来自西安四人乐队 FAZI 法兹，前身叫 The Fuzz 嘅佢哋，名字本身已承载毛噪杂音 (fuzz) 嘅字义，又爱 Krautrock 果种德式前卫摇滚律动，自自然然形成一套简约刚硬嘅 post-punk 美学，成名单曲〈控制〉就包含向 Ian Curtis 致敬之意。以 P.K. 14 主唱杨海崧出马製作首张大碟《谁会做奔跑的马》为起点，法兹逐步建立出高压全场紧迫而精神饱满嘅招牌风格，乐迷分布由国内逐渐扩散至海外，曾受邀到英法德意日等国巡演。

2022年发表收录〈假水〉、〈热死荒梁〉等佳作嘅第五张大碟《折疊故事》后法兹再次备受国内外音乐圈瞩目，佢哋现场演出唔单只糅合咗神秘东方元素，主唱刘鹏嘅招牌「打拳」舞台风格令佢哋无论视觉定听觉都令人一睇难忘。嚟紧首次登上 Clockenflap 舞台作歷来最大型香港公演，好想听佢哋现场控制我控制你！