等单位同台；而佢喺2020年发行嘅代表作《Windswept Adan》，就得到乐评频道 The Needle Drop 9分高评价。

凭藉一人一结他嘅演出方式喺世界各地乐迷之间赢得口碑无数，然而擅长管乐，曾经喺录音中亲自演奏钢琴、单簧管、手风琴、长笛等元素嘅青叶氏，其实对古典乐向来有浓厚兴趣。

2022年，佢就与英国弦乐组合 12 Ensemble 喺伦敦 Milton Court 音乐厅举行合奏演出；弦乐衬托下，青叶氏发挥出更具层次嘅气场，净係上Youtube已经feel到浸仙气。好彩我哋都唔使得个恨字：2025年2月24日，青叶市子将会再度访港，并与香港管弦乐团 HK Phil 多位团员合作，喺西九文化区戏曲中心大剧院带来另一场限定演出。

青叶市子作品虽然结构古典质朴，却可以喺可缓可急嘅节奏中引导听众情绪探索，自带一股令人唔捨得转歌嘅灵性诗意。随住作品增加，青叶氏逐渐加入更多乐器以及大量环境音效（佢曾经喺访问表示每次到访不同城市都会抽时间记录当地雀鸟嘅声音），营造出充满疗癒感嘅魔幻氛围，透过现场感受时尤其深刻。如果你有参与今年初佢与 Slowdive 嘅联合专场，相信都不会忘记嗰种纯粹体验，明年二月，唔好错过青叶市子与古典音乐家现场合奏嘅珍贵机会！