香港藝術中心「極品廣告片」踏入第廿五年，今年我地為大家精心準備左5個節目共22場放映，搜羅美國、英國、韓國、西班牙、亞太區的廣告片，更有廣告界「奧斯卡」之稱的CLIO廣告大獎精選！除此以外，我地更邀請到營銷品牌管理專才徐緣現身說法，為觀眾帶來一場名為「數碼時代：行銷的魅未來」的座談會 (28/11)，屆時徐緣將會分析數碼時代中營銷策略的新挑戰與機遇，道出行銷新「魅」來，萬勿錯過！ 座談會免費入場，名額有限，先到先得。 報名: www.hkaconlineregistration.com

---

節目一 2015亞太廣告節精選 [Part 1] (片長: 78分鐘) 21/11/2015 (六) 2:30pm | 22/11/2015 (日) 4:30pm | 29/11/2015 (日) 4:30pm | 5/12/2015 (六) 5pm | 6/12/2015 (日) 4:30pm 日韓泰澳中印廣告一舖睇。紫色八爪魚賣萌襲地球，跟韓男來個第三類接觸。印度有睇頭：225,001個影像、1,440個板球運動員、1個動作，拍成80秒的板球戰書，問你服未？美女真人示範化粧品原來可以用來減肥、豐胸、抗衰老。泰國旅遊局兵行險著拍一輯「我討厭泰國」廣告，全球愛瘋！日本玩3D打印冰塊，威士忌杯中間起座金閣寺加個太空人，風味絕佳！微醺了，將提款機睇成提款「基」？你無醉，是某銀行贊助澳洲同志巡遊的絕頂好主意。 節目二 2015西班牙及葡萄牙語系廣告節精選+ 2015亞太廣告節精選 [Part 2] (片長: 56分鐘) 21/11/2015 (六) 4:30pm | 22/11/2015 (日) 7pm | 28/11/2015 (六) 6:30pm | 5/12/2015 (六) 7pm 浪漫西葡男女使出渾身解數，誓要令你睇到心跳加速兼手心冒汗。剃鬚男甘心跳落食人魚溪流，只為證明一個男人不再痛的事實。泊個保鮮盒進停車場，居然令兩個男人有怦然心動的戀愛感覺？喝一口牛奶，第日變身英勇的消防員，你今日飲咗未？最想要的父親節禮物居然是西班牙製的孖煙囪，時裝嘅嘢你又識乜嘢呀？艾慕杜華電影都無咁爆，仲要人人到最後只懂打電話問候母親。六十歲老婆婆同你講佢去過世界盃、上過CNN、戀愛、結婚、美好人生，查實佢只係一架車。 同場送上2015亞太廣告節精選 [Part 2] ，日本、香港、澳洲廣告精品，保證令你拍案叫絕！日本動物園奇招吸客，網拍一系列用獅子老虎咬爛的牛仔布設計的時裝。《每日新聞》善心加創意，索性將新聞印在瓶裝水招紙上發售，救助天災受害者，人人叫好。喪屍連續劇首播前夕，安排8,000假喪屍「落戶」社交網絡，24小時內吸引過百萬人回應，問你知唔知驚？澳洲廉航推出搞鬼會籍，無里數、無積分、無專用候機室，只供應飛機餐食譜，及網上下載行李牌，九唔搭八，但又搶到客。 節目三 2015美國AICP廣告大獎精選 (片長: 68分鐘) 21/11/2015 (六) 8:30pm | 28/11/2015 (六) 5pm | 4/12/2015 (五) 7:30pm | 6/12/2015 (日) 2:30pm Budget最多、紅星最多、技術走得最前的廣告，盡在美國AICP廣告大獎！咩廣告先叫得郁型男祖迪羅彈完鋼琴再跳踢躂舞？嗒番杯，人生幾何。這邊廂朗尼唔做曼聯前鋒，轉行做漁夫，搞到「大哨」朗拿度睇唔過眼，call齊C朗、伊巴、恩尼斯達踢番場動畫身價波；那邊廂，尼瑪、法比加斯、雲佩斯用至潮耳筒當頭盔，你唔係唔跟住聽呀？疑似佐治古尼同你耳語留意你的身材同埋體重，係咪即時冧晒先？ 節目四 2015 CLIO 廣告大獎精選+ 2015 英國金箭廣告大獎精選 (片長: 83分鐘) 21/11/2015 (六) 6:30pm | 26/11/2015 (四) 7:30pm | 29/11/2015 (日) 2:30pm | 5/12/2015 (六) 8:30pm | 6/12/2015 (日) 8:30pm 睇CLIO學國際品牌打造形象。少女又喊又笑說：「我從未試過為一個漢堡包哭泣！」準確地說，感動她的是漢堡包包裝紙。大品牌做嘢真係估佢唔到，紙尿片品牌竟讓失明孕婦「看」見腹中孩子，航空公司將航機變大師班。德國政府勁到令風現形成鬱躁默劇藝人，你唔明點解？西班牙足球雜誌話當波經咁講就乜都明晒。 同場仲送上英國金箭廣告大獎精選，加倍驚喜！小朋友跟企鵝大玩對手戲，你以為是保育廣告？非也，只是提醒你聖誕節記得到百貨公司買禮物。生命中不能缺少的「?」？牙膏品牌安慰你至少講粗口的同時你擁有亮白的牙齒。服裝品牌用實驗聲音解構服裝元素，玩味十足！ 節目五 2014韓國影像廣告節精選 (片長: 71分鐘) 22/11/2015 (日) 2:30pm | 29/11/2015 (日) 7pm | 5/12/2015 (六) 2:30pm | 6/12/2015 (日) 7pm 韓國廣告出名版本多，明星更多，全智賢、李秉憲、趙寅成，星光閃閃。最受歡迎搞笑成人節目出手，美少女唇膏當武器，指嚇男友勿亂搞，語帶相關投資找某機構最「安全」。鸚鵡哥戴粗金鍊扮晒Rapper，叫你要威就唔好虧。型男索女泡泡浴，忽然冒出荒唐第三者，網購和你零距離。加州巴黎兩生花，重逢唔靠天意，靠智能手機。趙寅成代言產品，會否說：「沒關係，是『抽濕機』啊」？講咁耐，仲未講到全智賢？自己入場睇，反正她賣甚麼你也是想一睇再睇的。

---

座談會: 數碼時代: 行銷的魅未來 日期: 28/11 時間: 2:30pm – 4pm 地點: agnès b. 電影院 (香港灣仔港灣道2號香港藝術中心高層地庫) 講者: 徐緣 報名: http://www.hkaconlineregistration.com 粵語主講。 免費入場，名額有限，先到先得。 數碼時代的來臨，行銷策略可以去到幾盡？ 隨著資訊科技的普及，廣告從業員不單止要快、狠、準制定營銷策略，廣告的平台亦伸延至虛擬世界，透過高科技如虛擬實境、擴增實境、移動定位等的應用，將廣告元素融入使用者的感官體驗之中，實行「感」動用家。市場營銷的Next Chapter，你準備好未？ 徐緣 營銷品牌管理專才，現為壹傳媒集團首席營銷官，兼任《蘋果日報》執行總編輯，推動革新版副刊 －《果籽》的誕生，並在香港中文大學任兼職講師，曾出版《購想》、《型銷》等營銷著作，專欄文章見於《立場新聞》、《蘋果日報》、《100毛》等刊物。