「大家仲記唔記得自己第一次參加社運、 第一次遊行時係點樣架，係帶住咩心情同感受呢? 2014年同2019年嘅香港、係香港嘅我地，又變成點呢? 所有野都唔係按住我地希望同期望去發展， 我地比社會推啊推， 不知不覺改變咗自己堅持咗好耐嘅計劃同夢想。 突然之間，我地做咗好多我地冇諗過自己會做嘅野。 學生唔止要讀書仲要保衛校園、 廚師唔一定要係餐廳仲會去大學Canteen煮飯、 司機唔止係謀生職業仲會變身為家長車、 十世唔寫字嘅男男女女為咗氹牆後手足一笑，可以一口氣寫十封信。 我地就係一邊跌倒、一邊起身， 一邊失望迷惘、一邊沉思去搵新嘅出路繼續試、繼續堅持。 成日都有人問「你有冇後悔啊？」 但對於香港人嚟講，哩一條問題早已經唔係一條問題， 因為我地冇得選擇，而我地每個人都用自己嘅行動去比出咗答案。 係哩一個小小嘅畫展，我為每一個係自己崗位默默努力嘅同路人都畫咗一幅畫， 有寫信師、有司機、有老師、有家長、有銀髮、有海外手足...... (當然畫唔曬每一個崗位啦，但未來會繼續努力畫!) 無論係咩崗位、年紀、身處係邊，只要大家愛哩一個地方，大家都係手足。 簡單嚟講，你地，就係我畫展嘅主角、同全部。 新一年我好希望用圖畫同顏色多謝大家， 因為大家，我地先可以一直堅持同堅強， 互相提醒我地因為咩而去遊行、因為咩而去抗爭。 重光唔易，都唔知係邊年邊月邊日先會見到我地心目中嘅香港， 無論係5年後、10年後、即使真係有幸見到哩一日來臨， 我地都係需要結伴同行，提醒隔離一位「勿忘初衷」。」 ——插畫師阿強 邀請你嚟欣賞阿強嘅努力，而且有一幅畫需要你同我參與，親筆將自己畫上去，記得別人，認得自己 －「勿忘初衷」! 另外，逢星期五六日阿強會喺現場幫大家畫畫添(請留意- 強出沒通告)! https://www.facebook.com/bookpunch/ 注意: 舉行活動時有可能會臨時收起某啲展品，大家去前可以留意公佈啊!!