28/1/2019 update: 公佈演唱會海報及詳情 專家Dickson：..Will I marry me? 專家Dickson： ...Yes, I do... 天生註定純實力派歌手Dickson 告別單身，同自己結婚… 會展擺酒，以歌會親友… 當晚浪漫流程： 食燒豬、玩新郎、左手唱歌 換戒指、掟花球、右手宣誓 同場甜蜜加映： 兄弟姊妹上台助威 司儀賓客表演助興 《專家Dickson 一個人的童話式婚禮》門票套餐 * A. 主家席套餐　$580 套餐包括： 1.《專家Dickson 一個人的童話式婚禮》前排門票一張 2. Dickson & Dickson 囍帖一張 3. Dickson首支派台新曲CD Single（一個人的浪漫紀念版）一隻 + 4. 去飲必食：紅燒翅一碗 # 5. 「Dickson姨媽姑爹俱樂部」會籍一個 B. 普通親戚席套餐　$480 套餐包括： 1.《專家Dickson 一個人的童話式婚禮》中排門票一張 2. Dickson & Dickson 囍帖一張 3. Dickson首支派台新曲CD Single（一個人的浪漫紀念版）一隻 + 4.「Dickson姨媽姑爹俱樂部」會籍一個 C. 普通朋友席套餐　$380 套餐包括： 1.《專家Dickson 一個人的童話式婚禮》後排門票一張 2. Dickson & Dickson 囍帖一張 3. 去飲必食：紅燒翅一碗 # 4.「Dickson姨媽姑爹俱樂部」會籍一個 D. 普通路人席套餐　$280 套餐包括： 1.《專家Dickson 一個人的童話式婚禮》大後排門票一張 2. Dickson & Dickson 囍帖一張 3.「Dickson姨媽姑爹俱樂部」會籍一個 * 於Ticket.TVMostMall.com選購套餐後，套餐將在Dickson婚期前寄出予賓客，或賓客可前往TV Most Mall Office領取。 + 新曲CD Single由A Music限量監製。 # 紅燒翅（全名「紅燒碗仔翅」）由渣哥1996提供。

---

專家Dickson FB: // 嗯，有件事…唔知點同你哋講…… ……不如你哋望望幅圖先…… 嗯，係…我嚟緊竟然有個演唱會… 我人生第一個個人演唱會… 3月，會展，Hall 3D（最細嗰個場）…… 2月公開發售，但下個禮拜就接受優先訂飛…… 唔知你哋點睇，我自己就未係好接受到…… 記得讀中一嘅時候，學校有個情歌王子， 去到邊都揹住個結他，得閒就會唱下歌，深受女同學歡迎。 平心而論，其實佢唔算靚仔過我好多，大約四五倍左右， 但就因為識唱歌，所以溝到女。 當時我心諗：呸！ 唱歌為溝女經已係立心不良， 溝女靠唱歌更加係勝之不武， 我係絕對唔會咁做！ 結果，一眨眼…… 去到幾年前，30歲生日當晚，我循例自己一個…… 我喺度諗，點解我咁廢…… 人又單身，唱歌又走音…… 最少畀我做到其中一樣都好吖…… 但由於我好早就知道自己喺溝女方面冇乜天份， 所以我決定取易不取難，開始學唱歌。 試過上網睇教學、上歌唱班學、跟老師學， 繼而晚晚沖涼嘅時候揸住花灑練歌， 練足幾年…… ……練到上年，無啦啦有機會唱第一首屬於自己嘅歌， ……練到上個禮拜，無啦啦知道我可以有一個屬於自己嘅演唱會， ……再練到今朝，無啦啦就話下個禮拜開始優先訂飛， 唔知你哋點睇，我自己就未係好接受到…… 準確啲嚟講，就係驚到成身震晒…… 唉，好驚唔知最後有冇人會嚟聽我唱歌， 但求到時場面唔好太過冷清…… ……冇乜事我返出去練歌先…… // 專家Dickson首次個人演唱會 主辦機構：毛記電視廣播有限公司 演出內容：認真唱歌、用心跳舞