2025年3月16日，苏格兰后摇滚巨擘 Mogwai 将会相隔十年再度访港，喺西九自由空间大盒举行大型专场音乐会！

九十年代英国Britpop浪潮席捲全球，身处英摇盛世，有人欢喜有人嬲，远在苏格兰格拉斯哥嘅四位band仔对当时日播夜播嘅各种流行摇滚曲风感到相当厌倦，而佢哋嘅反动方式，係从美国post-hardcore乐队取经，炸爆所有既定嘅旋律和弦节奏结构，炸到剩返排骨，再喺焦土上重新建立自己相信嘅摇滚美学，一种被后来者归纳为后摇滚（post-rock）嘅美学。

乐队名源自经典可爱魔幻恐怖片《Gemlins 小魔怪》中，閒角以广东话对班大耳小妖嘅称呼。Mogwai 由1997年首张大碟《Young Team》开场曲〈Yes! I Am a Long Way From Home〉3分44秒嘅结他大爆炸起，为当时乐迷开拓出一幅全新音乐版图。继千禧前后一连发表《Come On Die Young》、《Happy Songs For Happy People》、《Mr Beast》三张经典钜作后，Mogwai愈发精于编写既能狂暴汹涌，又能细腻深邃嘅史诗质感；陆续有不同电影人邀请乐队製作电影配乐，而第一击就係颇具实验性，以法国球王施丹为主角嘅纪录片《Zidane: A 21st Century Portrait》。

Mogwai喺2014年嘅《Rave Tapes》完成再一次变奏，将电鼓、合成器、modular大量融入编曲中，凶猛依旧，形成摆脱已成框格嘅后摇滚，甚至有丁点舞曲元素嘅电气魔怪风格，两年后为纪录片《Atomic, Living in Dread and Promise》配乐嘅其中一首〈U-235〉更係100%电子乐曲。全新进化为乐队引来新一批年轻乐迷，连续两碟打入英国唱片榜Top 10，2021年嘅《As The Love Comes》晋身冠军大碟，现场演出亦更加丰富。

愈夹愈有货嘅 Mogwai 今年推出全新单曲〈God Gets You Back〉，并宣布喺2025年举行世界巡演，我哋好开心可以话畀大家听三月会有香港站！今次係佢哋继2014年Clockenflap主舞台压轴登场后，久违十年嘅香港公演，叹过爽过嘅资深乐迷们自然知道Mogwai现场係值得睇无限次嘅跳墙级音乐体验，新入坑嘅朋友仔，亦係值得你哋瞓身期待嘅第一次。