音域多变自成一格嘅奇幻女声 + 同时驾驭民谣与电子音乐风格 + 舞台上古灵精怪嘅肢体动作 + 无拘无束嘅戏剧化表情 + 令人印象深刻嘅服装穿搭，加上天生嘅北欧人气质 —— 初初接触到 AURORA 时，好容易会联想起冰岛国宝歌姬 Björk。

童年喺沿海城市渡过，于挪威的森林长大，AURORA 自6岁开始养成写歌嘅兴趣以来，大自然一直係佢重要嘅灵感女神，至今依然有到森林散心，饮红酒与动物聊天嘅习惯。19岁推出处女大碟《All My Demons Greeting Me As a Friend》融合北欧传统民谣、synth-pop、电子音乐等曲种，收录令佢喺全世界初露锋芒嘅名曲〈Runaway〉，更因为触动人心嘅歌词，而获邀喺2015年诺贝尔和平奖颁奖上现场演唱，此曲至今累积超过九亿串流点播，大红人 Billie Eillish 就曾经强调〈Runaway〉係啟蒙佢开始创作嘅重要作品之一。

2019年，AURORA 再因为参与演唱《魔雪奇缘 2》 主题曲〈Into The Unknown〉而国际性爆红，乐迷纷纷被佢一把既能魔幻飘渺又能雪崩澎湃，无负其名「极光」之意嘅歌声所震撼，快速成为挪威音乐代表。及后再推出新碟《The Gods We Can Touch》，从希腊神话取材，透过普罗米修斯、酒神等15位神衹嘅缺陷，探讨人性与宗教，亦喺〈Cure For Me〉表现出佢对电音节奏嘅掌握，喺 Metacritic 上得到81分综合好评。

然而呢位被形容为异世界精灵都不为过嘅唱作者，并不只有文艺知性一面，其纯粹、原始、直接宣泄情感演唱方式，令佢喺2017年收到英国电音霸王 The Chemical Brothers 相邀合作，分别喺〈Eve of Destruction〉、〈The Universe Sent Me〉等曲献声，与成员之一 Tom Rowlands 结成忘年之交（AURORA 第一次往 Rowlands 家中作客时，就因为喺森林散步散咗5个钟吓亲人以为佢失踪），而对方亦礼尚往来，喺 AURORA 嘅新歌〈My Body Is Not Mine〉中编奏合成器以及鼓机部分。

喺为《The Gods We Can Touch》进行巡演期间，兴趣多多嘅 AURORA 开始钻研人体解剖学，希望从生物层面去了解「人心」到底係咩一回事，并以此连结地球生态、社会结构、心灵成长等主题，最终完成今年推出嘅第四张个人大碟《What Happened to the Heart?》。除咗刚提到嘅〈My Body Is Not Mine〉外，亦收录〈Your Blood〉、〈To Be Alright〉、〈Starvation〉等先行单曲，係一张适合由头听到尾嘅上佳专辑。2025年2月24日，呢位无论流行与独立乐迷间同样大受欢迎嘅新生代北欧天后，将于亚洲国际博览馆5 号展馆(Hall 5)作首次香港公演，包保係一场你十年后都可以攞出嚟回带威威嘅精彩演出！

．请勿误信非官方售票渠道

Follow 埋 Timable 演唱会 FB 专页：

https://www.facebook.com/timable.hk.concerts