7月17日，香港兩組迷幻樂隊 Lucid Express (formerly known as Thud)及 TYNT 將於九展 Music Zone 舉行聯合演出，作為各自最新專輯嘅發布活動。 回望一年半前，武漢肺炎擴散至全球時，最先有feel嘅香港音樂人應該就係 Lucid Express 及 TYNT。前者美國tour 完左紐約站去到洛杉磯被cancel tour同滯留LA等飛機，後者谷盡奶力嘔出專《SYMBOL》後，就獲通知原定作為首次海外演出嘅日本音樂節全面取消；向來fd底嘅兩組人馬最終趕得切喺北角合體開live，係實施限聚令前香港最後一場音樂演出。 與各地音樂人一樣，兩組樂隊均利用疫情時期潛心創作，TYNT 去年底交出全新單曲〈PLUME〉，今個六月會再推出新作；而 Lucid Express 則錄製完成首張大碟，噪音美學喜歡現場被結他音牆轟炸，被synth聲包實，被音樂帶動起飛嘅樂迷，7月17日呢場演出，係做畀你嘅。 本場演出將由 VJ @neo.yeung @huihongnin 負責映像。

---

Lucid Express 前身為 THUD，2014下半年出道作〈Lime〉一鳴驚人，即時入選當屆 Clockenflap 名單，NME 等歐美媒體持續報導採訪，多次受邀參加英國、日本、泰國等各地音樂節。 Lucid Express 早期以夢幻甜美 shoegaze / dream pop 風格為樂迷熟悉，至2018年單曲〈Ado〉開始加重 synthwave 元素，視覺設計上亦係較早引入 vaporwave 元素嘅香港單位（咁當然依家就成行成市啦）。蘊釀以久嘅首張大碟目前釋出兩首先行單曲〈Wellwave〉及〈Hollowers〉，編曲技巧愈見成熟，相信會係一張高純度嘅集大成之作。 順帶一提，樂隊喺 THUD 時期嘅大部分作品因版權問題暫時消失於各大串流平台，fans想聽舊作就要去現場喇。

---

TYNT 玩迷幻音樂，同迷住玩音樂，當然係兩回事。 喺買少見少嘅香港樂隊中，能夠捉到「psychedelia」路數嘅只佔極少數，TYNT 乃屬其一。用聲能夠接軌亞洲同儕水平，尤其佢哋喺sound design有一種「往上發展」嘅動能，令人諗起哥德式建築（中世紀末期）嘅設計原理，又似致幻藥物產生嘅感知作用，哩點喺本地音樂作品中可能比psych唔psych更加難得。 樂隊早期作品用聲明顯受 Tempalay 及 The Novembers 等日本迷幻／硬棍單位影響，而首張專輯《SYMBOL》則可以話係呢個摸索階段嘅終點。該碟原本係回應東京 Synchronicity Festival 主理人邀請所催谷而成，創作過程無疑令 TYNT 隊型更加完整，新單曲〈PLUME〉正正表現出佢哋嘅「more is more」噪音美學。