// 年尾 南洋大派對，門票數量十分有限售完即止 // 賣緊飛㗎喇。 每次自己想講 南洋時都會寫落好多字，跟住覺得講多咗，然後刪走大半；譬如上一篇我哋寫〈佳佳〉MV，原先寫咗大約 2700 字，最後出街減到得返 591 字。又例如佢哋上年隻同名大碟份新聞稿，本身寫到論文咁，到派出去時亦只係一頁 A4 紙份量嘅......新聞稿。 始終對住一班將所有嘢講得如此清楚明白嘅佬，要避免畫蛇添足係好困難的。睇過咁多篇關於 @nanyangpaidui 嘅報導／blog 後，唯獨有一隻字係描寫得寧舍精準：底層菁英。 即使放喺觀念較為開放嘅歐洲國家，南洋大概都走唔上一條能夠直通大雅之堂嘅路線，但文化永遠係一門由下克上嘅學問 —— 將南洋放落一個有 The Fall、Campag Velocet、IDLES、Fat White Family、Iceage、MC5、The Stooges 等世界級爛仔爛佬嘅 playlist 隨機播放，你自然會對 #最好嘅垃圾呢個 tag 有另一番體會。 喺疫情前，2019 前，你有機會喺 Clockenflap、TOY 專場、永發茶餐廳、泰國細fest、某台北細鋪等舞台睇到佢哋嘅演出，有去過嘅，自然會記得南洋現場爆出嚟果種大大力係遠遠超越你聽 Spotify 所能想像咁大大大大力，每秒鐘都係一嘢又一嘢鞭落你塊面度（除咗玩〈Indie Ching〉嘅時候）。12 月 10 號，由南洋自己擔正嘅專場音樂會，一如字面所示，會係一場十二月嘅大派對。 想玩牙？嚟囉。 演出單位：南洋派對 NYPD + Room307 + QQBBG ft. Kelvin T + more