港安未平疫情又起，明明身處熱到飛起嘅炎夏，但台前幕後手足卻活於音樂演出產業寒冬之中 －－ 演出停擺、無錢開飯嘅生活究竟幾時完？ 不過即使面臨種種「威脅」，TONE 仍然深信音樂係使人自由嘅妙藥。承接一路以來「自己音樂圈自己救」嘅宗旨，今次 TONE 繼續集結一班本地音樂朋友、場地、舞台製作團隊同音樂媒體等，來個反守為攻再次舉辦線上串流音樂節，希望業界以及樂迷朋友可以從音樂當中獲得力量，一齊等待曙光來臨，恢復生活正常嘅一日。 今次演出陣容名單首輪公布7個演出單位，包括型格創作女歌手陳蕾 同 近來大受好評嘅 III iris liu、傳說般存在嘅結他高手 Jason Kui、 人氣高企新貴 Tyson Yoshi 、由 hip-hop 界 OG kz 主理、大玩暴虐黑暗陷阱金屬嘅 Dehumanization Association 、暗黑 post-rock / shoegaze 粵語樂隊 White Dimension 同 日系女團 乙女新夢。 直播當日現場繼續有細So做主持同演出單位傾計，而特備節目方面除咗會收集大家投稿嘅影片以及上次極受歡迎嘅《細show 經濟學》之外，仲會加插《Band界都市傳說》，由黃色大笨象為大家拆解Band界迷團，務求令今次場show好睇之餘仲聽得過癮！！ 自從第一次 TONE 串流音樂節之後，團隊花咗唔少時間去認真討論點樣可以進步，希望令觀眾有更好嘅睇 show 體驗之餘亦可以令更多觀眾認識自己嘅本地獨立音樂圈子。所以今次好冒險地用咗多幾倍budget去打造呢個節目，去證明能力同質素，因此希望觀眾可以抱住「買飛」觀賞演出活動嘅心態看待，以網上購票嘅形式課金支持以平衡龐大開支。 Tone Online Music Festival 是一個以香港本地獨立音樂為核心的線上串流音樂節目，並由幾個活躍於本地獨立音樂產業的團體分擔成本合力籌辦，包括 Hidden Agenda: This Town Needs、 觸STUDIO、 Detuned Radio Festival 、 Daymaker Creatives Limited、 OC2S等。籌辦目的旨在為自身產業的不同崗位帶來工作機會，亦希望透過活動能重新讓廣大觀眾認識本土獨立音樂文化及價值，藉此提升其關注與支持，希望屬於我們的音樂城壘繼續屹立。