香港独立音乐编年史上不可或缺嘅「意色楼」，分别喺2006年及2012年发表《相识但陌生》及《公开跟秘密之间》两张经典大碟，将人际爱恨忐忑、情色性慾阴暗面等感情刻划于〈刹那快慰〉、〈怀抱内拆穿你〉、〈小鹿乱撞〉等多首作品，现成员为创团主唱梁颖礼、结他手陈浩南、低音结他应嘉乐、鼓手Kitt Lau。沉寂一段日子后，2021年推出惊喜单曲〈恍然响往的瞬间〉，被 DAVID BORING 张医生撰文形容为「清新可口，直头係秋高气爽」，换个心态再挣扎，进入另一阶段嘅意色楼近年重新活跃于舞台上发射本我的讯号，不论新旧乐迷继续为之惊艳。

以暴烈结实嘅 post-hardcore 架构为底蕴，搭上具有文学节奏嘅低吟呐喊，而阿礼演绎「唱歌」呢回事嘅方式，又有心将词义与歌意两者区间，既如梅迪斯@识你佳 所讲「字词亦只是黏附在声线上的寄生品」，又如乐队自我介绍所写「音符跟文字吵架」，矛盾衝突得嚟爽歪歪。听意色楼若果唔打开对耳成件事咁听，就好似用iPhone睇 David Lynch 一样咁错配，係要现场用全身皮肤去听live先最啱数。今次有意色楼首度参演，喺 Clockenflap 维港旁嘅广阔环境下与你我他碰撞，究竟会係一场点样嘅音乐体验？我哋都很是期待又好奇。