Update 3/4/2026: 农夫再开心宣佈加母亲节日场
方便大家睇完骚重可以庆祝母亲节

农夫前日公开发售第二场《农夫全香港最好笑嘅演唱会》门券，一小时内全部售罄，这个消息，令到陆永及C君都觉得有点受宠若惊，并且开心宣佈
再加开终极母亲节日场！4月8日Klook率先订票，4月9日Urbtix公开发售，仍想买飞的歌迷一定要留意了。

C君直言，16 年前红馆开骚，只做一场，没想到16 年后，可以开三场，进步了3 倍(300%)，「呢个我估三场暂时係我哋体力极限啦，红馆要多好多力。咁点解开日场，因为嗰日係母亲节，等大家下午嚟睇完骚，晚上可以开开心心陪阿妈。咁如果有人睇完唔开心，都一样晚上可以陪阿妈，做人最紧要孝顺嘛。哈哈。」

问到陆永，係咪一早揾麦玲玲算过，今年行运，所以今年一开就爆，一开又爆，陆永笑言，「冇呀，玲玲仲算紧佢有冇飞俾朋友，但係师傅好好，话会力撑我地每场都出现，哈哈。」
外间不停有人话抢唔到飞，所以大会公佈，第三场会有超过六成门票公开发售，希望更多人抢到，C君话，「冇试过搞咁多场咁大型嘅演出，净係平时睇新闻，啲歌手朋友开骚，话自己都唔够飞，要俾钱去公售日抢飞返来应酬屋企人同朋友，原来係真，原来呢啲事都会发生係我哋自己身上，好奇妙 。」
第三场，C君笑言，自己母亲、外母呀咁一定嚟支持，「最好完骚后，主办揾间又靓又好食嘅餐厅搞个庆功宴啦，咁我哋咪可以带埋老母、外母去食饭，完show兼祝大家母亲节快乐啰，哈哈。」

----------
Update 25/3/2026:

农夫出道26年再踏红馆 「全香港最好笑嘅演唱会」

今日公售，一小时卖爆 开心宣佈加多一场！

农夫（Fama）出道26年，继16年前首度登上红馆舞台后，今年再次回归，宣布举办一场《全香港最好笑嘅演唱会》。5月8 日门票今日（25日）正式公开发售，反应极度热烈，一小时内即全数爆满，农夫随即开心宣布加开5月9日一场，誓要以笑声席捲红馆。

对于门票火速售罄，C君（郑诗君）笑言今次演唱会的口号与主旨正是「今日唔知听日事，笑得一次得一次」，非常感恩乐迷的热情支持。16年前我哋只係开一场，今次可以加多一场，进步咗100%！一倍！希望到时大家人人场场时时刻刻都开开心心！」

陆永（陆永权）则认为票价「抵睇」是今次加场的关键。他笑说：「我觉得最开心係观众，好多朋友都同我讲，好期待呀，咁平嘅！哈哈。我估加场原因，係今次票价令大家好开心，价目相宜。」他更打趣道：「票价令大家开心，令我哋唔开心，係冇问题，呢个骚绝对係为大家而做嘅！哈哈。」

随着加场消息公布，C君透露要开始「练啲嘢」备战。他表示除了正密锣紧鼓构思能令大家开心的互动环节外，亦希望大家能以「考古、悼念」农夫的心态入场观赏，「大家带住一种考古悼念嘅心态嚟睇，都已经好笑㗎啦。」他更提到派台的新歌《欢迎玩谢我》，正是为演唱会度身订造的主题曲，「大家去听下啦，就知个骚其实中间我哋都会除咗玩，亦有啲『行嘢』嘅。」

重提16年前首次红馆个唱，C君感触道：「啲人成日问，16年后再去红馆，今年係咪好大意义？其实有几多人记得我哋16年前去过红馆呢？哈哈哈.....意义来来去去都係嗰句，很多人需要开心，我哋好想俾大家一晚快乐，可能你入到嚟唔觉得好笑，但至少你可能忘忧, 唔洗𠝹櫈三个钟。」他更借用歌名笑说：「大家夹钱玩得谢我两个，已经够开心啦。」

