今年係環保觸覺喺荃灣沙咀道年宵市場第三年舉辦「綠色年宵」，我哋會繼續喺年宵設置攤位「綠本營」同市民分享新年減廢資訊、派義工駐守回收桶推廣乾淨回收同埋派發重用利是封及環保袋。 為鼓勵商戶承諾做好回收及減少產生廢物，我哋仲推出咗「綠色年宵攤位計劃」，呼籲市民幫襯擁有「綠色年宵攤位」招牌嘅攤檔。 我哋嘅『傳「剩」救兵』更會喺年初一淩晨收集年宵攤位剩餘的有用物資例如：帳篷、傢私、貨架、園藝用品（如花盆）等，並將物資轉贈畀有需要團體同市民，免得物資落入堆填區。 約定大家，1月19日至25日喺荃灣沙咀道遊樂場一齊過綠色新年啦！