早前布志纶举行个唱叫好叫座，日前宣佈举行 Part 2《Rock’s Going On! Pt.2 Deluxe Remix》音乐会，将于 7 月 25 日假座于 Backyard @ AXA WONDERLAND 举行！Alan 对于「Part 2」相当兴奋，仲保证歌单会有意外惊喜：「今次 Part 2 嘅歌单除个人作品外，都会拣啲歷年来我创作、耳熟能详嘅经典。除咗基本嘅 Rock 元素，唔少歌曲我会重新改编，带畀大家好多意想不到嘅惊喜同层次，包保大家会有新感觉！」

呢次音乐会户外举行，Alan 预期气氛够晒「Chill」：「户外骚边饮边食最紧要今次除咗 Band 之外，仲邀请咗 DJ 做 Remix，希望撞到啲新火花。（团员会上台？）屋企人一向都好支持我，今次户外骚佢哋都会嚟感受下气氛。阿仔依家慢慢大个，佢成日都好想表演，但係都要睇佢自己肯唔肯练习，今次未知道会係点，暂时要求佢做返台下观众，睇下老豆同咁多人一齐 Rock 嘅场面，同大家一齐 Chill、一齐享受音乐先！」Alan 就话一场「唔够喉」，歌单有太多选择，但团队将所有精力「精炼」到台上：「好多歌迷真係陪住我一齐成长，经歷人生嘅高低起跌。睇住大家由当年小学、中学、大学生，到依家踏入社会、甚至做埋父母，呢十几年嚟大家一齐经歷咗好多。我希望今次音乐会除咗勾起大家『听住我啲歌长大』嘅共鸣，最重要係带畀大家好欢乐、好正面嘅力量去面对人生。音乐本身就係最好嘅『天然能量补充剂』，只要享受好音乐，心态自然会年轻。年龄嘅数字从来唔係问题，体力交畀我，最重要大家开开心心去 Enjoy 音乐。」