陆永扬言希望入场观众能突破平日睇演唱会的体验，被问到会否为演唱会操肌，陆永妙语回话：「本身有咪练多啲。我哋本身唔係呢科，冇理由开呢饭㗎？」C君则幽默补刀：「练紧㗎啦，练个肾，肾肌，呢样好呀，够健康。」陆永笑称自己届时会表演「肾功能」，「不会不停去厕所」，又卖关子表示无论练出甚么成果，定必在演唱会上呈现。

至于嘉宾阵容，农夫坦言知道现今社会观众对嘉宾的期待有时甚至超越演出者本人，但他强调今次演出嘉宾别具心思：「今次呢个骚，真係请得最多朋友会嚟，上唔上台，到时话你知。成件事我哋希望係，每个嘉宾你会 feel 到到场係有原因嘅，佢哋係 part of 表演者多过嘉宾。」

----------

Update 4/3/2026:

香港地道嘻哈组合农夫（Fama），由C君（郑诗君）与陆永（陆永权）组成，2000年出道至今，由「地下Rapper」发展到成为「全面创作人」，誓要全力创作一个能够令观众跳一晚、笑一晚嘅演唱会。

回顾农夫的红馆之路，他们早在2010年6月已举行了首个红馆个唱《Down to Earth演唱会》。当年他们以「太空人」及「野人」造型从天而降，留下经典回忆。相隔16年，在出道第26个年头，他们终于再度获邀以「农作物」的造型重返红馆这个梦寐以求的舞台。


相隔16年的第二次红馆骚，农夫融合音乐及栋笃笑，命名为 《农夫全香港最好笑嘅演唱会》 ，顾名思义，主菜是一场大型「集体开心派对」。农夫笑言：「我地嘅演唱会唔敢话最好睇、最好听，但好可能係最好笑，因为人地啲演唱会係唔讲笑嘅！今次目标就係希望观众入场，起码能够获得一个开心嘅晚上。」为了令观众开心，农夫设计了很多全场「一齐玩」的环节。C君解释：「只要观众开心，欢迎大家入场玩到我谢，由开show玩到鸣谢。」

这次演唱会的海报率先「玩自己」。海报所见，C君与陆永竟然被「埋葬」在泥土之中，只露出两颗笑容灿烂的人头，四周更种满了西兰花、红萝蔔、生菜等新鲜蔬菜，画面既搞笑又诡异，像是「入土为安」，陆永笑说：「係种生机，我哋一路种自己嘅作品，终于等咗16年先有第二次红馆骚，算有啲生机，多谢大家咁多年嚟帮手栽种我哋。」

虽然外间一望就认为他们今次这种超现实的海报是AI合成技术的产物，但农夫话你知，拍摄当日团队可是「嚟真嘅」！工作人员真的动用大量真泥土将两人身体覆盖，只露出头部。两人虽然被泥压身，但仍要保持专业笑脸，非常认真。

眼见两人的造型，少点幽默感都难以接受。但农夫就最擅长将忌讳变成笑话，C君更抵死地自抽水：「啲人话两个死人头，今次咪种返生佢。」

出道26年，农夫由当年揸住支咪在地下场地Rap，到今日成为广告商宠儿、大型活动金牌司仪，他们依然保持着那份「贴地」的亲民感。这个「用泥土种出嚟」的演唱会，既代表了他们对音乐的默默耕耘，风吹雨打也坚强生长的理念，又展现做人要真！唔用AI代替，亲力亲为！宁愿「玩谢自己」也要娱乐大众的敬业精神。到时入场的观众，记得准备好你的笑声，齐齐「淋水」，等农夫这场又好笑嘅演唱会」茁壮成长！

----------

Update 6/10/2025:
农夫係广州草莓音乐节中宣布2026年5月会係红馆开演唱会

----------
农夫Fama喺刚刚完成嘅3场寿臣演唱会表示有意2025年喺红馆开 (但未入纸)！由于纸都未入，就算拎到都极可能年尾！多多留意！

．请勿误信非官方售票渠道

Follow 埋 Timable 演唱会 FB 专页：
https://www.facebook.com/timable.hk.concerts