11月11日，好多人都以為呢一日只係大陸光棍節，淘寶同埋其他網上購物平台都會推出優惠畀大家瘋狂掃貨，但其實呢一日亦都係第一次世界大戰結束嘅日子—Remembrance Day（或稱Armistice Day），一般會譯做「國殤紀念日」或者係「退伍軍人節」，而香港就稱之為「和平紀念日」。 香港將「和平紀念日」定於每年11月嘅第二個星期日，紀念儀式由香港退伍軍人聯會主辦。上週日（8日），聯會就喺中環和平紀念碑舉行紀念儀式。美國駐港澳總領事夏千福、英國駐港澳總領事吳若蘭、多名立法會議員、退伍軍人同宗教界代表均有出席，眾人默哀兩分鐘後，喺和平紀念碑獻上花圈。