薛凱琪，香港歌手，香港出世，籍貫廣東中山，中學就讀港島學校，大學就讀香港城市大學創意媒體學院。起初參與拍攝多個廣告同埋做雜誌模特兒，及後畢業投身娛樂界。2003年，加入華納唱片公司，其後相繼推出派台歌曲《XBF》、《麥當娜一吻》、《奇洛李維斯回信》、《上帝是男孩》。 2004年4月8號推出第一張大碟《F Debut》。同年5月5號，因為《F Debut》銷量創佳績，所以推出《F Debut AVCD》，當中收錄咗《奇洛李維斯回信》嘅特別版《奇洛李維斯回信(真的回信了)》(同郭富城合唱)以及多首歌曲嘅MV。其後，更獲得金唱片(25,000張)嘅成績。 2004年，佢喺四大樂壇頒獎禮獲得當年女新人之中最好嘅成績，總共八個獎。其中喺叱咤樂壇流行榜頒獎典禮更憑「奇洛李維斯回信」一曲打敗樂壇唔少舊人，獲得專業推介、叱咤十大(第七位)。其後喺IFPI香港唱片銷量大獎中獲「最暢銷本地女新人」殊榮。